Ermənistanın biabırçılıqla üzləşməyən 2 dostu qaldı - Hindistan və Yunanıstan...
Şakir Ağayev: “Ermənistan öz dostlarını bir-bir itirir və onlar siyasi səhnəni biabırçılıqla tərk edirlər”
Ermənistanın yürütdüyü mövcud siyasətə dəstək verən ölkələr və dövlət rəhbərləri olub ki, artıq biz onların bir-bir kürsülərini tərk etdiyini görürük. Müşahidə olunan odur ki, Ermənistana havadarlıq edən, onun tərəfini tutan ölkələrin əksəriyyətində, necə deyərlər, vəziyyət “ruscadır”.
Ermənistan onlara güvənib Azərbaycana qarşı faşist siyasət yürüdüb, onlardan “ilhamlanıb” revanşizmdən əl çəkməyib. Amma məlum olduğu kimi, ədalətsizliyə dəstək verən o dövlətlərdə artıq biabırçılıqlar baş verib. Ermənistanı antisülh mövqeyi göstərməyə təşviq edən o ölkələrin daxilində elə vəziyyət yaranıb ki, indi Ermənistan heç yada da düşmür.
Prezident İlham Əliyev yanvarın 7-də yerli televiziya kanallarına müsahibəsində bir daha Ermənistan tərəfinə məsləhətlərini verib.
Sülh müqaviləsi ilə bağlı Azərbaycanın bütün şərtlərinin qəbul ediləcəyinə ümidvar olduğunu bildirən Prezident İlham Əliyev deyib ki, əgər Ermənistana sülh müqaviləsi lazım deyilsə, bizə də lazım deyil. Bu imzalanmadan da biz yaşaya və öz siyasətimizi apara bilərik.
Ermənistan tərəfinə hər şeyi, o cümlədən dünyadakı geosiyasi dəyişiklikləri yaxşı ölçüb-biçməyi məsləhət görən Azərbaycan Prezidenti əlavə edib: “Onların yaxın dostları siyasi səhnədən biabırçılıqla silinirlər. Bax, dünən xəbər gəldi ki, Ermənistanın və Paşinyanın yaxın dostu cənab Trüdo da vəzifədən getməli oldu. Həmin bu ölkə ki, İkinci Qarabağ müharibəsi dövründə və ondan sonrakı dövrdə qatı anti-Azərbaycan mövqeyində idi, heç Fransadan çox da uzağa getmir. Fransaya gəldikdə, indi orada siyasi səhnədə nələr baş verir? Hər kəs özü görür”.
Prezident tamamilə haqlıdır. Ermənistanın yaxın dostlarından çoxu öz cəzasını aldı. Məsələn, Suriyada Əsəd rejimi məhv oldu, Fransada aləm qarışıb, daxili vəziyyət çox gərgindir. Kanadanın baş naziri Castin Trüdo istefa verib.
Bayden hakimiyyəti itirib, prezidnetlik kürsüsünü tərk edir. Azərbaycan Rusiyanı neytrallaşdırdı. Daha Rusiya Ermənistanın dostu deyil. İndi yalnız Ermənistanın dostu kimi Hindistanla Yunanıstan qalıb. Bu yaxınlarda açıqlama verən erməni “öncəgörənin” sözlərinə insansaq, 2025-ci ildə Yunanıstanda dövlət çevrilişi gözlənilir. Hindistanla Yunanıstanın başına nələr gələcəyini də zaman göstərəcək.
Prezidentin də dediyi kimi, Ermənistanla dostluq edən ölkələrin əksəriyyəti cəzalandırılıb.
“O iki dövlətin də mövqeyi dəyişərsə, Ermənistan meydanda tək qala bilər, çünki onları dövlət maraqları yox, şəxsi maraqlar birləşdirir”
“Novoye vremya” qəzetinin baş redaktoru Şakir Ağayev “Bakı-Xəbər”ə şərhində bildirdi ki, axırda Ermənistan meydanda tək qalacaq, çünki proses ona doğru gedir. “Azərbaycan Prezidenti müsahibəsində haqlı olaraq vurğulayıb ki, Ermənistanın dostları yavaş-yavaş sıradan çıxır. Bəli, Bəşər Əsəd rejimi çökdü, Kanadanın baş naziri istefa verdi. Təbii ki, Fransanın daxilindəki siyasi vəziyyət artıq dəhşətli şəkil almaqdadır. Bunlar nəyi göstərir? Bu bir daha sübut edir ki, münasibətlər şəxsi maraqlar müstəvisində deyil, milli dövlətçilik maraqları üzərində qurulmalıdır. Bir dövlət başçısı başqa bir dövlətə təzyiq vasitəsi olmamalıdır, başqa bir regiona müdaxilə üçün o dövlətdən, o dövlətin başçısından alət kimi istifadə edilməməlidir. Çünki dövlətin maraqları elə qorunmalıdır ki, səni müdafiə edən, sənlə münasibətdə olan dövlətləri onların rəhbərləri yox, o dövlətlərin dövlət maraqları birləşdirsin. İndi bir Yunanıstan və Hindistan qalıb, sabah onların da maraqları Ermənistanla üst-üstə düşməsə, hesab edirəm ki, bu ölkələrin də mövqeyi dəyişə bilər. O iki dövlətin də mövqeyi dəyişərsə, Ermənistan meydanda tək qala bilər, çünki onları dövlət maraqları yox, şəxsi maraqlar birləşdirir”.
Ş.Ağayev bildirdi ki, dövlət başçısı dövlətini heç bir dövlətin, heç kimin alətinə çevirməməlidir, aparılan siyasət yalnız dövlətin və xalqın maraqlarını əks etdirməlidir. “Bu ona xidmət etməlidir ki, kimin hakimiyyətdə olmasından asılı olmayaraq, o dövlət üçün heç vaxt təhlükə yaranmasın. Amma Ermənistanda tam fərqli münasibətlərdir. Bu gün üçün Ermənistanla münasibət ondan bir alət kimi istifadə olunmaq üçündür. Eyni zamanda Ermənistandan alət kimi istifadə edən dövlətlərdə hakimiyyət dəyişikliyi olarsa, təbii ki, o dövlətlərin yeni rəhbərlərinin Ermənistana münasibətini dəyişir”.
Ş.Ağayev qeyd etdi ki, Suriyada hakimiyyət dəyişikliyindən, Bəşər Əsəd rejiminin çöküşündən sonra Ermənistan əməlli-başlı əndişəyə düşdü. Bu gün isə Fransada, Kanadada yaşanan siyasi problemlərin Ermənistanın qanadlarının qırılması demək olduğunu deyən Ş.Ağayev hesab edir ki, belə getsə, o, Hindistanı da, Yunanıstanı da itirə bilər. Ekspertin fikrincə, çünki bu əlaqələr şəxsi maraqlara söykəndiyi və dövlətçilik maraqlarına əsaslanmadığı üçün bu baş verə bilər. “Ermənistan öz dostlarını bir-bir itirir və onlar siyasi səhnəni biabırçılıqla tərk edirlər. O biri dostlarının da eyni aqibətlə üzləşəcəyi istisna deyil”-deyə Ş.Ağayev vurğuladı.
İradə SARIYEVA
