İran Fransaya nota verdi
İran Fransanın İrandakı səfiri Nikola Roşa Fransanın terrorizmə münasibətdə ikili davranışına etiraz əlaməti olaraq nota verib. Trend-in məlumatına görə, bunu İran Xarici İşlər Nazirliyinin mətbuat katibi İsmayıl Bəqai bu gün Tehranda keçirilən mətbuat konfransında deyib.
Onun sözlərinə görə, ötən gün Fransa səfiri İran XİN-ə dəvət olunub.
"Fransa səfirinə Fransanın terror qruplarına ev sahibliyi etməsi haqda xəbərdarlıq edilib. Terror qruplarına ev sahibliyi etməkdən çəkinmək BMT-də hüquqi öhdəlikdir. Terrorizmi yaxşı və pisə bölmək dünyada qanunsuzluğun yayılmasına səbəb olur", - o qeyd edib.
Bəqai bildirib ki, Fransa prezidenti Emmanuel Makronun İran əleyhinə mövqeyinə İran reaksiya verib:
"Ümid olunur ki, Fransa özünü bu sərgərdan vəziyyətdən xilas edəcək və regional proseslər və region qarşısındakı konstruktiv mövqe nümayiş etdirəcək".
İran XİN rəsmisi deyib ki, Fransa prezidentinin İranın nüvə proqramı ilə əlaqədar irəli sürdüyü iddialar əsassızdır. O əlavə edib ki, 20 ildir ki, bu iddialar heç bir qanuni əsası olmadan irəli sürülür.
“Siz bir gün belə tapa bilməzsiniz ki, İranın Afrikada müstəmləkəçilik keçmişi olsun”, - deyə o qeyd edib.
