Tramp Qərbdə siyasi-mənəvi böhrana qarşı - Azərbaycan Prezidentindən dəstək…
Tural İsmayılov: “Bu gün Qərbin dünyaya sırıdığı saxta dəyərlər artıq çökmək üzrədir”
“İndi heç kimə sirr deyil ki, yeni dünya nizamı formalaşdırılır. Hesab edirəm ki, biz bu prosesin başlanğıcındayıq, bir çox boşluqlar yaranmaqdadır və yaranacaq”. Bu fikirləri Prezident İlham Əliyev yerli televiziya kanallarına müsahibəsində səsləndirib.
İkinci Dünya müharibəsindən sonra yaranmış sistemin artıq öz potensialını itirdiyini bildirən dövlət başçısı vurğulayıb ki, bunu bir çox yerlərdə gedən proseslər, münaqişələr, müharibələr və sair hadisələr göstərir. “Eyni zamanda, aparıcı Qərb ölkələrində siyasi və mənəvi böhran da göz qabağındadır. Yəni bu gün Qərbin üzləşdiyi vəziyyəti ən çox tənqid edən Qərbin aparıcı ölkəsinin seçilmiş prezidentidir, haqlı olaraq tənqid edir. Çünki bu sistem artıq tükənib”.
“Azərbaycan Qərb müstəmləkəçiliyinin qarşısında ən böyük müqavimət göstərən ölkələrdən biridir”
Məsələ ilə bağlı fikir bildirən siyasi şərhçi Tural İsmayılov “Bakı-Xəbər”ə şərhində bildirdi ki, bu gün Qərbin dünyaya sırıdığı saxta dəyərlər artıq çökmək üzrədir. Qərb təşkilatlarının içərisində çox ciddi çöküşlər yaşanır: “Qərbin siyasi sisteminin içərisində ciddi mənəvi böhran vəziyyəti hökm sürür. Belə olan təqdirdə də dünyadakı siyasi sistemlərin daha da zədələndiyini görürük. Qərb ölkələri tərəfindən bəzi xalqlara, dövlətlərə qarşı qəbuledilməz haqsızlıqlar davam edir. Bunun da nəticəsində bir çox problemlər həll olunmamış olaraq qalır. Hesab edirəm ki, Qərb siyasi sistemlərinin çöküşü ilə bağlı ən yaxşı məsələni Prezident İlham Əliyev yerli telekanallara müsahibəsində deyib. Bu gün Azərbaycan Qərb müstəmləkəçiliyinin qarşısında ən böyük müqavimət göstərən ölkələrdən biridir. Bütün bunların davam etməyi ölkəmizin beynəlxalq əlaqələr sistemində möhkəmlənməsi deməkdir. Çünki bu gün Qərb havadarları bölgədə vəziyyətin daha da gərgin olmasına çalışır, dünyanı dağıdaraq özlərinin xaotik situasiyalarının dünyada sürməyinə şərait yaradır. Lakin ölkəmiz bütün bu hücumları vaxtında dəf edərək, özünün nə qədər böyük imkanlara malik olduğunu bütün dünyaya göstərmiş olur”.
Günel CƏLİLOVA
