Azərbaycan yumurta tələbatını tam ödəyəcək, üstəlik ixrac da edəcək…
Akif Nəsirli: “Fabrikdə yumurta istehsalı ilə yanaşı, damazlıq cücələr də yetişdiriləcək”
Prezident İlham Əliyev tərəfindən Cəbrayıl rayonunda təməli qoyulan “Hicaz quşçuluq” müəssisəsinin damazlıq yumurta istehsalı fabrikində ilkin mərhələ üzrə 24 damazlıq yumurta istehsalı sahəsi tikiləcək. Bu barədə “Hicaz” MMC-nin təsisçisi Səfər Sadıqov media nümayəndələrinə açıqlamasında bildirib.
Məlumat üçün bildirək ki, müəssisə 3 sahədən - damazlıq yumurta, inkubator və yem fabrikindən ibarət olacaq. Birinci mərhələdə 30 hektar ərazidə hər biri 1600 kvadratmetr olmaqla 24 damazlıq yumurta istehsalı sahəsi tikiləcək. Burada ildə 24 milyon ədəd damazlıq yumurta istehsal ediləcək. Bununla yanaşı, 2 hektar ərazidə saatda 40 ton istehsal gücünə malik yem fabriki və inzibati bina inşa olunacaq. Həmçinin 2 hektar ərazidə yerləşən soyuducu anbar və illik 24 milyon ədəd yumurta tutumuna malik inkubasiya fabriki fəaliyyət göstərəcək.
Ekspertlər hesab edir ki, Cəbrayıl rayonunda təməli qoyulan “Hicaz quşçuluq” müəssisəsi daxili təlabatı təmin edəcək və ixrac olunacaq.
“İstehsal uğurla davam edəcəksə, növbəti ildən yumurta ölkədaxili bazarla yanaşı, həm də xarici ölkələrə ixrac ediləcək”
Liberal Iqtisadçılar Birliyinin sədri Akif Nəsirli “Bakı-Xəbər”ə şərhində bildirdi ki, “Hicaz quşçuluq” müəssisəsində ilkin mərhələdə 24 milyon damazlıq yumurta istehsal ediləcək. O kompleksin tərkibində 24 milyon yumurta yerləşdiriləcək. Həmin sexlərdə yumurtalardan cücə çıxacaq, bəslənib böyüdüləcək və quş əti kimi daxili bazarda satışa çıxarılacaq: “Bu müəssisə hələ ki, daxili bazar üçün nəzərdə tutulub. Gələcəkdə imkanlar genişlənəndən sonra daxili bazarın təmini ilə yanaşı, ixrac da olunacaq. Fabrikdə yumurta istehsalı ilə yanaşı, damazlıq cücələr də yetişdiriləcək. Yetişdirilən cücələrin sayı artacağı halda topdan və pərakəndə bazarda quş ətinin satışı da yüksələcək. Belə olarsa, istehsal həm ölkədaxili təlabatı qarşılayacaq, həm də quş əti ixracının artmasına zəmin yarada bilər. Onu da deyim ki, istehsal edilən quş əti və yumurta öncəliklə kompleks daxilində anbarlara toplanacaq. Daha sonra fabrikdən ölkədaxili topdan və pərakəndə bazarlara çıxarılacaq. Əgər istehsal uğurla davam edəcəksə, növbəti ildən yumurta ölkədaxili bazarla yanaşı, həm də xarici ölkələrə ixrac ediləcək”.
Günel CƏLİLOVA
