Zelenskinin İrəvana səfəri təbliğatları ermənilərin işinə yaradı…
Yeganə Hacıyeva: “Yalana söykənən bu cür təbliğat sabun köpüyünə bənzəyir və tez də partlayır”
Erməni rəsmiləri uzun müddət Zelenskinin Ermənistana səfər edəcəyini təbliğ etdilər. Səfərin martın əvvəlində reallaşacağını bildirirdilər. Səfər olmadı, amma bunlar buna dair heç bir izahat vermədilər.
Maraqlıdır, Zelenskinin səfərinin baş tutmayacağını bilə-bilə erməni rəsmiləri niyə talan təbliğat aparırdılar və bununla hansı nəbzi yoxlamaq istəyirdilər?
Ukrayna Prezidenti Vladimir Zelenskinin 4 martda İrəvana gözlənilən səfərinin ləğv edilməsi ilə bağlı xəbəri rəsmi dairələr deyil, onlara yaxın olan “Baqramyan” Teleqram kanalı yayıb.
Bildirilib ki, Ermənistan Zelenskinin “regiona səfər edəcəyi təqdirdə” İrəvana gəlməsinə razılıq verib. Region səfəri baş tutmadığı üçün İrəvan səfəri də ləğv edib. Ukrayna Prezidentinin mətbuat katibi Sergey Nikiforov Zelenskinin Ermənistana səfərinin ləğv edilməsi barədə məlumatı şərh edərkən deyib ki, Ukrayna heç vaxt Prezident Vladimir Zelenskinin Ermənistana səfər edəcəyi haqda məlumat yaymayıb.
O bildirib ki, Kiyev heç vaxt belə səfər barədə məlumat verməyib, ona görə də Prezident Ofisi səfərin ləğvi barədə heç nə deyə bilməz.
Qeyd edək ki, Zelenskinin 4 martda İrəvana səfər edəcəyi barədə məlumatı Ermənistan XİN təkzib etməmişdi. Daha sonra isə Nikol Paşinyanın Münhendə olarkən buna “regional səfər olacağı halda razılaşdığı” bildirildi.
Politoloq Yeganə Hacıyeva “Bakı-Xəbər”ə açıqlamasında bildirdi ki, Ukrayna mövzusu populyar olduğu səbəbindən Ermənistanın məhz Zelenskinin adı ətrafında məlumatlar tirajlaması təsadüfi deyil: “Məqsəd reklam olunmaqdır. Hazırda orada gedən ədalətsiz müharibəyə görə bütün beynəlxalq diqqət Ukraynanın üzərindədir. Ermənistanla yanaşı, Paşinyan ailəsi də neçənci dəfədir ki, bundan öz piarları üçün istifadə edir. Paşinyanın həyat yoldaşı Anna Akopyanın Ukraynaya yardım göndərməsi ətrafında ciddi piar aparılıb. Dünya liderlərinin həyat yoldaşlarının Ukraynada keçirilən toplantısında Anna Akopyan iştirak edib və orada Xankəndidə baş verənlərlə bağlı yalanlar səsləndirib. Yəni həmin tədbirdən bir platforma olaraq istifadə edib. Ardınca biz bəzi beynəlxalq tədbirlərdə Paşinyanın necə qaçaraq gedib Zelenskinin yanında durduğunun şahidi olmuşuq. Səfərlə bağlı dövriyəyyə buraxılan yalan məlumatı da bu qəbildən saya bilərik. Bununla həm də Rusiya ilə münasibətlərinin arzuolunan səviyyədə olmadığını nümayiş etdirmək istəyir. Ermənistan belə addımları ilə özünə dividend qazandığını düşünür. Ancaq özlərini biabır etmiş oldular. Çünki yalana söykənən bu cür təbliğat sabun köpüyünə bənzəyir və tez də partlayır”.
Səfərin baş tutmamasına ən çox sevinən isə “Ermənistan” fraksiyasından olan müxalifətçi deputat Areqnaz Manukyan olub. Onun sözlərinə görə, Ukrayna Prezidentinin Ermənistana səfəri İrəvanla Moskva arasında onsuz da bərbad olan münasibətləri daha da korlayacaqdı:
"Xarici qüvvələr Rusiyaya qarşı ikinci cəbhə açmaq üçün V.Zelenskinin Ermənistana səfərini təşkil etmək istəyirdi. Bu səfər baş tutsaydı, Ermənistanla Rusiya arasında münasibətlərdə dönüş nöqtəsi olacaqdı. Baş nazir Nikol Paşinyan özünü erməni tarixində fədakar biri kimi göstərməyə çalışır. Paşinyan Zelenski və ya Saakaşvili olmaq istəyir”.
Xatırladaq ki, V.Zelenskinin mümkün səfəri ilə bağlı xəbərlər Baş nazir Nikol Paşinyanın Almaniya və Fransaya son səfərləri zamanı Rusiyaya qarşı tənqidlərini artırdıqdan sonra yayılıb. Xüsusilə Paşinyan ilk dəfə Rusiyanın Ukraynaya müdaxiləsini həmin səfərdə pisləyib.
Məhəmmədəli QƏRİBLİ
