Ermənilərin qədim dedikləri dövlət tarixindən bir sərkərdənin qəbri yoxdur - niyə?
Qasım Hacıyev:"Əgər gerçək bir erməni çarı olsaydı onun məzarı da olardı, amma gördüyünüz kimi yoxdur"
Qədim dövlətçiliyə və böyük mədəniyyətə malik heç bir xalq tarixi saxtalaşdırmağa maraq göstərmir, mümkün qədər bundan qaçır, hətta buna meyl edənlərə belə tənqidi yanaşılır. Yəni dünyanın qədim mədəniyyət daşıyıcısı olan xalqları öz tarixləri ilə qürur duyur və ora yad təsirləri toxunmağa qoymurlar.
Türkmənçay müqaviləsindən sonra bölgəmizdə məskunlaşdırılan haylar (ermənilər) Cənubi Qafqazın "qara yarasına" çevrildi və regionu bürüdü.
Özlərini bu torpaqların "yerli sakinləri" kimi qələmə verməyə çalışan hayların əsas məqsədi Cənubi Qafqazın bütün tarixi, dini, mədəni irsinə sahib çıxmaq olub. Onlar həmişə belə rəy yaratmağa çalışırlar ki, guya Cənubi Qafqazın "ən qədim sakinləri" bunlardır. Maraqlıdır, haylar özlərini dünyanın bütün inkişaf etmiş, böyük mədəniyyət, dövlətçilik ənənələri yaratmış sivilizasiyalarına yamaq edirlər. Az qala Şumer mədəniyyətinə belə iddia edirlər.
Urartunun "əsl varisləri olduqlarını" deyirlər. Qafqazın Baqratunilər sülaləsindən yapışırlar, daha neçə-neçə tanınmış hakim sülaləyə iddia edirlər. Bir sözlə, ermənilər iddia edirlər ki, bunların guya onlarla çarı, dövlət xadimi, şairi olub. Amma dediklərini sübut etmək üçün faktların olmaması bir yana, o adamların heç birinin məzarı belə yoxdur. İndiyə qədər ermənilərə aid olan hansısa çarın, knyazın məzarı yoxdur. Onlar mifik yox, real şəxsiyyətlər olsaydılar, məntiqlə, hardasa məzarları da olardı.
Yeri gəlmişkən, I Trdat, İberiyalı Mitridat və başqaları guya Ermənistan çarları imiş. Əlbəttə, bütün bunlar absurddur. Hətta sosial şəbəkələrdə böyük bir siyahı da yayılmışdı və bu siyahıda "erməni çarlarının" adları verilirdi, təbii ki, bu da qondarmadır, bu adlar erməni təxəyyülünün məhsuludur.
"Son dövrlərdə 60-dan çox "erməni çarının, knyazının, dövlət xadiminin" adlarını düzüb-qoşublar ki, heç bir mənbədə adları yoxdur"
AMEA-nın Qafqazşünaslıq İnstitutunun Qafqaz Tarixi şöbəsinin müdiri, professor Qasım Hacıyev "Bakı-Xəbər”ə şərhində "Bu məsələ belədir ki, ermənilər neçə illərdir özlərinə qondarma tarix yaratmaq, mədəniyyət tarixi düzəltmək üçün cəhdlər edirlər. Bəlkə də yüzlərlə kitablar, məqalələr yazıb çap etdiriblər. Bunların da hamısının mahiyyəti bundan ibarətdir ki, onların böyük əksəriyyəti saxtalaşdırılmış arqumentlərdir, saxtalaşdırılmış mətnlərdir, məlumatlardır. Yəni tarixi fakt yoxdur. Fakt özü özünü təsdiq edən bir amildir. Amma ermənilərin dedikləri və yazdıqları heç bir fakta söykənmir, onların faktları yoxdur. Hamısı uydurmadır, yalandır, qondarmadır. Bunların tarixi yalanlardan ibarətdir. Özlərinin heç nəyinin olmadığı faktdır. Onlar əsasən başqa xalqlara, başqa mədəniyyətlərə aid olan maddi-mədəniyyət nümunələri ətrafında eyforiya düzəldirlər, kitablar yazırlar, bununla da özlərini aldadırlar. Artıq dünya ictimaiyyətini elə də dərindən aldada bilmirlər. İkincisi, son dövrlərdə bunların "yeni ənənəsi" ortaya çıxıb. Ermənilər çoxlu sayda "Ermənistandan" danışırlar, müxtəlif "erməni dövlətlərinin" adlarını sadalayırlar. Bildiyim qədər, 11-12 dənə "erməni dövləti" "yaradıblar". Ətrafda olan bütün dövlətlərin ərazisini "Böyük Ermənistana" daxil edirlər. Lap son dövrlərdə isə 60-dan çox "erməni çarının, knyazının, dövlət xadiminin" adlarını düzüb-qoşublar ki, heç bir mənbədə adları yoxdur. Təsəvvür edin ki, bunlar necə saxtalaşma işi aparıblar.
Tiqrandan tutmuş başqalarına qədər elə "erməni çarları" düzəldiblər ki, tarixdə elə ad yoxdur, nəinki sərkərdə, ya dövlət başçısı".
Q.Hacıyev qeyd etdi ki, indiyə qədər erməni arxeoloqları çoxlu sayda qanunsuz arxeoji qazıntılar aparıblar və qondarma şəhərlər, yaşayış məntəqələri, abidələr "kəşf" ediblər. Q. Hacıyevin bildirdiyinə görə, bu bölgədə tarixən ermənilərin yaşamamasına baxmayaraq, torpaqlarımız işğalda olan dövrlərdə Hamlet Petrosyanın və başqalarının rəhbərliyi ilə ərazilərimizdə qanunsuz qazıntı işləri aparıblar, Ağdamın Şahbulaq qalası yaxınlığında saxta "Tiqranakert" "tapıblar", bundan başqa neçə-neçə Tiqranakert düzüb qoşublar, hamısı da əsassız, saxta. "İndiyə qədər arxeoloji qazıntılar zamanı bir neçə "qədim şəhər" tapdıqlarını elan ediblər. Amma nədənsə, hələ uydurduqları çarlara, knyazlara, dövlət xadimlərinə "aid" məzar tapmayıblar. Yəqin ki, nə vaxtsa onların "məzarlarının", "qəbir daşlarının" tapıldığını elan edərlər. Adam bunların saxtakarlığına məəttəl qalır. Əlbəttə, o şahlar, çarlar, knyazlar gerçək tarixi şəxsiyyətlər olsaydılar onlardan bir iz qalardı, amma gördüyünüz kimi heç bir iz qalmayıb. "İz" kimi qələmə verilənlər isə saxta nümunələrdir. Əgər gerçək bir erməni çarı olsaydı, onun məzarı da olardı, amma gördüyünüz kimi yoxdur"-deyə Q. Hacıyev bildirdi.
İradə SARIYEVA
