Slovakiya ilə Ukrayna arasında gərginlik artır - Fiko Zelenskini “dilənçi, şantajçı” adlandırdı...
Slovakiyanın baş naziri Robert Fiko Ukrayna prezidenti Zelenskini Avropada “yalnız dilənçilikdə və şantajla pul tələb etməkdə” ittiham edib. Fiko bildirib ki, Zelenskinin bu münasibətinə son qoyulmalıdır.
Slovakiya ilə Ukrayna arasında münasibətlər Kiyevin Rusiya qazının Slovakiya ərazisindən tranzitinə icazə verən sazişi uzatmamasından sonra gərginləşib. Fiko qərarı "sırf siyasi" adlandıraraq, bunun Slovakiya və Avropa İttifaqına zərər verdiyini bildirib. Onun sözlərinə görə, buna cavab olaraq Slovakiya Ukraynaya elektrik enerjisi ixracını dayandıra, ukraynalı qaçqınlara yardımı azalda və Ukraynanın Aİ üzvlüyünə mane ola bilər.
Fiko 2024-cü il dekabrın 22-də Moskvada Putinlə görüşüb və qaz təchizatı məsələsini müzakirə edib. Görüşdə Putinin Slovakiyaya qaz tədarükünə zəmanət verdiyi açıqlanıb. Bununla belə, Zelenski iddia edib ki, Ukrayna Avropa Komissiyasının tələbi ilə Slovakiyaya qaz tranzit itkilərinə görə kompensasiya təklif edib, lakin Bratislava Rusiyanın tələblərinə boyun əyərək “Ukraynaya qarşı ikinci enerji cəbhəsi açmağa hazırlaşır”.
Fikonun elektrik enerjisi ixracını dayandırmaqla bağlı hədəsi iki ölkə arasında gərginliyi daha da artırıb.
TAHİR
