Ermənistan Azərbaycanın bu tələbini yerinə yetirməyə necə məcbur edildi...
Ceyhun Məmmədov: "Yaxşı olar ki, Ermənistan bu prosesi maksimum dərəcədə sürətləndirsin..."
Ermənistan Minsk qrupunun buraxılması məsələsi ilə əlaqədar rəsmi qaydada ATƏT-ə müraciət etməyi nəzərdən keçirir. Bu barədə erməni KİV-i xəbər verir. Məlumata görə, bu haqda Ermənistanın baş nazirinin mətbuat katibi Nazeli Baqdasaryan öz sosial şəkəbə səhifəsində yazıb.
“Bir sıra KİV-in suallarına cavab olaraq bildirirəm ki, Ermənistan Respublikası Minsk Qrupunun buraxılması üçün ATƏT-ə müraciət etmək ehtimalını nəzərdən keçirir”,- deyə o bildirib.
O qeyd edib ki, Ermənistan Azərbaycanın ərazi bütövlüyünü tanıyır və bunu “sülh sazişi bağlamaqla təsdiq etməyə hazırdır”.
Nə baş verir ki, Ermənistan bu addımı atır? Çünki illər idi ki, o, Minsk qrupunun ətəyini buraxmırdı, indi nə baş verib ki, Paşinyan hökuməti belə bir addım atır?
"Ermənistan çox çalışdı ki, bu prosesi uzatsın, gələcəkdə yeni münaqişələr yaratmaq üçün zəmin yaratsın, amma Azərbaycan buna imkan vermədi"
Millət vəkili Ceyhun Məmmədov "Bakı-Xəbər"ə şərhində "Hesab edirəm, bu məsələ Prezident İlham Əliyevin rəhbərliyi ilə Azərbaycanın həyata keçirdiyi qətiyyətli və prinsipial siyasətin göstəricisidir, nəticəsidir. Ermənistan çox çalışdı ki, bu prosesi uzatsın, gələcəkdə yeni münaqişələr yaratmaq üçün zəmin yaratsın, amma Azərbaycan buna imkan vermədi və qətiyyətli mövqeyini sona kimi müdafiə etdi"-deyə bildirdi.
C.Məmmədovun sözlərinə görə, əslində uzun müddətdir, ATƏT-in Minsk qrupunun heç bir fəaliyyəti yoxdur, yəni bu qurum faktiki olaraq heç bir işlə məşğul olmur. "Bu qurumun ləğv olunması üçün bir sıra addımların atılmasına ehtiyac var idi. Azərbaycan da bu addımları ataraq öz məqsədinə və hədəfinə nail oldu. Bu gün biz deyə bilərik ki, bu istiqamətdə atılan addımlar da artıq öz faydasını və öz töhfəsini verdi. Bu prosesə öz müsbət təsirini göstərdi. Yəni 30 ildə heç bir addım atmayan, heç bir iş görməyən bu strukturlar, bu dövlətlər sonradan Fransa kimi bu prosesə başladılar, bu prosesdə müəyyən addımlar atmağa çalışdılar.
Amma gördüyünüz kimi, Azərbaycan artıq bu məqsədinə və hədəfinə nail olub, bu istiqamətdə addımlarını da atmağa davam edir.
Yəni yaxşı olar ki, Ermənistan bu prosesi maksimum dərəcədə sürətləndirsin, maksimum dərəcədə bu prosesi davam etdirərək müəyyən real addım atsın. Yəni bölgəmizə ən qısa vaxtda sülh gəlməlidir, bunun üçün Ermənistan da real addımlar atmalıdır" - deyə C.Məmmədov bildirdi.
İradə SARIYEVA
