Makronun aylarla hazırlaşdırdığı briqada Zelenskiyə ağır zərbə vurdu...
Üzeyir Cəfərov: "Bu məqalənin indi dərc edilməsi Tramp dönəmində Ukrayna ilə Rusiya arasında danışıqlar masasının qurulmasını hədəfləyir"
BBC yazır ki, “Anna Kiyev” - 155-ci Əlahiddə Mexanikləşdirilmiş Briqadası Ukrayna Silahlı Qüvvələrində nümunəvi briqadaya çevrilməli idi. "Onun hazırlanması və silahlanması ilə bütünlüklə Fransa hakimiyyət orqanları məşğul olurdu. Lakin bu bölmə Ukraynadakı təlimlərdən qayıtdıqdan sonra onun əslində döyüşə hazır olmadığı barədə söhbətlər başladı.
155-ci Mexanikləşdirilmiş Briqadadakı kritik vəziyyət barədə dekabrda hərbi bloger və Censor.Net nəşrinin baş redaktoru Yuri Butusov məlumat vermişdi. O, komandanlıq, silah-sursat, döyüşçülərin hazırlanması ilə bağlı problemlərdən, briqadanın hərbi qulluqçularının kütləvi şəkildə fərariliyindən danışıb. Onlardan bəzilərinin Fransada təlim zamanı qaçdığı iddia edilib.
Ali Radanın deputatı Maryana Bezuqlaya "Anna Kiyevskaya"nı hesabat məqsədləri üçün xüsusi olaraq yaradılmış “zombi briqadası” adlandırıb və sonra onun döyüşə hazır hissələri və texnikası başqa bölmələrə verilib.
Ukrayna Silahlı Qüvvələrinin Ali Baş Komandanı Aleksandr Sırski yanvarın 5-də 155-ci Mexanikləşdirilmiş Briqada ilə bağlı “həll edilməli olan problemli məsələlərə xüsusi diqqət yetirdiyini” bildirib. Hakimiyyətdən bu qalmaqala yeganə ictimai reaksiya budur.
Butusovun sözlərinə görə, prezident Vladimir Zelenski yanvarın əvvəlində Ali Baş Komandan qərargahında bu bölmədəki vəziyyətlə bağlı iclas keçirib və onu şəxsi nəzarətinə götürüb.
Düzdür, Ukraynanın BBC xidmətinin Prezident Aparatındakı mənbəsi bunu təkzib edir. Onun sözlərinə görə, bu məsələ ilə bağlı Qərargahın iclası olmayıb".
BBC-nin “Anna Kiyev” barədə dərc etdiyi geniş məqalədə qeyd edilir ki, Fransa hökumətinin təlim keçdiyi və silahlandırdığı briqadanın 30 faizi fərarilik edib. Üstəgəl, nəşr qeyd edir ki, Ukraynanın Kurskdakı uğursuzluğunun da baisi 155-ci Əlahiddə Mexanikləşdirilmiş Briqada olub.
Məqaləni baki-xeber.com-a şərh edən hərbi ekspert Üzeyir Cəfərov bildirdi ki, bu cür materialların dünyanın aparıcı kütləvi informasiya vasitələrində - BBC-də peyda olmasını, sözsüz ki, təsadüfi hadisə saymaq olmaz: "Bu məqalə məqsədyönlü şəkildə mediada tirajlanıb. Əlbəttə, hamıya bəllidir ki, 155-ci Briqada Ukrayna silahlı qüvvələrinin ən məşhur və nümunəvi hərbi hissələrindən biridir. Böyük Britaniyanın BBC kimi dünyaca nəşhur bir media qurumunda bu məqalənin verilməsi bir növ Ukrayna rəhbərliyinə xatirlatmadır ki, sülhə hazırlaşmaq lazımdır. Bununla Ukrayna rəhbərliyinə demək istəyirlər ki, əgər sənin ən öncül hərbi hissəndə fərarilik baş baş alıb gedirsə, digər sıravi hərbi hissələrdən nə gözləmək olar?
Ümumiyyətlə, dünyada baş verən bu cür müharibələrin tarixinə baxanda biz hər zaman fərarilik hallarının baş verməsinin şahidi oluruq. Bəzi dövlətlər bunu etiraf edir, bir çöxları bunun üstündən sükutla keçir, belə halları gizlətməyə çalışanlar da tapılır.
Əldə beş barmağın hamısı eyni boyda olmadığı kimi, insan övladının da hamısı fizio-psixoloji varlıq olaraq eyni deyil. İnsanların içərisində cəsur, qorxmaz, düşmənin üzərinə getməyi bacaranlar da, qorxaq, həmişə panikada olan əsgərlər də var. Ona görə, 155-ci Briqadada baş verənlər xoşagəlməz hadisə olsa da, müharibə şəraitinə xas əlamətdir. Biz eyni halları Rusiya ordusunda da müşahidə edirik. Rusiyada cəzaçəkmə müəssisələrindən, küçədən, bazardan insanlar silah altinda cəbhəyə aparılır. Həmin adamların əksəriyyəti fürsət düşən kimi ya qəsdən əsir düşür, ya da fərarilik edirlər.
Bu məqalənin indi dərc edilməsi Tramp dönəmində Ukrayna ilə Rusiya arasında danışıqlar masasının qurulmasını hədəfləyir. Bu həmin planın tərkib hissələrindən biridir. Bu gün sözügedən məqalədə Ukrayna ordusundan danışılır, yaxın günlərdə isə Rusiya ordusundakı çatışmazlıqlardan bəhs edən başqa bir məqalə dərc ediləcək. Ona görə də biz belə materialların dərc edilməsinə təəccüblənməməliyik.
Bunu böyük hadisə kimi təqdim edirlər. Amma mən burada qeyri-adi heç nə görmürəm. Müharibə varsa, fərari də var. İstənilən orduda belə hadisələr baş verir, lakin bəziləri bunu gizlədir, bir çoxkarı isə gizlədə bilmir. Bundan isə böyük dövlətlər öz məqsədlərı üçün istifadə edirlər".
Dəniz NƏSİRLİ
