Ali və orta məktəblərdə rus dili müəllimləri çatışmır...
Kamran Əsədov: “Müəllim çatışmazlığı, ixtisaslı kadrların olmaması rus bölməsindəki qəbul müsabiqələrinə də öz mənfi təsirini göstərir”
Ölkəmizdə rus dilini bilənlərin sayı çoxluq təşkil etsə də, bu dildə pedaqoji fəaliyyətlə məşğul olanlar xeyli azdır. Bu problemi elm və təhsil naziri Emin Əmrullayev də səsləndirib. O qeyd edib ki, orta və ali məktəblərdə rus dili müəllimi çatışmazlığı mövcuddur.
Maraqlıdır, rus dilini tədris edən müəllimlərin sayının azalması nədən qaynaqlanır?
“Bu gün əksər rus bölmələrində fənn müəllimləri olmadığından, azərbaycan bölməsinin müəllimləri həmin fənləri tədris edir”
Təhsil eksperti Kamran Əsədov “Bakı-Xəbər”ə açıqlamasında bildirdi ki, son illər rus bölməsində təhsilə maraq artıb: “Düzdür, indi rus dilində təhsilə dəb kimi yanaşanlar da var. Onların çoxu elə bilir ki, rus dilində oxumaqla uşaqlar öz intellektləri ilə seçiləcəklər. Ancaq bu belə deyil. Əvvəla, indi əvvəlki rusdilli intellektli müəllim nəsli azalıb. Rus dilini əlavə dil bilmək xətrinə öyrənmək olar. Amma ümumi tədrisi rus dilində almağa can atmaq düzgün deyil. Xüsusən əgər uşaq Azərbaycanda yaşayıb işləyəcəksə, öz dilində təhsil almalıdır. Ancaq əlavə dilləri mənimsəsə, gələcəyi üçün perspektivli olar. Məlumat üçün deyim ki, hazırda ümumilikdə orta məktəblərin 7,6 faizində təhsil rus dilindədir. 4472 orta məktəbin 340-ı rus məktəbidir. Bu məktəblərdə 90 min şagird oxuyur. Bu isə o deməkdir ki, ümumilikdə təhsil alan uşaqların 6,3 faizi rus dilində oxuyur. Doğrudur, orta məktəblərdə 450 min uşağa rus dili xarici dil kimi tədris edilir. Bu isə ümumi şagirdlərin 32% faizi deməkdir”.
Həmsöhbətimiz onu da əlavə etdi ki, rus bölməsində tədrisin aşağı səviyyədə olmasının əsas səbəbi ali məktəbləri bitirən müəllimlərin bir çoxunun işə qəbul zamanı müvafiq ixtisaslar üzrə yetərli bal toplaya bilməməsidir. Qəbul imtahanlarının nəticələrini təhlil edərkən biz görürük ki, rus bölmələri üzrə uşaqların nəticələri yaxşıdır. Amma texniki və humanitar fənlər üzrə Azərbaycan bölməsi ilə müqayisədə nəticələr bir qədər zəifdir: “Bu da, təbii ki, orta məktəblərdə ixtisaslı müəllim çatışmazlığı ilə bağlıdır. Təsadüfi deyil ki, rus bölməsi üzrə ali məktəblərə qəbul zamanı aşağı bal toplayan abituriyentlər universitetlərin ən prestijli ixtisaslarına qəbul olurlar. Halbuki, həmin ixtsasların Azərbaycan bölməsi üzrə qəbul balları çox yüksək olur. Məhz müəllim çatışmazlığı, ixtisaslı kadrların olmaması rus bölməsindəki qəbul müsabiqələrinə də öz mənfi təsirini göstərir. Nəticədə rəqabət mühiti aşağı düşür. Yaxşı olar ki, rus bölməsi üzrə MİQ imtahanlarında işə qəbul asanlaşdırılsın. Bu gün əksər rus bölmələrində fənn müəllimləri olmadığından, azərbaycan bölməsinin müəllimləri həmin fənnləri tədris edir. Bu, az bal toplayan ixtisaslı rusdilli müəllimin şagirdlərə dərs keçməsindən daha pisdir”.
Günel CƏLİLOVA
