Ermənilər Naxçıvanla sərhəddə yeni istehkamları nə məqsədlə tikir?..
Azər Həsrət: "Belə bir iddia var ki, Ermənistan ölkəmizə qarşı hücuma keçmək, yaxud hansısa təxtibat törətmək istəyir"
Ermənistan Silahlı Qüvvələri Arazdəyən istiqamətində istehkamlar tikir. Bu barədə "Bez Tormozov" kanalı görüntülər yayıb.
Qeyd edək ki, istehkamlar Naxçıvanın bir neçə kilometrliyində yerləşir. Görüntülərdən də bəlli olur ki, Ermənistan silahlı qüvvələri Naxçıvan istiqamətində bunker və beton tipli hücum xarakterli istehkamlar inşa edir.
Maraqlıdır, Ermənistan Arazdəyən istiqamətində niyə istehkam tikir? Məqsədləri nədir?
"Ermənistan hər hansı bir məsələdə irəli getmək istəsə bu onun zərərinə olacaq, çünki ölkəmizlə müharibə Ermənistan üçün son olacaq"
Siyasi şərhçi Azər Həsrət "Bakı-Xəbər"ə açıqlamasında qeyd etdi ki, Ermənistanın məlum davranışı bizim üçün təəccüblü və yeni deyil: "Ümumiyyətlə, müstəqillik dönəmində Ermənistan daim istehkam tikməklə məşğul olub, bizi qorxutmaq, çəkindirmək cəhdləri ilə məşğul olub. Ancaq nəticə odur ki, Azərbaycan öz torpaqları üzərində suverenliyini bərpa edib və lazım olduğu təqdirdə Ermənistana cavab vermək gücündədir".
Ermənistanın nə səbəbdən istehkam tikməsinə gəlincə, həmsöhbətimiz bildirdi ki, bu ölkə öz müdafiə imkanlarını artırmaq istəyir: "Belə bir iddia var ki, Ermənistan ölkəmizə qarşı hücuma keçmək istəyir, yaxud hansısa təxribat törətmək istəyir. Biz hər zaman demişik ki, Ermənistanın Azərbaycanla növbəti müharibəsi onun üçün intihar olar. Bu dəfə yeni bir müharibə başlarsa, Ermənistan adlı dövlət yer üzündən silinə bilər".
A.Həsrət onu da əlavə etdi ki, Ermənistanın öz iradəsini idarə etmək imkanı yoxdur. Yəni Ermənistan öz ağlı, iradəsi ilə hərəkət etmir: "Bir tərəfdən Rusiya, digər tərəfindən isə Avropa, Fransa bu ölkəni qıcıqlandırır, radikallığa sürükləməyə cəhd göstərir. Bax, Arazdəyən istiqamətində istehkamların tikilməsi də bu amillə bağlı ola bilər. Ermənistan hər hansı bir məsələdə irəli getmək istəsə bu onun zərərinə olacaq. Çünki Azərbaycanla müharibə Ermənistan üçün son olacaq".
Günel CƏLİLOVA
