Qarabağ Universiteti - dövlətçilik və elm tarixində yeni mərhələ...
Qarabağ tarixən həm dövlətçilik, həm də elm tariximizin inkişafında mühüm rol oynayıb. Mədəniyyətin, elmin tərəqqisinə hər zaman töhfə verən Qarabağda elm ocaqları da mövcud olub.
Qarabağda ənənəvi elm və təhsil ocaqları olub ki, orada yüzlərlə nəhəng şəxsiyyət yetişib. O məktəblərdə təhsil alanların əksəriyyəti sonradan elm sahəsində görkəmli elm xadimləri kimi özlərini təsdiqləyiblər.
Bildyimiz kimi, Prezident İlham Əliyev noyabrın 28-də Qarabağ Universitetinin yaradılması haqqında Sərəncam imzalayıb. Sərəncamda qeyd edilr ki, Xankəndi şəhərində yerləşən ali təhsil müəssisəsinin əsasında Azərbaycan Respublikası Elm və Təhsil Nazirliyinin tabeliyində “Qarabağ Universiteti” publik hüquqi şəxs (bundan sonra – Universitet) yaradılsın. Prezident İlham Əliyevin imzaladığı sərəncamda bildirilir ki, Qarabağ regionunda ali təhsil ənənəsi tarixən mövcud olmuşdur. “Burada ilk ali təhsil ocağı 1969-cu ildə Azərbaycan Pedaqoji İnstitutunun filialı kimi qurulmuş, 1973-cü ildən 1988-ci ilədək ali təhsil müəssisəsi kimi fəaliyyət göstərmiş, ərazilərimizin işğalı dövründə isə fəaliyyətini dayandırmışdır”.
Sənəddə daha sonra qeyd edilir ki, “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”na uyğun olaraq, həmin bölgələrin yenidən qurulması, dayanıqlı inkişafı və yüksək həyat səviyyəsinin təminatı üçün genişmiqyaslı bərpa-quruculuq işləri həyata keçirilir. Zəruri tədbirlərdən biri də “Qarabağ Universiteti”nin yaradılmasıdır. Qarabağda yüksəkixtisaslı kadrların hazırlığını həyata keçirən ali təhsil müəssisəsinin təşkili azadlığına qovuşmuş ərazilərin iqtisadi potensialı, eləcə də əmək bazarının tələbləri baxımından son dərəcə vacibdir.
Mütəxəssislər hesab edirlər ki, Qarabağ Universitetinin yaradılması ölkə elmində, müasir dövlətçilik tarixinin təbliğində xüsusi əhəmiyyət kəsb edir.
Xankəndidə Qarabağ Universiteti
Şübhəsiz ki, Xankəndidə Qarabağ Universitetinin yaradılması mühüm elmi, mədəni, tarixi, eyni zamanda da siyasi hadisədir. Bunun böyük elmi, tarixi, siyasi əhəmiyyəti olduğunu deyən mütəxəssislər hesab edirlər ki, bu ali müəssisəsinin fəaliyyətə başlamasından sonra biz burada daha böyük uğurlar görəcəyik. Mütəxəssislər deyirlər ki, universitetin nəzdində elmi araşdırmalar mərkəzinin də yaradılacağı şübhə doğurmur. Çünki Qarabağın tarixi yerindəcə həm öyrəniməli, həm də tədris edilməlidir. Əksər alimlər hesab edirlər ki, bu universitet fəaliyyətə başlayandan bir neçə il sonra həm də bir elmi mərkəz kimi özünü göstərəcək. Əlbəttə, biz gələcəkdə Qarabağ Universitetinin əhəmiyyətini, Azərbaycan faydalarını yaxından müşahidə edəcəyik. Bir sıra ictimai simalar və elm xadimləri, hətta siyasilər də qeyd edirlər ki, ümumiyyətlə, tarixən Qarabağda elmə-təhsilə xüsusi qayğı göstərilib və daim bu məsələ diqqətdə saxlanılıb. Bu universitetin ilk olaraq məhz Xankəndidə yaradılmasının isə xüsusi dəyəri olduğunu deyənlər az deyil. Ekspertlərin fikrincə, bu ali təhsil müəssisəsinin yaradılması regionda yüksək ixtisaslı kadrların hazırlanması baxımından olduqca əhəmiyyətli olmaqla yanaşı eyni zamanda bu bölgənin elm-təhsil ünvanına çevirilməsini şərtləndirəcək. Xankəndidə və Qarabağın başqa ərazilərində sürətlə məskunlaşdırma prosesində Xankəndi Universitetinin yaradılmasının xüsusi əhəmiyyət daşıdığını deyənlər hesab edir ki, bundan sonra gənclər daha çox qayıtmağa maraq göstərəcək.
