Prezident Qazaxın azad olunmuş kəndlərinə xüsusi mütəxəssislər qrupu göndərdi...
Mübariz Göyüşlü: “Azərbaycan tərəfinin təhlükəsizliklə bağlı həyata keçirdiyi işlər onun qanuni və mənəvi haqqıdır”
“Şadam ki, biz bu kəndləri (Qazax rayonunun 4 kəndi) qaytarmaq üçün başqa metodlara əl atmalı olmadıq. Zənnimcə, son dörd ilin dərsləri, – hərçənd erməni tərəfindən onlar hələ tam dərk olunmayıb, – nəzərə alınır”. Bu fikirləri Prezident İlham Əliyev yanvarın 7-də yerli televiziya kanallarına müsahibəsində deyib.
Prezident qeyd edib ki, bunu, həmçinin təkcə delimitasiya üzrə deyil, həm də sərhədin demarkasiyası işində yaxşı ilk addım hesab edir: “Zənnimcə, bu elə bir nadir hadisədir ki, delimitasiya və demarkasiya demək olar ki, eyni vaxtda həyata keçirilir. Artıq həmin kəndlərə mütəxəssislərdən ibarət qrup ezam olunub. Orada erməni yaşayış məntəqələrinə yaxınlıq məsələsi və eskalasiya olacağı təqdirdə müəyyən təhdidlər var. Ona görə də mən tapşırıq verdim ki, bu kəndlərin sakinləri üçün mənzil fondunun tikintisi məqsədilə daha çox müdafiə olunan yer seçilsin, onların təhlükəsizliyi təmin edilsin. Çünki belə bir təcavüzkar qonşumuz olduğu üçün biz, ilk növbədə əhalimizin təhlükəsizliyi haqqında düşünməliyik”.
Prezident İ.Əliyevin dediyi kimi, Qazaxın 4 kəndinin delimitasiya prosesi ilə yanaşı, həmin yerlərin müdafiə, təhlükəsizlik məsələlərinin gücləndirilməsi məsələsi də önəmlidir.
“Biz nankor bir dövlətlə qonşu olduğumuz üçün təhlükəsizlik məsələsi hər zaman diqqətdə olmalıdır”
Mövzu ilə bağlı fikir bildirən Cross Media Təhlil Mərkəzinin analitiki, siyasi şərhçi Mübariz Göyüşlü “Bakı-Xəbər”ə şərhində bildirdi ki, Azərbaycan dövləti yalnız ərazi bütövlüyünü təmin etməyib, eyni zamanda, SSRİ dövründən miras qalan problemləri də həll edir: “Xüsusilə Ermənistanla şərti olaraq bəlli olan sərhədlərin delimitasiya və demarkasiyası həyata keçirilir. Biz bir güllə atmadan ərazilərimizi azad edirik. Bura Ağdam, Kəlbəcər, Laçın və Qazaxın kəndləri də daxildir. Önəmli məsələlərdən biri də həmin ərazilərin təhlükəsizliyinin təmin edilməsidir. Ölkə başçısı İlham Əliyev düzgün olaraq buyurur ki, bu ərazilər Ermənistan silahlı qüvvələrinə çox yaxın ərazidə yerləşir. Unutmaq lazım deyil ki, biz nankor bir dövlətlə qonşu olduğumuz üçün təhlükəsizlik məsələsi hər zaman diqqətdə olmalıdır. Azərbaycan dövləti bu məsələlərin icrasında çox böyük həssaslıq göstərir. Ermənilərin azərbaycanlılara qarşı bir neçə dəfə təcavüzü bizi məcbur edir ki, qabaqlayıcı tədbirlər alaq. Bu mənada, ölkə başçısı məlum məsələyə toxunub. Azərbaycan tərəfinin təhlükəsizliklə bağlı həyata keçirdiyi işlər onun qanuni və mənəvi haqqıdır”.
Günel CƏLİLOVA
