Makron COP29 vaxtı hətta bu namərdliyə də əl atdı...
Ceyhun Məmmədov: “Bu, Makronun hansı səviyyənin, şüurun, mədəniyyətin sahibi olduğunu göstərir”
Həmkarlarımdan aldığım məlumata görə, Fransa Prezidenti şəxsən onlara zəng edərək, Bakıya getməməyi tövsiyə edirmiş. Bu sözləri Prezident İlham Əliyev yerli televiziya kanallarına müsahibəsində deyib.
“Daha bir gözləmədiyimiz problem COP29-u siyasi motivlər səbəbindən boykot etmək cəhdləri idi. Bu, olduqca gözlənilməz idi. Hesab edirəm ki, bu tədbirə ev sahibliyi etmiş heç bir ölkə bu dərəcədə müqavimətə rast gəlməmişdir. Lakin biz bunun da öhdəsindən gələ bildik. Boykot uğursuz oldu. Baxmayaraq ki, bəzi ölkələr, xüsusilə də Fransa əlindən gələni edirdi ki, tədbiri gözdən salsın. Həmkarlarımdan aldığım məlumata görə, Fransa prezidenti şəxsən onlara zəng edərək Bakıya getməməyi tövsiyə edirmiş. Yəni liderlərin buraya səfər etmələrinin qarşısını almaq üçün hətta belə vasitəyə də əl atılmışdır. Lakin bu da uğursuz oldu. Səksən dövlət və hökumət başçısı Bakıya səfərə gəldi və bu, bir daha Azərbaycanın etibarlı tərəfdaş olduğunu nümayiş etdirdi”, - dövlət başçısı bildirib.
Göründüyü kimi, Makron COP29 dönəmində bütün çirkin metodlara əl atıb ki, Azərbaycana zərbə vursun.
“Fransa bütün platformalarda çalışır ki, Azərbaycana zərər vursun”
Sözügedən məsələni “Bakı-Xəbər”ə şərh edən millət vəkili Ceyhun Məmmədovun fikrincə, bu, Makronun əsl simasını bir daha ortaya qoyur: “Fransa uzun müddətdir ölkəmizə qarşı təxribatlarını davam etdirir. Bu gün biz davamlı olaraq Makronun Ermənistanın haqsız mövqeyini dəstəklədiyini görürük. Bu gün Fransa tərəfindən Ermənistanın silahlandırıldığını müşahidə edirik. Prezidentin qeyd etdiyi kimi, Fransa heç cür Azərbaycandan əl çəkmək istəmir. Gör Makron nə qədər səviyyəsiz bir dövlət başçısıdır ki, ayrı-ayrı dövlət başçılarına zəng edərək onları Azərbaycana getməməyə çağırıb. Ona görə də bu, Makronun səviyyəsinin göstəricisidir. Yəni bu insanın hansı səviyyənin, şüurun, mədəniyyətin sahibi olduğunu göstərir. Fransa bütün platformalarda çalışır ki, Azərbaycana zərər vursun. Biz bunu Vətən müharibəsi və ondan sonrakı dövrlərdə dəfələrlə müşahidə etmişik. Fransa çox çalışdı ki, BMT Təhlükəsizlik Şurası Azərbaycana qarşı qətnamə qəbul etsin. Bütün bunlar bir daha Fransanın Azərbaycana qarşı təxribatçı mövqedən çıxış etdiyini sübut edir. COP29-la bağlı Makronun əməlləri onu göstərir ki, özünü güclü super dövlət kimi təqdim etməyə çalışan Fransanın dövlət başçısı hansı düşüncəyə, səviyyəyə, təfəkkürə, baxışa malikdir. Bir ölkə liderinin belə açıqlamalar verməsi, bu cür mövqe nümayiş etdirməsi onun hansı “qabiliyyətə” malik olduğunu göstərir. Bir ölkəyə qarşı nə qədər qərəzli olasan, ədalətsiz olasan ki, ayrı-ayrı dövlət başçılarına zəng edib onları tədbiri boykot etməyə çağırasan. Ancaq Makronun bütün pozucu cəhdləri fiaskoya uğradı və tədbir yüksək səviyyədə keçirildi. Bununla Azərbaycan növbəti bir tədbiri uğurla, qətiyyətlə, prinsipiallıqla başa vurdu. Fransanın etdiyi pisliklər özünə qaldı”.
Vidadi ORDAHALLI
