Nazir Əmrullayev bu problemin başından yox, ayaqlarından tutur...
Məzahir Məmmədli: “...Əgər bu cür planlar varsa, əvvəlcə kolleclərdə pedaqoji yönümlü ixtisasları ləğv etmək lazımdır”
“Məktəbəqədər təhsil müəssisələrində çalışan şəxslərin minimum bakalavr təhsili səviyyəsində hazırlanması əsas məqsəddir”. Bunu Elm və təhsil naziri Emin Əmrullayev "Məktəbəqədər təhsildə keyfiyyətə yeni baxış" mövzusunda keçirilən beynəlxalq elmi-praktik konfransda çıxışı zamanı deyib.
Nazir hesab edir ki, yaxın gələcəkdə bununla bağlı dəyişiklik barədə məlumat vermək mümkün olacaq: “Gələcəkdə orta ixtisas təhsilli mütəxəssislərin bağçalarda işləməsinə icazə verilməyəcək. Biz artıq ümumi təhsildə orta ixtisaslı mütəxəssislərin fəaliyyətini dayandırmışıq. Bu, məktəbəqədər təhsildə də olacaq. Bu vaxta qədər işə qəbul olunmuş orta ixtisaslı şəxslər çalışacaq. Onların fəaliyyətinə heç bir müdaxilə edilməyəcək”.
Nazirin bu açıqlaması cəmiyyətdə ciddi ajiotaj yaradıb. Əksər mütəxəssislər, eləcə də orta ixtisas təhsilli pedaqoji kadrlar hesab edirlər ki, ölkədə pedaqoji kadrlar buraxan orta ixtisas müəssisələri fəaliyyətini davam etdirdiyi halda onların diplom verdiyi şəxslərin fəaliyyətinə icazə verilməməsi anormal haldır. Mütəxəssislər nazirin məsələni yanlış qoyduğunu düşünürlər. Onlar hesab edir ki, pedaqoji kadrtlar hazırlayan orta ixtisas məktəbləri mövcud olduğu halda onları bitirənlərlə bağlı qərarın verilməsi düzgün deyil. Məsələyə nazirin dediyi kimi yanaşılsa, pedaqoji profilli orta ixtisas müəssisələrini bitirmiş insanların axırı nə olacaq? Belə çıxır ki, onlara kolleclərdə təhsil verib, diplomla təmin edib sonra isə küçəyə ötürəcəklər, onlar da işsiz qalacaq.
Ekspertlərin sözlərinə görə, yerlərdə indiyə qədər olanları işə götürməmək, işdən çıxarmaq əvəzinə başqa addım atılmalıdır. Mütəxəssislər hesab edir ki, onlara diplom verib işsiz qoymaqdansa, pedaqoji yönümlü orta ixtisas təhsili verən məktəbləri bağlamaq lazımdır. Ekspertlərə görə, pedaqoji yönümlü orta ixtisas müəssisələrini ona görə birdəfəlik bağlamaq lazımdır ki, gənclər gedib ali təhsil alsınlar, bağçalarda da, məktəbəqədər tədris müəssisələrində də, məktəblərdə də, universitetlərdə də ali təhsilli mütəxəssislər çalışsınlar, nəinki orta ixtisas təhsillilər. Onları işə qəbul etməmək, onları işdən çıxarmaq çıxış yolu deyil, onlara təhsil verən müəssisələri, yəni orta ixtisas məktəblərini bağlamaq lazımdır. Söhbət pedaqoji yönümlü orta ixtisas müəssisələrindən gedir, bu təklifin başqa sahələrdə olan orta ixtisas müəssisəslərinə aidiyyəti yoxdur.
