“Erməni əsirlərinin əvəzində Zəngəzur?” - Paşinyanın deputatı absurd yalan danışdı...
Bəhruz Quliyev: “Bunlar daxili auditoriyaya hesablanmış manevrlərdir”
Hakim “Mülki Müqavilə” partiyasını parlamentdə təmsil edən deputat Qaqik Melkonyan növbəti dəfə Azərbaycanla bağlı absurd fikirlər səsləndirib: “Qazaxıstanda çevriliş olanda KTMT qrup yaradıb qiyamı yatırdı, çünki bu, Rusiyanın iradəsi idi. Amma sərhədlərimizdə eskalasiya olanda Rusiya reaksiyasız qaldı. Aİ müşahidəçiləri gələndə dedilər ki, qoy, bizimkilər də gəlsin”.
Azərbaycan tərəfinin niyə erməni “əsirləri” qaytarmadığını soruşduqda deputat belə cavab verib: “Razısınızmı ki, əsirlərin qaytarılması müqabilində Zəngəzurdan imtina edək? Əsirlərin dəyişdirilməsi ilə bağlı problemimiz var”.
Erməni deputat məsələni elə təqdim etmək istəyir ki, guya Azərbaycan əsirləri Zəngəzurla dəyişmək istəyir. Yəni əsirləri verək Zəngəzuru qaytarın bizə. Axı bu tamamilə uydurma bir fikirdir və Azərbaycan belə bir şərtlə çıxış etmir. Bu, artıq Azərbaycanı dolayı formada ərazi iddialarında ittiham etmək deməkdir.
“Azərbaycan heç vaxt belə “mübadilə” təşəbbüsü ilə, şərti ilə çıxış etməyib”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyevin fikrincə, təkcə hakim partiyanın deputatı yox, digər ermənilər də belə mənasız fikirlərlə çıxış edirlər: “Yalnız “Mülki Müqavilə” partiyasının deputatı olan Qaqik Melkolyan yox, ümumiyyətlə bu cür fikirlərdə olan erməni vətəndaş və siyasətçiləri çoxdur. Antirus əhval-ruhiyəsində olan bir qrup fikirləşir ki, Ermənistan Rusiyanın forpostundan çıxmalı və ümumiyyətlə Rusiyanın Ermənistana təsiri azalmalıdır. Ermənistan özü ilə bağlı bütün məsələlərdə Rusiyanı günahlandırır. Bu cür düşünən insanlar dərk etmir ki, əvvəla Rusiya Qafqazda qəbul edilən supergüclərdən biridir. Yəni istəsək də, istəməsək də Rusiya ilə hər hansı formada razılaşmaq və müəyyən qədər Moskvanın maraqlarını nəzərə almaq lazımdır. Rusiya Ermənistanın Qərbə meyillənib onun təsirinə düşməsini güzəştə getməyəcək. Paşinyan isə açıq şəkildə öz siyasətini ortaya qoyaraq Rusiyadan uzaqlaşmaq, Qərbə meyllənmək və oranın forpostuna çevrilmək istədiyini bildirir. Bunu da Rusiya qəbul etmir və Ermənistanda baş verən hadisələri öz marağına uyğun yönəldir. Bu təbiidir. Nəzərə almaq lazımdır ki, Rusiya Ermənistanı əldən vermək fikrində deyil. Ermənistan da asanlıqla Rusiyanın əlindən çıxmayacaq. Bunu ermənilər birdəfəlik qəbul etməlidir. Erməni deputatın əsirlərin dəyişdirilməsi ilə bağlı söylədiklərinə gəldikdə isə, bu, boş, cəfəngiyat xarakterli fikirlərdir. Bunlar daxili auditoriyaya hesablanmış manevrlərdir. O cümlədən, reallıqla hansısa əlaqəsi yoxdur. Bu ciddi bir fikir deyil ki, bu barədə geniş izahatla çıxış edək. Azərbaycanın öz şərtləri var və bu şərt daxilində ölkəmiz sülhə getməyə hazırdır. Azərbaycan heç vaxt belə “mübadilə” təşəbbüsü ilə, şərti ilə çıxış etməyib. Sülh Cənubi Qafqazın inkişafına xidmət edən amildir və əgər sülh olmasa Ermənistan iqtisadi layihələrin hər birindən kənarda qalacaq. Bu da onun əlehinə yönəlir. Ona görə də Ermənistan səmimi davranmalı, sülh prosesində, əsirlərin dəyişdirilməsində çalışmalıdır ki, erməni xislətini kənara qoysun. Bu formada alınmayacaqsa, Ermənistanla hər hansı bir izdivac, münasibət və razılaşma ola bilməz”.
Vidadi ORDAHALLI
