Uşaq yazıçısı Gülzar İbrahimova Kürdəmirdə oxucularla görüşdü - FOTO
Mərkəzi Aran Regional Mədəniyyət İdarəsi və Kürdəmir rayon MKS-nın təşkilatçılığı ilə Kürdəmir şəhər T.İsmayılov adına 1 №-li və Qarabucaq qəsəbə tam orta məktəblərində uşaq yazıçısı, AYB-nin Prezident təqaüdçüsü Yasamal rayon Mərkəzi Kitabxanasının Fəxri oxucusu Gülzar İbrahimova ilə görüş keçirildi.
Tədbirin keçirilməsində məqsəd uşaqlara mütaliə vərdişlərinin yaradılması və kitabla uşaq arasında xoş münasibət yaratmaq olub. Hər iki tədbir yüksək səviyyədə keçdi. Tədbir iştirakçıları sevdikləri yazıçı Gülzar İbrahimovanı alqışlarla qarşılayıblar. Müəllifin şeirlərini söyləyib, əsərlərindən səhnəciklər göstəriblər, sonda isə müəllifin sözlərinə yazılmış mahnılar ifa ediblər. Yazıçı G.İbrahimova kürdəmirlilərə yenicə yazdığı “Kürdəmirin sirri” nağılını hədiyyə etdi.
1 №-li tam orta məktəbin direktoru Vüqar Nəsirov, Qarabucaq qəsəbə orta məktəbin direktoru Nizam İsmayılov, Kürdəmir rayon MKS-nin direktoru Valeh Feyzullayev, Qarabucaq qəsəbə kitabxana filialının müdiri Fəqan Qasımov yazıçıya səmimi görüşlərə görə təşəkkür edib, ona yaradıcılıq uğurları arzuladılar.
Yazıçı G.İbrahimova uşaqlara hədiyyələr verdi, yeni yazdığı kitablarını Mərkəzi Kitabxanaya, Qarabucaq qəsəbə kitabxana filialına və məktəb kitabxanalarına hədiyyə etdi.
Görüşlərdən sonra yazıçı Kürdəmir rayon Mərkəzi Kitabxanasında və Qarabucaq qəsəbə kitabxana filialında oldu.
Qarabucaq qəsəbə tam orta məktəbinin istedadlı şagirdləri şeir yazmaqla bağlı Gülzar İbrahimovadan dəyərli məsləhətlər aldılar.
Sonda xatirə fotoları çəkildi.
İradə SARIYEVA
