Fransa Əlcəzair xalqına qarşı müharibəni hələ davam etdirir...
Əlcəzair nifrəti qızışdırma zəminində deportasiya edilmiş əlcəzairli blogeri qəbul etməməklə Fransanı alçaltmağa çalışır. Bunu Fransanın daxili işlər naziri Bruno Retayo bildirib: “Biz Əlcəzair məsələsində son dərəcə narahatedici həddə çatmışıq. Əlcəzairlə bağlı əlimizdə olan bütün vasitələri araşdırmalıyıq”.
Qanun pozuntusuna yol vermiş əcnəbilərin deportasiyası siyasətinin sərtləşdirilməsinin vacibliyini dəfələrlə bəyan edən Retayo əlcəzairlilərə verilən vizaların sayının, eləcə də Əlcəzairə maliyyə yardımının azaldılmasının mümkün olduğunu deyib. Hazırda bu məbləğ 131,79 milyon avro təşkil edir ki, bu da ÜDM-i 240 milyard avro olan ölkə üçün dəryada bir damladır. Daha əvvəl Əlcəzair Fransa hakimiyyətinin ölkədən çıxarılması ilə bağlı göstəriş verdiyi Doualemn adlı blogeri geri qəbul etməkdən imtina edib. Fransanın cənubundakı Monpelyedə yaşayış icazəsi əsasında yaşayan bloger bir neçə gün əvvəl “TikTok”dakı kanalında Fransa ərazisində zorakı hərəkətlərə çağırışlar etdiyi üçün həbs edilib. O, ölkədən deportasiya edilsə də, Əlcəzair onu geri göndərib. Bloger qayıtdıqdan sonra Sena və Marna departamentində müvəqqəti saxlama mərkəzinə yerləşdirilib. Son günlər Fransa polisi hakimiyyətin sosial mediada təsirli şəxs kimi qələmə verdiyi və gərgin münasibətlər zamanı zorakılığa təhrik edən videolar yaymaqda günahlandırılan daha dörd Əlcəzair vətəndaşını həbs edib. Fransanın xarici işlər naziri Jan-Noel Barro bildirib ki, “əlcəzairlilər bu gərginləşdirici münasibəti davam etdirsələr, Fransanın qisas almaqdan başqa çarəsi olmayacaq". O qeyd edib: “İstifadə edə biləcəyimiz rıçaqlar arasında viza, inkişafa yardım və bir sıra digər əməkdaşlıq sahələri var”. Fransanın keçmiş baş naziri Qabriel Attal isə “Le Figaro” qəzetində dərc etdiyi yazıda Parisin əlcəzairli mühacirlər üçün xüsusi üstünlüklər təmin edən 1968-ci il Fransa-Əlcəzair müqaviləsini pisləyərək bildirib: “Artıq məhdudiyyətlər təyin etməli və güc balansını öz üzərimizə götürməliyik. Günahkarların sınaqlarından və yaddaşın icarəsindən qurtulmağın vaxtı çatıb. Bu, Fransaya hörmət məsələsidir. Ona görə də gəlin bundan Əlcəzair ilə qarşılıqlı hörmətə əsaslanan münasibətlərimizdə yeni səhifə açmaq üçün istifadə edək."
Əlcəzairdə daha bir mübahisə Buəlam Sansalla bağlıdır. Əlcəzair hökumətinin 80 yaşlı məkrli tənqidçisi hazırda milli ərazinin bütövlüyünü pozmaqda ittiham olunur. Əlcəzair Cinayət Məcəlləsinin "terrorçu və ya təxribatçı" əməlləri cəzalandıran bölməsi üzrə maksimum cəza ölümdür, baxmayaraq ki, Əlcəzairin moratoriumuna görə bu, sistematik olaraq ömürlük həbslə əvəzlənir. Emmanuel Makronun Boualem Sansal davasında Əlcəzairin "özünü biabır etdiyi" iddiasına Aralıq dənizinin o biri tərəfində sərt cavab verilib.
Əlcəzair Emmanuel Makronun yazıçı Buəlam Sansalın həbs olunması ilə bağlı bəyanatını kəskin şəkildə qınayıb və bunu Əlcəzairin daxili işlərinə qəbuledilməz müdaxilə kimi qiymətləndirib. Əlcəzairin Xarici İşlər Nazirliyi “X” şəbəkəsində paylaşdığı bəyanatında bildirib ki, Əlcəzair Makronun verdiyi bəyanatları böyük təəccüblə izləyib. Qeyd edilib ki, bu bəyanatlar, ilk növbədə, belə məsuliyyətsiz və qeyri-ciddi şəkildə fikir söyləməyi münasib bilən şəxsin özünə zərər yetirir. Nazirlik əlavə edib: “Bu cür bəyanatları yalnız qınamaq, rədd etmək və pisləmək olar, çünki bunlar Əlcəzairin daxili işlərinə açıq və qəbuledilməz bir müdaxilədir”. Vurğulanıb ki, Fransa prezidentinin söz azadlığı adı altında böhtan və yalan söylədiyi məsələ, əslində, ölkənin ərazi bütövlüyünü pozmaqla bağlıdır və bu, Əlcəzair qanunlarına görə cəzalandırılmalı cinayətdir. Qeyd edək ki, Makron həm də Əlcəzair hökumətini hər iki tərəfin vətəndaşlığını daşıyan 75 yaşlı Buəlam Sansalı azad etməyə çağırıb. Sansal Bumidin Hava Limanından Əlcəzairə daxil olarkən həbs edilib və dekabrın ortalarından bəri müalicə bölməsində saxlanılır. O, dövlət təhlükəsizliyini təhdid etməkdə ittiham olunur. Emmanuel Makronun son bəyanatları Əlcəzair parlamenti tərəfindən də kəskin şəkildə qınanıb. Baş verənlər 1962-ci ildə qəddar müharibədən sonra Parisin boyunduruğundan qurtulan Əlcəzairlə Fransa arasında gərginliyi daha da artırır.
Tahir TAĞIYEV
