Bayden İsrail-Həmas savaşına mövqeyini dəyişməyə məcbur oldu…
Rəşad Bayramov: “Baydenin loyallıq nümayiş etdirməsi ölkənin təhlükəsizliyini qorumaq zərurətindən irəli gəlir”
ABŞ prezidenti Co Bayden girovları azad etməyə vaxt tapması üçün İsrail və Həmas arasında hərbi əməliyyatların dayandırılmasının tərəfdarı olduğunu bildirib:
"Düşünürəm ki, bizə fasilə lazımdır. Pauza məhbusları azad etmək üçün vaxt deməkdir".
O, tədbirdə iştirak edənlərdən birinin “Mənə elə indicə atəşkəs çağırmağınız lazımdır” deməsindən sonra açıqlama verib:
"Mən sizin emosiyalarınızı başa düşürəm. Bu, israillilər üçün inanılmaz dərəcədə çətindir. Müsəlman dünyası üçün inanılmaz dərəcədə çətindir".
ABŞ prezidenti həmçinin qeyd edib ki, Nümayəndələr Palatası yardımı yalnız İsrailə yönəltməyə qərar verərsə, qanun layihəsinə veto qoyacaq. Bu barədə Ağ Evin rəsmi saytında bildirilir.
Bütün bunlar Baydenin hadisələrə münasibətdə dəyişməyə meylli olmasını deməyə əsas verirmi?
Politoloq Rəşad Bayramov “Bakı-Xəbər”ə açıqlamasında bildirdi ki, ABŞ Prezidenti Co Bayden əvvəlki çıxışları ilə Yaxın Şərqdə savaşın fitilini alovlandırdı: “Məqsəd Böyük Ortadogu Projesinin daha bir mərhələsini həyata keçirməkdir. Böyük Ortadogu Projesi Nil çayından Fərata kimi “Böyük İsrail dövlətini” qurmaqdır. Bu mərhələdə Şərqi Aralıq dənizi sahillərində yerləşən Qəzzanı tamamilə fələstinlilərdən təmizləmək, daha sonra isə Suriya və İraqda PKK terror təşkilatı üçün “Böyük Kürdüstan” qurma planı mövcuddur. ABS 20 min TİR silah-sursatı elə-belə PKK-ya peşkəş etməyib. Qurulması planlaşdırılan terror dövlətini ilk olaraq ABŞ və İsrail tanıyacaq. Təbii ki, plan baş tutarsa. Planın qarşısında öz ərazi bütövlüyü, eyni zamanda könül coğrafiyasini qorumaq istəyən Türkiyə və öz mənafelərini saxlamağa çalışan Rusiya var. Yəni Qəzzada baş verənlər birbaşa qardaşımız Türkiyəni təsirləndirir. Proseslərin gedişi göstərdi ki, Bayden mövqeyini yumşaltmağa məcbur oldu. Çünki müsəlman dünyasının İsrailin addımlarına mövqeyi sərt oldu. Ona görə də, Bayden balanslı münasibət sərgiləməyə başladı. İsrailin Qəzzada hərbi əməliyyatları başlayandan bəri ABŞ-ın hüquq-mühafizə orqanları yəhudi, müsəlman və ərəb amerikalılara qarşı təhdidlərin sayının artdığını qeyd edib. Bu həftə Ağ Ev Amerika universitetlərində yəhudilərə qarşı insidentlər barədə xəbərlərdən narahat olduğunu bəyan edib.
ABŞ-ın bəzi universitet şəhərciklərində, eləcə də Nyu Yorkda İsrail və fələstinlilərin tərəfdarı olan qruplar arasında gərginliyin yaranması universitet rəsmilərini təhlükəsizlik tədbirlərini gücləndirməyə vadar edib.
Yəhudi tələbələrə, icmalara və institutlara qarşı yönəlmiş nifrət ABŞ-da və bütün dünyada antisemitizmin onsuz da mövcud yüksək səviyyəsinin artmasına imkan yaradır.
Son həftələrdə ABŞ-ın böyük universitetlərində fələstinlilərin dəstəkləndiyi və İsrailin tənqid edildiyi etirazlar baş verib.
ABŞ-ın Milli Təhlükəsizlik Şurasının strateji kommunikasiyalar üzrə direktoru Con Kirbi ABŞ administrasiyasının antisemitizm çıxışlarına qarşı sayıqlıq göstərdiyini deyib. Bu baxımdan da Baydenin loyallıq nümayiş etdirməsi ölkənin təhlükəsizliyini qorumaq zərurətindən irəli gəlir”.
Məhəmmədəli QƏRİBLİ
