Moskva İrəvana “əba altından zopa” göstərdi - Ermənistan Aİİ-dən çıxsa…
Ermənistan Nazirlər Kabinetinin Aİ-yə üzvlük prosesinin başlanmasına dair qərar layihəsini təsdiqləməsini şərh edən Rusiya baş nazirinin müavini Aleksey Overçuk bildirib ki, Ermənistanın həm Avrasiya İqtisadi İttifaqına (Aİİ), həm də Avropa İttifaqına (Aİ) üzv olması mümkün deyil.
Ermənistanın Aİİ üzvü olduğuna diqqət çəkən Overçuk deyib ki, hər iki təşkilata üzlük mümkün deyil: "Aİİ və Aİ bir-birinə uyğun gəlmir. Hər iki təşkilat ortaq gömrük sərhədləri və malların, kapitalın, vətəndaşların və işçi qüvvəsinin sərbəst hərəkətini nəzərdə tutur. Bu iki birliyin bir nöqtədə birləşəcəyini düşünmək mümkün deyil. Bu səbəbdən Aİ-yə üzvlük prosesini başlatma qərarı layihəsi Ermənistanı seçim etməyə məcbur edir".
Aİİ üzvlüyünün imtiyaz olduğunu bildirən Overçuk deyib ki, Ermənistan Aİİ-dən çıxsa, bir tərəfdən ölkədə enerji və ərzaq qiymətləri artacaq, digər tərəfdən ixrac 70-80 faiz azalacaq: “Dolayısı ilə adi insanlar gəlirlərini və iş yerlərini itirəcək, daha çox pul xərcləməli olacaqlar. Bunun müqabilində Ermənistan vətəndaşlarına vizasız səyahət hüququ veriləcək, lakin Ermənistanın əhalisi azalacaq”.
Overçuk Ermənistanın Aİ üzvlüyünü batan Titanikə bənzədib: "Aİ-yə üzvlük 1912-ci ildə batan “Titanik”ə bilet almaq kimi bir şeydir".
Rusiya Federasiya Şurasının beynəlxalq məsələlər komitəsinin sədr müavini Andrey Klimov da deyib ki, Avrasiya İqtisadi İttifaqına üzvlük digər oxşar təşkilatlarda iştirakla bir araya sığmır: “Əgər kimsə Avropa İttifaqına daxil olarsa, bu, təkcə Aİİ ilə deyil, həm də MDB ilə vidalaşmaq deməkdir”.
Klimov Ermənistanın Avropa İttifaqına üzvlüyünü isə “absurd” adlandrıb.
Qeyd edək ki, Ermənistan Nazirlər Kabineti dünən Aİ-yə üzvlük prosesinin başlanmasına dair qərar layihəsini təsdiqləyib.
TAHİR
