Milli komandalar Parisdən yarımçıq qaçır - Makron istefa verəcək...
Təbriz Musayev: “Makronun azacıq ləyaqəti olsaydı, dərhal istefa verərdi”
“Paris-2024” Olimpiya Oyunları ilə bağlı biabırçılıqlar, nöqsanlar və bu kimi digər çatışmazlıqlar getdikcə daha qabarıq formada özünü göstərir. Ümumiyyətlə, prezident Emmanuel Makronun uğursuzluqları ard-arda davam edir. İyunun əvvəllərində Avropa Parlamentinə keçirilən seçkilərdə Makronun partiyası biabırçı formada məğlub oldu.
Daha sonra Fransa parlamentinə keçirilən seçkilərdə məğlub oldu. Olimpiyada biabırçılığı isə Makronun siyasi arenadan getməsini gündəmə gətirir.
Məsələ ondadır ki, “Paris-2024” Olimpiya Oyunlarında problemlər bir-birinə qarışıb. Böyük Britaniya komandasının böyük bir hissəsi çatışmazlıqlara etiraz edərək oyunu yarımçıq tərk edib. Çünki komanda üzvləri özlərinə normal yemək tapa bilməyiblər. Digər ölkələrin milli komandaları da Parisi yarımçıq tərk edib. Bəzi ölkələr idmançılarına kondisioner göndərib. Çünki otellərdə kondisioner yoxdur, idmançılara verilən yemək keyfiyyətsizdir. Antisanitariya baş alıb gedir. İdmançılara ət olmayan, kalorisi aşağı olan yeməklər verilir. Necə deyərlər, biabırçı bir durum yaranıb. Bütün bunların fonunda, yaranan biabırçı durumla əlaqədar Makronun istefası nə dərəcədə realdır və perspektivdə nə görsənir? Çünki Fransa tarixində hələ belə uğursuz dövr və prezident olmayıb. Atdığı addımlarla bütün ölkəni zərbə altında qoyub.
“Ard-arda siyasi məğlubiyyətlərdən sonra olimpiya biabırçılığı faktiki olaraq onun karyerasının bitməsi deməkdir”
Sözügedən məsələni “Bakı-Xəbər”ə şərh edən İrəvan Azadlıq Təşkilatının sədri Təbriz Musayev hesab edir ki, normalda özünə hörmət edən dövlət başçıları belə vəziyyətdə istefa verirlər: “Makronun azacıq ləyaqəti olsaydı, dərhal istefa verərdi. Bizim bu ölkəyə hansı münasibətimizdən asılı olmayaraq Fransanın bir tarixi, inkişaf etmiş ölkələrdə bir çəkisi var. Makron sanki bütün bunları, dəyərləri yerlə bir etdi. Paris Olimpiadasının açılış mərasimində İsa peyğəmbər və onun həvarilərinin hörmətdən salınması, onların o dövrdəki görüş mərasimlərinə bənzər təqdimatın hazırlanması Fransanın xristianlara qarşı təhqiramiz münasibəti idi. Makron hakimiyyətinin tədbiri siyasiləşdirməsi, cinsi azlıqları təbliğ etməsi, xristianlığa hörmətsiz münasibət nümayiş etdirməsi bütün dünyada hiddət doğurdu. Bax bu dərəcədə uğursuz təşkilatçılıq ortada idi. Ard-arda siyasi məğlubiyyətlərdən sonra olimpiya biabrçılığı faktiki olaraq onun karyerasının bitməsi deməkdir. Baxmayaraq ki, Makron 2022-ci ildə ikinci dəfə prezident seçilib, amma bu gedişlə çətin ki, o, bu müddəti tamamlasın. Çünki ortada bir dənə uğur hekayəsi yoxdur. Fikrimcə, Makronun istefaya məcbur edilməsi ehtimalı var”.
Vidadi ORDAHALLI