Qarabağın tarixi Qarabağ Universitetində olduğu kimi tədris ediləcək...
Məlumdur ki, 30 il işğalda qalan, nəticədə tarix mədəniyyət, arxeoloji, təbiət abidələri məhv edilən, tarixi tərsinə yazılan Qarabağın tarixinin öyrənilməsi sahəsində də yeniliklər olacaq. Əlbəttə, Qarabağın tarixi Qarabağ Universitetində olduğu tədris ediləcək. 30 il ermənilər Qarabağın tarixini təhrif etməklə, yanlış təqdim etməklə məşğul olublar. Hətta dünyanın bəzi alimlərini də bu yalanlara alət etməyə nail olublar. Amma indi vəziyyət dəyişib və separatçıların kökü tamamilə qazınıb, onların əski parçasının yerində şanlı Azərbaycan bayrağı dalğalanır.
Tarixçilər hesab edirlər ki, Qarabağ universitetinin yaradılması milli dövlətçilik və elm tariximizdə yeni mərhələnin başlanğıcı deməkdir. Bu universitetdə dövlətçiliyin, elm və təhsilin təbliği, öyrənməsi və tədrisi özün hər cür şəraitinin yaradılacağını deyən ekspertlərin qənaətinə görə, Azərbaycanın suveren ərazisində belə bir universitetin yaradılması beynəlxalq aləmə də bir mesajdır ki, biz öz tarixi torpağımıza qayıtmışıq və ermənilərin saxtalaşdırdıqları tariximizi yenidən yazacağıq, yenidən təbliğ edəcəyik.
Millət vəkili Ceyhun Məmmədov Qarabağ Universitetinin tarixi və elmi əhəmiyyəti barədə bunları deyib: “Qarabağ Universitetində bütün sahələr üzrə mütəxəssislərin yetişdirilməsinə isə ayrıca önəm verməliyik. Geniş kampuslu müasir təhsil müəssisəsinin yaradılmasına ehtiyac var. Beynəlxalq səviyyəli bir universitetin yaradılması üçün dövlət başçısı İlham Əliyev hökumətə zəruri tapşırıqlar verib. İnanırıq ki, bu tədbirləri sürətlə həyata keçirməklə bir neçə dildə fəaliyyət göstərəcək universtitet yaradılacaq, xarici ölkələrdən də bu ali məktəbə tələbələr cəlb ediləcək.
Bu gün hər bir azərbaycanlının ürəyi Qarabağla döyünür. Əminəm ki, gənclər Qarabağ Universitetində təhsil almaq istəyəcəklər, çünki hər birimizin istəyi Qarabağın azad edilməsi idi. Arzumuza çatmışıq və çox önəmli mərhələyə daxil olmuşuq. Bu, yeni imkanlar və fürsətlər yaradacaq. Azərbaycan gəncləri isə Qarabağ Universitetinə daha böyük maraq göstərəcəklər. Xankəndidə müasir təhsil müəssisəsi yaradacağımıza inanıra”.
Bu öz ərazilərində suverenliyini bərpa edən Azərbaycan dövlətinin ən böyük uğurudur. Biz o ali məktəbə gənclərimizi cəlb etməklə bir daha dünyaya göstərəcəyik ki, Xankəndi, Qarabağ Azərbaycanın tarixi torpağı, ayrılmaz hissəsidir. Qarabağ Universiteti də bu məsələdə önəmli missiya daşıyır, o dövətçiliyik və elm tariximizin yeni mərhələsinin ən vacib örnəklərindən biri kimi özünü göstərəcək...
İradə SARIYEVA
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
