Fransanın “Sezarları” Makronun öz üstünə qaytarılacaq - Azərbaycanın yeni hədəfi...
Elşad Həsənov: “Azərbaycan yarana bilən istənilən təhdidi zərərsizləşdirəcək”
“Ermənistan silahlanmanı dərhal dayandırmalıdır”. Bu sözləri Prezident İlham Əliyev yerli televiziya kanallarına müsahibəsində deyib.
Ölkə başçısı deyib ki, biz bu məsələyə çox ciddi yanaşırıq: “Bir daha demək istəyirəm ki, biz, sadəcə olaraq müşahidəçi kimi buna tamaşa edəsi deyilik. Ermənistan silahlanmanı dərhal dayandırmalıdır. Ona silah verən Fransa və digər ölkələr o kontraktlara xitam verməlidir, ləğv etməlidir. Artıq Ermənistana göndərilmiş silahlar geri qayıtmalıdır. Bu bizim şərtimizdir. İndi kim bunu necə istəyir elə də qəbul etsin. Mən sözümü deyirəm, onlar da bilirlər, onların arxasında duranlar da bilirlər ki, əgər biz nəyisə deyiriksə, deməli, artıq bu məsələyə çox ciddi yanaşırıq”.
“Prezidentin silahlanma ilə bağlı xəbərdarlığı təkcə Ermənistana yox, həm də arxasında duran qüvvələrədir”
Sözügedən məsələ ilə bağlı fikirlərini “Bakı-Xəbər”lə bölüşən siyasi ekspert Elşad Həsənov hesab edir ki, bununla Prezident İlham Əliyev Ermənistan qarşısında konkret məsələ qoyub: “Bu o deməkdir ki, Ermənistanın silahlanması davam edə bilməz. Yəni müqavilələr dayandırılmalıdır, alınan silahlar geri qaytarılmalıdır. Bu, sözdə nəyə xidmət edir? Mənası odur ki, Azərbaycan Cənubi Qafqazda sülh və əminəmanlıq istəyir. Ancaq biz görürük ki, Ermənistanın arxasında duran qüvvələr – Fransa, Hindistan və digər ölkələr bu ölkəni silahlandırır. Ötən ilin aprelində Brüsseldə Ermənistan, ABŞ və Avropa İttifaqının üçtərəfli görüşündən sonra silahlanma növbəti mərhələyə qədəm qoydu. Ermənistanın silahlanması ortadadır. Bundan başqa, ABŞ-ın, beynəlxalq təşkilatların onlara ayırdığı pullar da silahlanmaya gedir. Nikol Paşinyan da çıxışlarında silahlanmaya haqq qazandırır. Bildirir ki, biz müdafiə qabiliyyətimizi artırmalıyıq və silahlanma bizim təbii haqqımızdır. Ancaq məsələ ondadır ki, Ermənistan daha çox hücum silahları alır, nəinki müdafiə xarakterli silahlar. Prezident Əliyevin silahlanma ilə bağlı xəbərdarlığı təkcə Ermənistana yox, həm də arxasında duran qüvvələrədir. Çünki Cənubi Qafqazın lider dövləti Azərbaycandır. Azərbaycanın güclü iqtisadiyyatı və ordusu var. Ən başlıcası isə, Prezidentin arxasında duran güclü xalqı var. Bu nöqteyi-nəzərdən Ermənistan siyasi liderləri bu xəbərdarlığa ciddi yanaşmalıdır. O cümlədən, soyuq başla olanları təhlil etməlidilər. Prezident Əliyev eyni zamanda bildirir ki, biz Cənubi Qafqazda müharibə olmasını istəmirik. Ancaq hələ ki, Ermənistan sülhlə bağlı konkret mövqe ortaya qoymur. O üzdən, Ermənistan konkret işə keçməlidir, əməli addımlar atmalıdır. Ermənistanın sürətlə silahlanması müharibəyə gətirib çıxara bilər. Azərbaycan yarana bilən istənilən təhdidi zərərsizləşdirəcək. Yəni biz bunu sonsuza qədər izləməyəcəyik. Dünyada dəyişən geosiyasi reallıqlar da bunu deməyə əsas verir. Ona görə də Ermənistan və onları himayə edənlər ağıllarını başlarına yığmalıdır”.
Vidadi ORDAHALLI
