Erməni kilsəsi revanşı rəsmi kurs kimi qəbul etdi...
Tural İrfan: “Niyyətləri odur ki, erməni kilsəsinin rəhbərliyi ilə Azərbaycan torpaqlarını yenidən işğal etsinlər, onlar heç zaman işğalçılıq azarından əl çəkmək istəmirlər”
Erməni Qriqoryan kilsəsi revanşizmdən, separatçılığı dəstəkləməkdən bir addım da olsa geri çəkilmək istəmir. Erməni Qriqoryan Kilsəsinin Tavuş yeparxiyasının rəhbəri arxiyepiskop Baqrat Qalstanyan uzun illərdir ki, revanşistlərin yanında yer alıb.
Arxiyepiskop bazar günü xütbəsi zamanı “Bəli, mən özümü revanşist hesab edirəm və ömrümün son saniyəsinə qədər belə yaşayacam. Çünki bu, bizim həyatımızı nə mənəvi, nə əxlaqi, nə də fiziki mənada soymaq məqsədi daşıyır. Bu, daim diz çöküb sürünmək deyil, əksinə, ayağa qalxıb Rəbbimizin hüzurunda durmaq və “yer üzündə Sənin işini görmək üçün imanımı artır” demək üçündür. Və biz düşünməliyik ki, yer üzündə Allahın işini, ədalətin, həqiqətin və xilasın bərpasını edirik. Bəli, bu qisas yoludur. Evinizi bərpa etməyin başqa hansı yolu var?Bu, nifrət demək deyil, əksinə, sevgi deməkdir, fədakarlıq deməkdir, sonsuz iman, ən böyük ümid, fədakarlıq, cəsarət və bütün fəzilətləri nəzərdə tutur, əksini deyil. Bütün daxili aləmi alt-üst olmuş, rahat yaşaya bilən insan ola bilməz. Siz hər zaman dediklərimizə görə bizi günahlandıra bilərsiniz, lakin bu bizim reallığımızı dəyişmədi, daha da pisləşdi və daha da pisləşəcək. Və bu qisas ona görə olmalıdır ki, minlərlə insan bizim həyatımız üçün canını verdi”-deyə sərsəmləyib.
Arxiyepiskop erməniləri Azərbaycana qarşı müharibəyə çağırıb.
Erməni kilsəsinin əsl üzü budur, sülh və insanlıq düşməni olduğunu hər addımda büruzə verir.
Sülh müqaviləsinin imzalanması barədə razılığın bir addımlığında olunduğu halda erməni kilsəsi niyə sülhə mane olmaqdan əl çəkmir?
“Nə xaricdəkilər, nə də erməni kilsəsi heç nəyə nail ola bilməyəcək, kilsənin bu təxribatı da nəticəsiz qalacaq”
Milli Cəbhə Partiyasının sədr müavini, tanınmış ilahiyyatçı Tural İrfan “Bakı-Xəbər”ə bildirdi ki, Qazax rayonunun 7 kəndi hələ də Ermənistanın işğalı altındadır və o kəndlərin bir neçəsində qədim alban kilsələri yerləşir. “Məhz həmin kəndlər Ermənistanın Tavuş bölgəsi ilə həmsərhəddir. Baxmayaraq ki, o torpaqlar əvvəllər Azərbaycana məxsus olub, hazırda isə Ermənistan ərazisidir.
Sülh müqaviləsinin imzalanmasına yaxınlaşırıq, sərhədlərin də delimitasiyası gedir, bu vəziyyətdə aydındır ki, Qazaxın işğalda olan 7 kəndinin Azərbaycana qaytarılmasına da çox yaxınıq. Belə bir vaxtda həmin bölgənin keşişinin də çıxışları məhz ona hesablanıb ki, həmin kəndlərin qaytarılmaması üçün maksimum təzyiq göstərsinlər. Hərçənd, yaxşı bilirik, Ermənistan quruluşundan bəri kilsə dövlətidir və onlar həmişə etdikləri müharibələri, tökdükləri qanları kilsənin təlimatı, fitvası ilə ediblər. Bu da həmişə təkrarlanır. Həmçinin, Fransa kimi bəzi dövlətlərin də siyasi dəstəyini alaraq əməllərini daha da genişləndirmək istəyirlər. Qərbdə səlibçi təfəkkürlü partiyalar, təşkilatlar, dövlət rəsmiləri var. Düzdür, buna açıq şəkildə şərait yoxdur, amma onlar bunu gizli şəkildə həyata keçirirlər, altdan-altdan səlib yürüşü davam edir. Ermənistanın da bu addımları sırf səlibçiliyə hesablanmış bir məsələdir. Müharibədən götürək, erməni əsgərlərinin hamısının kürəyinə xaç işarəsi çəkilmişdi, işğal etdikləri hər bir yerə xaç basdırırdılar, xaç işarəsi qoyurdular. Bu da onlara kilsənin verdiyi əhval-ruhiyyənin, “fətvanın” əsasında idi.
