Paşinyan qəbul etməsə, Azərbaycan bu məsələni gündəlikdən çıxarmayacaq...
Təbriz Musayev: “Ermənistan hakimiyyəti şərait yaratmalıdır ki, biz öz yurdlarımıza qayıdaq”
Yaxşı olardı ki, Ermənistanın baş naziri Qərbi Azərbaycan İcmasının nümayəndələrini qəbul etsin. Bildiyimə görə, onlar İrəvana da getməyə hazırdırlar. Bunu Prezident İlham Əliyev yerli televiziya kanallarına müsahibəsində deyib.
Qərbi azərbaycanlıların oradan əsassız qovulduqlarını vurğulayan dövlət başçısı əlavə edib ki, onların qayıtmaları üçün tam hüquqları var. “Ermənistan özünü bu gün Avropa demokratiyası yolu ilə gedən ölkə kimi təqdim edir. Qoy onu əyani şəkildə göstərsin”, - deyən Prezident, həmçinin vurğulayıb: “Bu məsələ gündəlikdən çıxmayacaq, o vaxta qədər ki, azərbaycanlılar təhlükəsizlik şəraitində Qərbi Azərbaycana, o cümlədən Qərbi Zəngəzura yerləşəcəklər”.
“Necə demokratdılar ki, indiyə qədər Qərbi Azərbaycandan deportasiya olunan azərbaycanlılarla...”
Sözügedən məsələni “Bakı-Xəbər”ə şərh edən İrəvan Azadlıq Təşkilatının sədri Təbriz Musayev hesab edir ki, Prezidentin qaldırdığı məsələ tamamilə əsaslıdır: “Ermənistandan 1987-ci ilin sonlarından başlayaraq bütün azərbaycanlılar qovuldular. Onların min bir əziyyətlə yığdıqları var-dövlət, əmlak orada qaldı. Qərbi Azərbaycanda yaşayan bütün azərbaycanlılar oradan qovuldu. Söhbət 1987-1991-ci illərdə deportasiya edilən 230 mindən çox azərbaycanlıdan gedir. İndi onların sayı 300 min nəfəri keçib. Azərbaycanlıların kompakt yaşadıqları kənd və qəsəbələrin təxminən 90 faizində yaşayış yoxdur. Ona görə də Ermənistan hakimiyyəti şərait yaratmalıdır ki, biz öz yurdlarımıza qayıdaq. Biz Ermənistan hökumətindən Qərbi azərbaycanlıların deportasiyasına görə üzr istəməyi, bizimlə dialoqa başlamağı, qayıdışa şərait yaratmağı, Azərbaycan xalqına məxsus olan mədəni irsin dağıdılması və təhrif edilməsi siyasətinə son qoymağı tələb edirik. Ermənistan borcludur ki, üzərinə götürdüyü öhdəlikləri yerinə yetirsin. Paşinyan və onun komandası ağız dolusu demokratiyadan danışır. Necə demokratdılar ki, indiyə qədər Qərbi Azərbaycandan deportasiya olunan azərbaycanlılarla dialoq qurmağa təşəbbüs göstərməyiblər? Ermənistan tərəfi bilməlidir ki, azərbaycanlılar öz yurdlarına qayıtmadan Qarabağ erməniləriinin geri dönməsindən söhbət gedə bilməz. Bütün bunlar paralel şəkildə olmalıdır. Üstəlik, Qarabağ ermənilərindən fərqli olaraq, Qərbi Azərbaycanda yaşayan soydaşlarımız aborigen xalqdır. Ermənilər isə Qarabağa Rusiya İmperiyası tərəfindən köçürülüb”.
Vidadi ORDAHALLI
