Aİ-də Orbanı qəhvə içməyə göndərib tələsik Kiyevin üzvlüyünü səsverməyə çıxardılar, o da qayıdıb 50 milyardlıq yardımı blokladı, indi də…
Bir neçə gün əvvəl Avropa liderləri Ukraynanı Avropa İttifaqına qəbul etməyə razı sala bilmədikləri Macarıstan lideri Orbanı sammitdə səsvermə anında zaldan çıxararaq qərarı səsverməyə çıxarıblar.
Orbanın Brüsseldə keçirilən Aİ Liderlər Sammitində Ukraynanın Birliyə üzvlük danışıqlarının başlamasına etiraz etməsi danışıqları dalana dirəyib. Həmin vaxt Almaniya kansleri Şolz bununla bağlı səsvermənin keçirilməsi üçün Orbanı digər ölkə liderləri qarşısında qəhvə fasiləsi üçün zaldan çıxmağa dəvət edib. Orban isə bu təklifdən sonra zalı tərk edib və qısa müddətə AB Şurası binasında ölkəsi üçün ayrılan otağa gedib. O, liderlərin yanına qayıdanda isə artıq gec olub, Avropa liderləri Ukraynaya Aİ-yə üzv olmaq üçün yaşıl işıq yandırıblar.
Qərara etiraz edən Orban bunun tamamilə mənasız, məntiqsiz və yanlış olduğunu deyib: “Macarıstan öz mövqeyini dəyişməyəcək. Mən onları bu pis qərarı verməməyə inandırmaq üçün səkkiz saat vaxt sərf etdim. Onlar nəhayət məni inandırdılar ki, bu, uzun bir prosesdir və Macarıstan bunu öz maraqlarına zidd hesab edərsə, istənilən vaxt ona mane ola bilər. Macarıstanın yaxın perspektivdə iki veto hüququ var. Bunlardan birincisi Ukrayna üçün hazırlanacaq danışıqlar çərçivə sənədidir, digəri isə hökumətlərarası konfransın çağırılması mərhələsində gündəmə gələ bilər”.
Lakin bir neçə saat sonra o, Ukraynaya 50 milyard avroluq dörd illik maliyyə yardımı paketinə veto qoymaqla Kiyevin bayram sevincini yarımçıq qoyub.
İndi isə məlum olub ki, Aİ ölkələri Ukraynaya yeni maliyyə vəsaitinin ayrılması ilə bağlı razılığa gəlmək üçün Macarıstanı səsvermə hüququndan məhrum etməyi düşünür. Britaniyanın “Financial Times” qəzeti yazır ki, Aİ Macarıstanı səsvermə hüququndan məhrum etmək imkanını nəzərdən keçirir. Qeyd edilir ki, bəzi rəsmilər səsvermə hüququnun dayandırılması ilə nəticələnə biləcək 7-ci maddə adlanan cəza prosedurunu aktivləşdirməyi müzakirə edir.
Bu prosedura başqa bir üzv dövlət mane ola bilər, lakin onu müdafiə edə biləcək Polşada hökumət dəyişib və Macarıstanın "zəmanətli müdafiəçiləri" qalmayıb. Yenə də bir çox ölkə Aİ-nin ən böyük silahını üzv dövlətə qarşı istifadə etməkdən narahatdırlar.
Aİ ölkələri Macarıstanın iştirakı olmadan Ukraynaya yardım göstərə bilərlər, lakin bunun daha çox vaxt aparacağı və yalnız müvəqqəti həll yolu olacağı deyilir.
"Bəlkə Macarıstan daha çox problem yaradacaq. Bəlkə də Macarıstan bizi başqa vasitələrdən istifadə etməyə məcbur edəcək. Amma son nəticədə Macarıstan Ukraynanı vəsaitlə təmin etməyimizə mane ola bilməyəcək", - zirvədə iştirak edən Aİ rəsmilərindən biri "Financial Times"a deyib.
TAHİR
