Dollara tələb bu sürətlə artsa, seçkidən sonra devalvasiya qaçılmaz olacaq...
Əkrəm Həsənov: “Azərbaycanın valyuta ehtiyatları kifayət qədərdir, hazırda devalvasiya təhlükəsi yoxdur”
Bu il Azərbaycanda dollara tələbat kəskin artıb. Mərkəzi Bankın məlumatına əsasən, 2024-cü ilin yanvar-iyul aylarında Azərbaycan Mərkəzi Bankında keçirilən valyuta hərraclarında 4,1 milyard dollar məbləğində satış olub.
Bu, keçən ilin eyni dövrü ilə müqayisədə 2,3 dəfə çoxdur. Təkcə bu ilin iyul ayında valyuta satışının məbləği 597,1 milyon dollar təşkil edib. Bu isə ötən ilin iyul ayı ilə müqayisədə 2,2 dəfə çox deməkdir.
Qeyd edək ki, Mərkəzi Bankda keçirilən mətbuat konfransında qurumun sədri Taleh Kazımov deyib ki, valyuta hərraclarında tələbatın 2 dəfədən çox artması əsasən dövlət büdcəsində xərcləmələrlə bağlıdır. Mərkəzi Bankın sədri deyib ki, bundan başqa, cari ilin əvvəlindən təkcə yerli şirkətlər və fərdi sahibkarlar xarici tərəfdaşlarına olan borclarını bağlamaq üçün 800 milyon ABŞ dolları ödəniş edib.
Maraqlıdır bu il Azərbaycanda dollara tələbat niyə artıb? Növbəti aylarda dollara tələbat daha da yüksələ bilərmi?
“Hazırda dollara tələbin artması daxili faktorla deyil, Rusiya ilə bağlıdır, çünki…”
Bank sagı üzrə ekspert Əkrəm Həsənov “Bakı-Xəbər”ə açıqlamasında qeyd etdi ki, dollara tələbin artıb və ya azalması vaxtaşırı müşahidə olunur: “Hazırda dollara tələbin artması daxili faktorla deyil, Rusiya ilə bağlıdır. Məlumdur ki, Rusiyada müəyyən məhdudiyyətlər var. Orda yaşayanlar Azərbaycana geri dönür və dollar alır”.
Ekspert hesab edir ki, yaxın 6 ay ərzində milli valyuta üçün hər hansı bir təhlükə yoxdur. Çünki hazırda milli valtuta ehtiyyatı lazımi səviyyədədir: “Devalivasiya o zaman baş verə bilər ki, bankların Mərkəzi Bankdan tələb etdikləri dolların məbləği artan tendensiya ilə davam etsin. Bu tendensiya isə dəyişkən formada davam edir. Hər bir halda Azərbaycanın valyuta ehtiyatları kifayət qədərdir. Hazırda devalivasiya təhlükəsiz yoxdur”.
Həmsöhbətimiz onu da əlavə etdi ki, yay aylarında xarici valyutaya tələb yüksək olur: “Çünki istirahətə gedənlər dollara üstünlük verir. Onu da deyim ki, dövlət investisiya layihələri artdıqca idxal da artır. Ölkədə dollara tələbatın artmasının əsas səbəbi budur".
Günel CƏLİLOVA
