Azərbaycan delimitasiyanın növbəti ünvanını İrəvana təklif etdi - ermənilər razılaşıb...
Ramil Məmmədli: “Ermənistanın Azərbaycanın delimitasiya təklifləri ilə razı olması ehtimalı böyükdür”
“Bizim metodologiya üzrə yanaşmamız var, onu erməni tərəfinə təqdim etmişik”. Bu sözləri Prezident İlham Əliyev yerli televiziya kanallarına müsahibəsində deyib.
Ölkə başçısının sözlərinə görə, proses maksimum şəffaf oldu, həmçinin ermənilərin yeni himayədarları tərəfindən müsbət qarşılandı: “Çünki demarkasiya prosesi də aparıldı. Əlbəttə, bu, sərhədin bütün perimetri üzrə dəqiqləşdirmə üçün təkan verməlidir. Delimitasiya və demarkasiya üzrə Ermənistan və Azərbaycan komissiyalarının razılaşdırdığı protokol elə ondan xəbər verir ki, sərhədin dəqiqləşdirilməsi zamanı bir çox amillər – təhlükəsizlik, kommunikasiyalar, yaşayış məntəqələri, tarixi, ekoloji amillər və sair nəzərə alınmalıdır. Yəni, Ermənistan ilə Azərbaycan arasında mövcud olan şərti sərhəd, birincisi, ehkam deyil. Bizim mövqeyimiz həmişə ondan ibarət olub ki, bunun üçün mənim dediyim bir çox bu və ya digər amillərin dəqiqləşdirilməsi tələb olunur. Amma bildiyim kimi, bu ay, hər halda bizim təşəbbüsümüzlə, təklifimizlə delimitasiya məsələsini davam etdirmək üçün delimitasiya üzrə Azərbaycan və Ermənistan komissiyalarının növbəti görüşü olmalıdır. Bizim metodologiya üzrə yanaşmamız var, onu erməni tərəfinə təqdim etmişik. Mənə məruzə etdilər ki, aldığımız şifahi cavab ondan xəbər verir ki, onların tərəfindən xüsusi etiraz yoxdur”.
Bütün bu deyilənlərin fonunda belə demək olarmı ki, artıq delimitasiyanın növbəti mərhələdə sərhədin hansı hissələrində aparılması ilə bağlı Azərbaycan konkret təkliflər verib, metodologiyanı təqdim edib və ermənilər də bunu qəbul ediblər? Belə bir nəticə çıxarmaq olarmı?
“Artıq onlar da anlayırlar ki, proseslərin uzadılmasının anlamı yoxdur”
Sözügedən məsələni “Bakı-Xəbər”ə şərh edən hərbi ekspert Ramil Məmmədlinin fikrincə, Ermənistanın Azərbaycanın delimitasiya təklifləri ilə razı olması ehtimalı böyükdür: “Bu, Ermənistan hakimiyyətindən verilən bəzi siqnallarda da özünü göstərir. Artıq onlar da anlayırlar ki, proseslərin uzadılmasının anlamı yoxdur. Ötən il Azərbaycan-Ermənistan sərhədinin 13 kilometri delimitasiya və demarkasiya edildi. Bu onu göstərir ki, siyasi istək olarsa, delimitasiya prosesini sürətləndirmək mümkündür. Bu arada, Ermənistan baş naziri Nikol Paşinyan yanvarda iki ölkənin delimitasiya komissiyasının görüşünün planlaşdırıldığını təsdiq edib. O əminliklə bildirib ki, 2024-cü ildə demarkasiyanın müsbət təcrübəsi sakit, iş mühitində inkişaf etdirilməlidir və Ermənistan bu cür işə sadiqdir. Məsələnin digər tərəfi ondan ibarətdir ki, gələn il Ermənistanda parlament seçkiləri keçiriləcək. Paşinyan indidən buna hazırlaşır. Baxmayaraq ki, onun ictimai reytinqi xeyli aşağı düşüb. Paşinyan fərqindədir ki, delimitasiya prosesi uzansa, ortada ciddi nəticələr olmasa, bu, mütləq onun əleyhinə işləyəcək və ölkədə keçirilən seçkilərdə özünü göstərəcək. Bu baxımdan güman edirəm ki, Ermənistan tərəfi delimitasiya ilə bağlı Azərbaycanın şərtləri və metodologiyası ilə hesablaşacaq”.
Vidadi ORDAHALLI
