Deputat 20 milyonluq əmlakı necə qazanıb - üstəlik xəbərlərə reaksiya da yoxdur...
Şəmsəddin Əliyev: “Qanun sahibkarlıq fəaliyyətini deputatlara qadağan edir”
Xəbər verildiyi kimi, VII çağırış Milli Məclisin deputatı seçilən Əlibala Məhərrəmzadə Qubadakı məşhur “Şahdağ Truskavets” Sanatoriyasını borc əvəzinə təhvil verib.
Məlumat üçün qeyd edək ki, hələ parlament seçkilərindən öncə Əlibala Məhərrəmzadənin külli miqdarda borc içində olduğu haqda məlumatlar yayılmışdı. Yeni məlumata görə, borc problemini həll edə bilməyən deputat sonda məşhur obyektini təhvil verməli olub. Həmin obyektin 20 milyon manat dəyərində olduğu bildirilir. Məsələ ilə bağlı Əlibala Məhərrəmzadənin özünün mövqeyini öyrənmək mümkün olmayıb.
Burada diqqəti çəkən məqam odur ki, günlərdir deputatın bu boyda biznes obyektinin əlindən alındığı haqda mətbuatda məlumatlar gedir, amma onun özünün səsi çıxmır. Qanunla deputatın biznes obyekti ola bilməz. Biz iddia etmirik ki, onundur, amma axı qanunla deputatın biznes strukturu ola bilməz. Hətta mətbuatda yalan məlumat gedirsə belə, buna reaksiya verib deməli idi ki, deyilənlər doğru deyil. Ya da deməli idi ki, əcəb edirəm. Ancaq belə səssizliyi sübut edir ki, deputatın 20 milyonluq biznesi var.
Maraqlıdır, deputatın 20 milyonluq biznesi ola bilər?
“Görünür o, deputat toxunulmazlığından istifadə edərək heç ictimaiyyətə hansısa izahat verməyi belə düşünmür”
Sözügedən məsələni “Bakı-Xəbər”ə şərh edən hüquqşünas Şəmsəddin Əliyev bildirdi ki, ölkə Konstitusiyasının 85-ci maddəsində millət vəkilləri ilə bağlı tələblər var: “Yəni kimlərin deputat ola bilməsi orada göstərilib. Hansısa ödənişli fəaliyyətlə məşğul olan şəxslər, din xadimləri, ağır cinayətlərə görə məhkumluğu olanlar parlament üzvlüyünə öz namizədliyini irəli sürə bilməz. Yəni bu o deməkdir ki, kommersiya və sahibkarlıq fəaliyyəti ilə məşğul olmaq deputatlara qadağan edilib. Müəllimlik, pedaqoji fəaliyyətlə məşğul ola bilərlər, amma sahibkarlıq fəaliyyəti ilə məşğul ola bilməzlər. Konstitusiyanın 84-cü maddəsinin 4-cü bəndində deputatların hansı hallarda səlahiyyətlərini itirə biləcəkləri öz əksini tapıb. Dövlət orqanlarında vəzifə tutduqda, din xadimi olduqda, sahibkarlıq, kommersiya və başqa ödənişli fəaliyyətlə məşğul olduqda onlar deputat səlahiyyətlərini itirə bilərlər. Bu iki maddə kifayət qədər aydın şəkildə göstərir ki, Milli Məclisin deputatları heç bir sahibkarlıqla məşğul ola bilməzlər. Çünki qanun bunu onlara qadağan edir. O cümlədən, qanun deputatlara toxunulmazlıq hüququ verir. Ancaq çox təəssüflər olsun ki, Azərbaycanda bəzi deputatlar müəyyən mənada bir şəkildə kommersiya və sahibkarlıq fəaliyyəti ilə məşğul olurlar. Bu zaman həmin deputatlar toxunulmazlıq hüququndan yalnız öz şəxsi mənafeyini qorumaq üçün istifadə edirlər. Görünür, deputat Əlibala Məhərrəmzadə də bundan istifadə edərək heç ictimaiyyətə hansısa izahat verməyi belə düşünmür. Əslində isə, o dərhal buna izahat verməli idi. Bəzi Avropa ölkələrində deputatlara yalnız parlament divarları daxilində toxunulmazlıq verilir. Kənarda isə, onu seçən seçicilər kimi tamamilə bərabər hüquqa malikdir. Əgər sükan arxasındadırsa, təhlükəsizlik qaydalarına əməl etməlidir, dur işarəsinə tabe olmalıdır. Ancaq bizdə bu belə deyil. Səlahiyyət müddətində deputatların şəxsiyyəti toxunulmaz sayılır. Yalnız cinayət başında yaxalanarlarsa, bu halda onu saxlayan qurum ölkənin Baş Prokuroruna məlumat verir. Ondan sonra prosedura uyğun olaraq tədbirlər görülür və deputatlığa xitam verilir”.
Vidadi ORDAHALLI
