Avropa Ermənistanın AES-lə bağlı öhdəliyi pozmasına açıq göz yumur...
Əli Orucov: “Kim zəmanət verir ki, zəlzələ baş verəcəyi halda həmin AES-də qəza baş verməyəcək?”
Ermənistandan təhlükəli addım. Ermənistan hökuməti keçirilən iclasda Ermənistan Atom Elektrik Stansiyasının (AES) ikinci enerji blokunun istismar müddətini 2036-cı ilə qədər uzatmaq barədə qərar qəbul edib.
Görülən işlərin dəyəri 65 milyon dollar qiymətləndirilir. Hökumətin qərarı AES-ə müvafiq işlərin görülməsi üçün Rusiyanın “Rosatom Service” dövlət korporasiyası ilə müqavilə bağlamağa icazə verir.
Buna uyğun olaraq İrəvan və Moskva Ermənistan Atom Elektrik Stansiyasının ikinci enerji blokunun istismar müddətinin yenidən uzadılması (daha 10 il) üçün çərçivə müqaviləsi imzalayıb. Sənədi Ermənistan tərəfdən baş direktor Eduard Martirosyan, Rusiya tərəfdən isə “Rusatom Servis” ASC-nin kompleks layihələr idarəsinin rəhbəri Yuri Sviridenko imzalayıb.
O da məlumdur ki, “Metsamor” AES-in istismar müddəti 2026-cı ildə bitməlidir. Avropa İttifaqının bununla bağlı tələbləri var. Ancaq bütün tələb və çağırışlara baxmayaraq, Ermənistan Rusiya ilə AES-in 2036-cı ilə qədər istismarına dair saziş imzalayıb. Axı bütün bunlar region üçün təhlükəlidir və Avropa buna niyə susur? Halbuki, Ermənistan Avropa Şurasına üzv qəbul olunanda bununla bağlı üzərinə öhdəlik götürüb.
“Bu baxımdan, Avropa qurumlarının baş verənləri görməzdən gəlməsi qəbuledilməzdir”
Sözügedən məsələyə aydınlıq gətirən AMİP funksioneri Əli Orucov “Bakı-Xəbər”ə açıqlamasında Avropa qurumlarının buna susmasını bir sıra amillərlə əlaqələndirdi: “Bunun başlıca səbəbi Avropa İttifaqının ikili standartlardan çıxış etməsi ilə əlaqədardır. Avroittifaq yaxşı bilir ki, Ermənistan üzərinə düşən öhdəlikləri yerinə yetirmir. Ancaq məqsədyönlü şəkildə bunu görməzdən gəlir. Ona görə ki, qurumda Fransa başda olmaqla bir sıra dairələr bilavasitə Ermənistanı himayə edirlər. Onlar imkan vermir ki, bununla əlaqədar qurum Ermənistana xəbərdarlıq etsin, müəyyən tələblərlə çıxış etsin. Digər amil onunla əlaqədardır ki, Ermənistanın iqtisadi imkanlarının zəif olduğu bəhanə edilir. Qeyd edilir ki, Ermənistanın alternativ enerji mənbələri məhduddur. Üstəlik, elektrik stansiyalarını yeniləmək üçün maliyyə resurslarının olmaması irəli sürülür. Belə bir vəziyyətdə “Metsamor” AES Ermənistanın elektrik enerjisinə olan tələbatının 30 faizini ödəyir. Madam Ermənistanın maliyyə imkanları məhduddur, o zaman Avropa İttifaqı öz vəsaiti hesabına yeni elektrik stansiyaları inşa etsin. Əhalisi heç 3 milyon olmayan Ermənistanın bu ehtiyaclarını təmin etmək nə çətin məsələdir? Region ölkələrinin etirazları, beynəlxalq tələbləri nəzərə almadan təhlükəli AES-in müddəti uzadılır. Birincisi, həmin AES-in texnologiyası köhnədir. İkincisi, Ermənistan ərazisi seyismik zonada yerləşir. Kim zəmanət verir ki, zəlzələ baş verəcəyi halda həmin AES-də qəza baş verməyəcək? Bu baxımdan Avropa qurumlarının baş verənləri görməzdən gəlməsi qəbuledilməzdir”.
Vidadi ORDAHALLI
