Avropanın Azərbaycanda “beyin yuyan” layihələri fiaskoya uğradı...
Azər Həsrət: “Onların məqsədi ölkəmizdə nüfuz agentlərinin sayını artırmaqdır”
Prezident İlham Əliyev yerli telekanallara müsahibəsində bildirdi ki, Avropa İttifaqının bir sıra proqramları dayandırılıb:
“Bütün tvininq proqramları dayandırılıb, Avropa İttifaqının leqal olan qrantlarının hamısı dondurulub. Qismən qeyri-leqal olanlar da var, əsasən Gürcüstandan keçməklə sərhəddən buraya pullar gətirilir, yenə də sorosçu strukturların əlaltıları vasitəsilə, amma əvvəlki kimi deyil, həm də bizim hüquq-mühafizə orqanları bütün bunları izləyir. Amma bizim leqal qrantlardan imtina etməyimizin səbəbi odur ki, onlar ərazimizdə gələcəyə, əsasən gənclərə istiqamətlənmiş öz platformalarının yaradılmasına yönəldilmişdi. Təəssüf ki, biz Azərbaycan gəncliyinin bəzi nümayəndələrinin xəyanət yolu tutduğunu görürük, açıq-aşkar satqınlıq, erməniçiliklə əməkdaşlıq – bu da NED (Аmerikanın “National Endowment for Democracy”) və EED (“Europеan Endowment for Democracy”) tərəfindən maliyyələşdirilən sözdə qrant proqramları vasitəsilə beyinlərin yuyulmasının nəticəsidir”.
Göründüyü kimi, Aİ-nin Azərbaycana yönəlik layihələri, xüsusilə gənclərlə bağlı layihələri fiaskoya uğrayıb. NED, EED tərəfindən maliyyələşən qrantlar, ölkədə gənclərin beyninin yuyulmasına yönəlmiş layihələr fiaskoya uğrayıb. Azərbaycan cəmiyyətinin mənəvi dəyərləri ilə bağlı müəyyən layihələrin dayandırılması və iflasa uğraması mühüm əhəmiyyət kəsb edir.
Maraqlıdır, Aİ-nin sözügedən layihələri Azərbaycanda niyə iflasa uğradı?
Sözügedən məsələ ilə bağlı fikirlərini baki-xeber.com-la bölüşən siyasi şərhçi Azər Həsrət bununla bağlı bir sıra məqamlara toxundu: “İstər Avropa İttifaqı olsun, istərsə də başqa qurumlar, həmçinin Prezidentin adını çəkdiyi fondlar müəyyən məqsədlər güdür. Onların məqsədi ölkəmizdə nüfuz agentlərinin sayını artırmaqdır. Mümkün qədər geniş şəbəkə yaradıb sonra da daxili siyasi proseslərə təsir etmək əsas məqsəddir. Ona görə də Azərbaycan dövləti vaxtında ayıq-sayıq davranaraq onların bu istəklərini faş etdi. Özü üçün müəyyən bir plan cızdı və o çərçivədə də zərərli fəaliyyətlərin qarşısı alındı. Burada gənclərlə bağlı məqamlar da təsadüfi deyil. Çünki bir qayda olaraq bu cür proqramlar gənclərlə bağlı olur. Yəni gənclər üzərindən gerçəkləşdirilir və demokratiya, insan haqları, açıq cəmiyyət adı altında gəncləri milli köklərindən qoparmağa hesablanır. Azərbaycan dövləti vaxtında bunu müəyyənləşdirə bilib, qarşısını alıb. Ona görə də onların məlum pozucu planları baş tutmadı. Məsələn, qonşu Gürcüstanda baş verən proseslər bir daha Qərbin planlarını ifşa etdi. Pozuculuq o həddə gəlib çatdı ki, ölkədə keçirilən seçkinin nəticələrini belə, Qərb tanımaqdan imtina edir. Yəni xalqın iradəsi ilə formalaşan hakimiyyət var, amma Qərb onu tanımaqdan imtina edir. Onlara kim dəstək verir? Ölkənin içindəki həmin şəbəkə. Həmin şəbəkənin bənzərini də Azərbaycanda qurmaq istəyirdilər, amma alınmadı. Əgər qurulsaydı, o şəbəkə Azərbaycanın daxili siyasətində çox ciddi rol oynaya bilərdi. Nəticədə cəmiyyəti qarşıdurmalara, fəlakətlərə sürükləyə bilərdi. Ancaq Azərbaycan dövlətinin bu məsələlərlə ciddi şəkildə məşğul olması onların planlarını pozdu. Gürcüstan isə vaxtında bunu edə bilmədiyinə görə, Aİ başda olmaqla özləri üçün çox geniş şəbəkə qurublar. İndi həmin şəbəkə legitim hakimiyyətə qarşı təxribatlar törədir”.
Vidadi ORDAHALLI
