İrəvanda Əliyevin inauqurasiya çıxışını sözbəsöz izlədilər...
Rəşad Bayramov: “Ermənistanın himnində, bayrağında Türkiyə və Azərbaycana qarşı düşmənçilik yaymaqla yanaşı, həm də ərazi iddiası irəli sürülür”
Azərbaycan Prezidenti İlham Əliyevin inauqurasiya çıxışı Ermənstanı bərk narahat edib. Nikol Paşinyanın mətbuat katibi Nazeli Baqdasaryan öz Facebook səhifəsində Azərbaycan Prezidenti İlham Əliyevin son açıqlamalarına dair fikirlər səsləndirib.
“Rəsmi Bakının bir sıra bəyanatlarına cavab olaraq deməyə tam haqqım var: Ermənistan Respublikasının qanunvericiliyi Ermənistan Respublikasının daxili işidir və heç bir xarici qüvvənin ölkəmizin daxili işlərinə qarışmaq hüququ yoxdur”.
Mətbuat katibi sonra da davam edərək deyib ki, Ermənistan Almatı Bəyannaməsi əsasında bir-birinin ərazi bütövlüyünün tanınması, Almatı Bəyannaməsi əsasında iki ölkə arasında demarkasiya işlərinin aparılması, beynəlxalq platformalarda Azərbaycanla əldə edilmiş razılaşmalara sadiqdir.
Erməni mediası eyni zamanda İlham Əliyevin Ermənistanın arxasında duranlara göndərdiyi sərt mesajları da geniş təhlil edir, bunu özlərinə ünvanlanan hədə kimi dəyırləndirirlər.
Erməni mediasının İlham Əliyevin inauqurasiya çıxışındakı bəzi məqamlara verdiyi reaksiya nə dərəcədə əsaslı sayıla bilər?
Politoloq Rəşad Bayramov “Bakı-Xəbər”ə açıqlamasında bildirdi ki, erməni mediasının mövzuya bu şəkildə yanaşmasının səbəbi bəllidir: “Əslində, İlham Əliyev çıxışında sülhə, əminamanlığa yönəlik bir çox mesajlar verdi. Görürsünüzmü, bu barədə heç nə danışmırlar. Ancaq onların konstitusiyası ilə bağlı səslənən iradlara və Ermənistanın havadarlarına edilən xəbərdarlıqlara münasibət bildirirlər. Bunları güya onların daxili işlərinə qarışma kimi dəyərləndirirlər. Ancaq elə deyil. Prezident doğru olaraq deyir ki, belə qanunvericilik sənədləri ilə sülhə getmək olmaz. Nikol Paşinyan da müsahibəsində əsas qanunun yarıtmazlığını bəyan edib. O bildirib ki, Ermənistanın Müstəqillik Bəyannaməsi Azərbaycanla sülhə maneədir. Bunu İlham Əliyev deyəndə niyə qəbul etmirlər? Müstəqillik Bəyannaməsi İrəvanın Bakı və Ankara ilə münasibətlərinin normallaşması prosesində ən ciddi maneədir. Bu sənədi 1990-cı il avqustun 23-də o zaman ölkənin Ali Sovetinin sədri vəzifəsini tutmuş Levon Ter-Petrosyan imzalayıb. Yeri gəlmişkən, bəzilərinin ağızdolusu təriflədiyi, sonralar prezident olmuş bu şəxsin dövründə anti-Azərbaycan addımlarının əsası qoyulub.
Müstəqillik Bəyannaməsinin preambulasında “Ermənistan SSR və Dağlıq Qarabağın birləşməsi haqqında” Ermənistan Ali Soveti və “Dağlıq Qarabağın Milli Şurası”nın qərarı da əsas tutulur. Bundan başqa, sənəddə 1915-ci ildə Osmanlı dövlətində “erməni soyqırımının” beynəlxalq səviyyədə tanınmasına nail olunması da vurğulanıb. Təbiidir ki, belə sənədlərlə sülhə getmək olmaz. Ermənistanın himnində, bayrağında Türkiyə və Azərbaycana qarşı düşmənçilik yaymaqla yanaşı, həm də ərazi iddiası irəli sürülür.
Ermənistan üçün ali qanun Müstəqillik Bəyannaməsi əsasında yazılan konstitusiyadır. Bu əsas qanun 1995-ci il iyulun 5-də qəbul edilib. 2005-ci il noyabrın 27-də dəyişiklik olunub. 2015-ci il iyulun 15-də isə Konstitusiya islahatı üzrə Ermənistan prezidenti yanında xüsusi komissiya 20 il öncə qəbul olunmuş sənədə əlavə və dəyişikliklər edib. Ancaq heç birində Ermənistanın regionda pozuculuq fəaliyyətinə əsas verən məsələlərə diqqət yetirilməyib. Odur ki, beynəlxalq ictimaiyyət ilk növbədə rəsmi İrəvanı və havadarlarını Ermənistanda konstitusiya islahatının aparılmasına sövq etməyi vacib saymalıdır. Çünki reallığı əks etdirən qanun olmadan bütün cəhdlər nəticəsizi qala bilər. Mövcud sənədin yenidən yazılması tərəflər arasında etimad mühitinin yaranmasına da təkan verər. Yaxşı olardı ki, erməni cəmiyyəti bu məqamları nəzərə alsın”.
Məhəmmədəli QƏRİBLİ
