Hindistan-İran-Ermənistan marşrutu... Azərbaycanın arxasında fars-erməni sövdəsi...
Qabil Hüseynli: “Sülh sazişi imzalanmadan İranın bu addımı Azərbaycana növbəti xəyanətdir”
Yaxın vaxtlarda Ermənistan, İran və Hindistanın iştirakı ilə ticarət marşrutunun işə salınmasını hədəfləyən üçtərəfli görüş keçiriləcək. Bu barədə “Sputnik” agentliyi Ermənistanın logistika şirkətlərindəki mənbələrinə istinadən yazıb.
Nəşr görüşün İranda baş tutacağını qeyd edib. Bildirilib ki, 3 ölkənin nəqliyyat sektorunun nümayəndələri Çabahar limanının infrastrukturu ilə tanış olacaq, Ermənistanın limandakı operator fəaliyyətini, həmçinin marşrutun tezliklə işə salınması ilə bağlı məsələləri müzakirə edəcəklər. Qeyd edək ki, marşrut Körfəz ölkələri və Hindistandan Avropa İttifaqı və Avrasiya İqtisadi İttifaqı ölkələrinə yüklərin daşınmasını nəzərdə tutur.
Ümumilikdə, Hindistan-İran-Ermənistan mərşrutu Azərbaycanın Şimal-Cənub marşrutuna bir calağdır. Məsələ ondadır ki, Ermənistan sülh sazişi imzalamamış Azərbaycan üzərindən İran ona belə bir fürsət yaradır. Üstəlik, İran Hindistanla Ermənistan arasında hərbi əməkdaşlığa şərait yaradır. Ona görə də bütün bunlar Azərbaycanın arxasında qurulan fars-erməni sövdəsıdır.
“Mollaların başı o qədər boşdur ki, perspektivli layihəni qoyub, perspektivi olmayan layihəni gündəmə gətirirlər”
Sözügedən məsələni “Bakı-Xəbər”ə şərh edən politoloq Qabil Hüseynli hesab edir ki, sülh sazişi imzalanmadan İranın bu addımı Azərbaycana növbəti xəyanətidir: “Baxmayaraq ki, Azərbaycan bu dövlətlə əlaqələrin genişləndirilməsinə böyük töhvələr verir. İran isə hər vasitə ilə Azərbaycandan yan keçən yolun çəkilməsinə, sonra isə bunu Şimal-Cənub nəqliyyat dəhlizinə inteqrasiya etməyə çalışır. Ədalət naminə demək lazımdır ki, Şimal-Cənub nəqliyyat dəhlizini çəkmək üçün həm Rusiya, həm də Azərbaycan xeyli əziyyət çəkib. Azərbaycan Astaradan keçən dəmir və şose yolların, körpülərin tikintisi üçün nəzərdə tutulandan əlavə 40 milyon dollar xərcləyib. Üstəlik, dəmir yol xəttini İran ərazisinə qədər 5 kilometrə qədər uzadıb. Ancaq əfsuslar olsun ki, bir belə görülən işlər müqabilində İran Hindistandan Ermənistana yeni yolun çəkilməsi ilə bağlı manevrlər edir, səylər göstərir. Mollaların başı o qədər boşdur ki, perspektivli layihəni qoyub, perspektivi olmayan layihəni gündəmə gətrirlər. Bundansa Rəşt-Astara dəmir yolunun tikintisini sürətləndirmək daha mənfəətli olardı. Çünki həmin dəmir yolu Şimal-Cənub nəqliyyat dəhlizinin vacib birləşdirici həlqəsidir. Əfsuslar olsun ki, bütün bunların fərqinə vamaq istəmirlər. Prinsipcə, yolların inteqrasiyasına qarşı deyiləm. Ancaq bundan əvvəl gərək Azərbaycanla Ermənistan arasınsa sülh sazişi imzalansın. Ermənistan Zəngəzur dəhlizinə razılıq versin. Digər kommunikasiya xətləri açılsın. Yalnız ondan sonra Cabahar limanından Ermənistana qədər yol çəkiləcəksə, bu yolların inteqrasiyasından danışmaq olmar. Bütün bunlar olmadan İranın Azərbaycanın başı üzərindən bu siyasi oyunu qəbuledilməzdir”
Vidadi ORDAHALLI