Gizlin deyil ki, erməni Qriqoryan kilsəsi hər zaman revanşizmin önündə gedib. Düzdür, çox zaman açıq şəkildə elan etməsələr də, amma kilsədən təlimat alan revanşistlərin niyyətləri odur ki, müsəlman torpaqlarını işğal edib insanların qanını töksünlər. Hərçənd, bu məsələ həmişə türk – erməni məsələsi kimi gündəmə gətirilib, ancaq bunu dar çərçivəyə salmaq olmaz”-deyə T.İrfan qeyd etdi.
Onun sözlərinə görə, ermənilər 1918-ci ildə, ondan əvvəl və sonrakı dövrlərdə azərbaycanlılarla yanaşı kürdləri, yəhudiləri və başqa millətləri də soyqırıma məruz qoyublar. Məqsədlərinə gəlincə, T.İrfan dedi ki, onların əsas amalı erməni kilsəsini genişləndirmək, kilsəyə daha çox ərazi qazanmaq, kilsəni gücləndirməkdir. “Qafqaz Albaniyasından miras qalan alban kilsələrini öz adlarına çıxırlar, hər yerdə təbliğ edirlər ki, onlar guya erməni kilsələridir. Bütün bunlar sübut edir ki, ermənilərin fikri, təfəkkürü bundan ibarətdir.
Bilirsiz ki, hazırda Ermənistanda revanşist təfəkkürdə olan bir neçə partiya, qurum var. Sarkisyan və Köçəryan qruplaşmasının və digəriləri, eləcə də Qarabağdan könüllü köçənlərin bəzilərinin düşüncəsində revanşizm var. Eyni zamanda ABŞ-da, Fransada və başqa xarici ölkələrdə yaşayan ermənilər arasında da revanşist fikirlilər az deyil. Daxili prosesləri bilmirlər, məsələyə Suriya, Livan erməniləri kənardan baxır və “torpaqlar əldən çıxdı” deyirlər. Niyyətləri odur ki, erməni kilsəsinin rəhbərliyi ilə Azərbaycan torpaqlarını yenidən işğal etsinlər, onlar heç zaman işğalçılıq azarından əl çəkmək istəmirlər. Revanşist qüvvələrin işğalçılıq niyyətləri də erməni kilsəsinə ruh verir. Erməni kilsəsinin bir neçə başqa ölkədə də bağları var. Yəni bu revanşist ab-havada olanlar təkcə Ermənistanı əhatə etmirlər, başqa yerlərdə də var.
Sirr deyil ki, Azərbaycanla Ermənistan arasında sülh müqaviləsinin imzalanmasının qarşısını almaq üçün xarici qüvvələr hərəkətə keçib, onlara da erməni kilsəsi dəstək verir. Məqsədləri təxribat yaradıb prosesi qarışdırmaqdır. Hesab edirəm ki, nə xaricdəkilər, nə də erməni kilsəsi heç nəyə nail ola bilməyəcək, kilsənin bu təxribatı da nəticəsiz qalacaq. Çünki reallığı artıq dünya gücləri də, Ermənistan rəsmliləri də qəbul edib. Bu baxımdan, sülh müqaviləsinin imzalanmasına doğru addımlandığı bir vaxtda erməni kilsəsinin təxribatları nəticəsiz qalacaq. Onların iddiası tamamilə absurddur.
Ancaq məsələ bundadır ki, erməni kilsələri davamlı şəkildə Azərbaycana qarşı bu cür revanşist fikirlər səsləndirərkən onlara müsəlman icmalarından, QMİ-dən, Dini Qurumlarla İş üzrə Dövlət Komitəsindən layiqli cavab verildiyini eşitməmişəm. Erməni kilsəsi həmişə “əzabkeş” donuna girib belə revanşist fikirlər səsləndirir, ancaq bizdən kəsərli cavab olmur. Müharibə dövründə QMİ sədri cihad fətvası verə bilərdi ki, bu dinlə də uyğun idi, Yəni müsəlman torpaqları, məscidləri işğal altında idi və onun azad edilməsi vacib idi. O bunu etməsə də, ermənilər, Qərb bizi şantaj edirdilər ki, Azərbaycan guya din müharibəsi aparır və s. Hətta qonşumuz İran iddia edirdi ki, giya burada hansısa dini qruplaşmalar var. Amma erməni kilsəsi “xaç yürüş”ünə fətva, hökm verir, düzdür, bunu açıq demir. Din siyasətə qarışmamalıdır, amma ermənilərdə qarışır. Qərbdən də ermənilərə bir cavab verən yoxdur ki, niyə dini rejim qurursuz, niyə din siyasətə qarışır? Amma müsəlman aləmində bir müsəlmnan din xadimi çıxış edərsə o dəqiqə onu radikallıqda günahlandırırlar”.
T.İrfan hesab edir ki, erməni kilsəsinin bu cür iddialarına, sərsəmləmələrinə ölkəmizdəki bütün dini icmalar cavab verməlidir, BMT başda olmaqla, bütün beynəlxalq siyasi və hüquqi, dini təşkilatlara erməni kilsəsinin revanşist siyasəti ilə bağlı müraciət etməlidir.
İradə SARIYEVA