“Məktəbəqədər təhsil müəssisəsində də o kadrlardan istifadə edilməyəcəksə, onda gərək pedaqoji yönümlü kolleclər bağlanılsın”
Təhsil eksperti Məzahir Məmmədli “Bakı-Xəbər”ə bildirdi ki, bu olduqca ciddi bir məsələdir. M.Məmmədlinin sözlərinə görə, orta ixtisas təhsilli şəxslərin gələcəkdə bağçalarda da pedaqoji fəaliyyətdən uzaqlaşdırması böyük narahatlıq yarada bilər və odur ki, məsələyə ehtiyatla yanaşmaq lazımdır. “Bilirsiz ki, bu məsələ elm və təhsil nazirinin məlum çıxışından sonra həm mətbuatda, həm də sosial şəbəkələrdə geniş müzakirə olunmağa başlayıb. Hesab edirəm ki, nazirin fikri müəyyən qədər düzgün anlaşılmayıb. Orada tövsiyə olunur ki, bağçalarda da müəllimlər ən azı bakalvr səviyyəsində olmalıdır. Qərar müzakirə edilən səviyyədə başa düşülsə ki, onlar hamısı işdən azad edilməlidir, yaxud ediləcəklər, onda bu sahədə ciddi bir boşluq yarana bilər. Bildiyiniz kimi, məktəbəqədər təhsil müəssisələrində, yəni bağçalarda əksər tərbiyəçilər, müəllimlər, hətta müəyyən direktorlar kollec təhsillidir, onlar orta ixtisas müəssisələrinin məzunlarıdırlar. İkinci bir məsələ isə odur ki, əgər bu cür planlar varsa əvvəlcə kolleclərdə pedaqoji yönümlü ixtisasları ləğv etmək lazımdır. Bundan sonra bu addımı atmaq olar. Çünki Bakıdakı kolleclərin çoxunda, regionlarda fəaliyyət göstərən orta ixtisas müəssisələrinin demək olar ki, hamısında pedaqoji fakültələr var. Bugünə qədər pedaqoji ixtisas üzrə qəbula da heç bir məhdudiyyət yoxdur. Bundan sonrakı mərhələ üçün bu məsələnin izahı bir qədər çətin olacaq. Çünki Nazirlər Kabinetinin və Elm və Təhsil Nazirliyinin bu məsələ ilə bağlı indiyə qədər tapşırığı, göstərişi, sərəncamı, təlimatı yoxdur” - deyə M.Məmmədli vurğuladı.
M.Məmmədlinin qeyd etdiyinə görə, ola bilsin, bu gələcək dövr üçün nəzərdə tutulsun, amma bu da o halda baş verə bilər ki, həmin kolleclərə artıq qəbul dayandırılsın və bu qərar məzun olmağına bir il, il yarım qalanlara şamil edilməsin. “Hər halda, ədalətlilik prinsipini qorumaq üçün yeganə vasitə budur ki, bu il qəbul olan şəxslər məzun olandan sonra MİQ (Müəllimlərin İşə Qəbulu) imtahanında iştirak etsinlər və özlərinə əmək bazarında iş tapa bilsinlər.
Burada bir məsələ də var ki, aztəminatlı ailələrin övladları, eləcə də orta biliyi olan gənclər pedaqoji yönümlü kolleclərə, pedaqoji yönümlü orta ixtisas fakültələrinə üz tuturdular. Bu da yaxşı hal idi ki, pedaqoji kadrlara olan tələbat ödənilirdi. Deyim ki, bizim ali məktəblərdə hələlik o qədər kadr hazırlayan bakalavr potensialımız yoxdur. Bu halda biz hələ ki, kollec təhsili alan pedaqoji kadrlardan istifadə etməliyik. Amma əgər məktəbəqədər təhsil müəssisəsində də o kadrlardan istifadə edilməyəcəksə, onda gərək pedaqoji yönümlü kolleclər bağlansın. Əks halda başqa cür mümkün deyil. Amma deyim ki, bu proses baş verərsə, bu, əmək bazarında çox ağır nəticələrə səbəb olacaq” - deyə M.Məmmədli qeyd etdi.
Leyla QARAXANLI
