Fransa Azərbaycanla təmaslara yalnız bir şərtlə başlaya bilər - Prezident dedi...
Zaur İbrahimli: “Fransa tərəfindən təkliflər var və Azərbaycan da prinsip etibarı ilə rəsmi Parislə münasibətləri normallaşdırmağın tərəfdarıdır, lakin…”
Prezident İlham Əliyev yanvarın 7-də yerli televiziya kanallarına müsahibəsində Fransa ilə bağlı heç vaxt danışılmayan bir məsələyə toxunub. Dövlət başçısı bununla bağlı deyib:
“Zənnimcə, bu hər hansı şəkildə böhrandan çıxmağa kömək edəcək. Son bir neçə ay ərzində biz Fransa hökumətinin nümayəndələrindən təmaslar qurulması üçün siqnallar alırdıq, mənim yaddaşımda onların sayı üç və ya dörddür. Müxtəlif şəxslərdən bizim müxtəlif nümayəndələrə müraciətlər daxil olub və həmişə cavab verilib: “Biz hazırıq”. Bəli, biz elə bu gün hazırıq, amma heç yerə getməyəcəyik, nə Parisə, nə də Brüsselə. Bizimlə görüşmək lazımdırsa, burada, Bakıda mümkündür”.
Prezident bu yaxınlarda yenə danışmaq və müzakirə aparmaqla bağlı növbəti, verbal diplomatik “depeşa”nın daxil olduğunu diqqətə çatdırıb.
“Ölkə başçısı öz qətiyyətli mövqeyini ortaya qoyub və bildirib ki, Azərbaycanın xarici siyasət prinsiplərinə, milli maraqlarına cavab verməyən Fransanın təklifləri hər zaman masada qalacaq”
Azərbaycan Milli QHT Forumunun İdarə Heyətinin üzvü Zaur İbrahimli “Bakı-Xəbər”ə açıqlamasında qeyd etdi ki, ölkə başçısı yerli telekanallara müsahibəsində bildirdi ki, Azərbaycan öz xarici siyasəti baxımından da əhəmiyyətlidir: “Ölkə başçısı bildirdi ki, Azərbaycan öz xarici siyasətində ölkələrin suverenliyi, onların daxili işlərinə qarışmamaq, bərabər hüquqlu münasibətlərin tərəfdarıdır. Bu həm Azərbaycanla eyni regionda yerləşən ölkələrə, həm yaxın qonşulara, həm də ölkəmizə maraq göstərən dövlətlərə aiddir. Bu sıraya Fransanı da aid etmək olar. İlham Əliyev müsahibəsində bildirdi ki, Fransa tərəfindən təkliflər var və Azərbaycanda prinsip etibarı ilə rəsmi Parislə münasibətlərin normallaşdırmağın tərəfdarıdır. Lakin bu, fransızların təqdim etdiyi şəkildə ola bilməz. Çünki Fransa hökuməti istəyir ki, Azərbaycan nümayəndə heyəti Parisə getsin və münasibətlərin pisləşməsində rolu olan tərəf kimi ölkəmiz danışıqlarda iştirak etsin və onların şərtlərini qəbul edək. Fransızların təklif etdiyi model təxminən bundan ibarətdir. Dövlət başçısı isə qətiyyətlə bildirib ki, Azərbaycan bərabər hüquqlu münasibətlərin tərəfdarıdır”.
Həmsöhbətimizin sözlərinə görə, münasibətlərin bu səviyyəyə çatmasına səbəb Fransadır. Çünki bu ölkə beynəlxalq hüquqa hörmət etməyib, BMT nizamnaməsinə məhəl qoymayıb və birtərəfli qaydada Ermənistanın 30 illik işğalçı siyasətinə haqq qazandırıb: “Beynəlxalq hüququn normalarını tapdalayan tərəf məhz Fransadır. Buna görə də fransızlar tərəfindən addım atılmalıdır. Onlar ölkəmizə gəlməli və danışıqlar başlamalıdır. Həmçinin, Fransa öz məsuliyyətini dərk etdiyini nümayiş etdirməlidir. Ölkə başçısı öz qətiyyətli mövqeyini ortaya qoyub və bildirib ki, Azərbaycanın xarici siyasət prinsipləri, milli maraqlarına cavab verməyən Fransanın təklifləri hər zaman masada qalacaq. O zaman bu təkliflər nəzərdən keçirilə bilər ki, onlar Azərbaycanın rəhbər tutduğu prinsiplərə, həm də qonşu və digər ölkələrlə münasibətə riayət edəcək. Hesab edirəm ki, İlham Əliyevin bu fikri, qətiyyəti rəsmi Parisdə götür-qoy ediləcək, bunun əks-sədasını biz eşidəcəyik. Azərbaycanla münasibətdə Fransa və digər ölkələr rəsmi Bakının bəyan etdiyi prinsiplər çərçivəsində hərəkət edəcək. Əks halda cavabdeh tərəf onların özləridir. Azərbaycan heç bir vaxt öz milli maraqlarına zidd qərar qəbul etməyəcək”.
Günel CƏLİLOVA
