Faşist Njdenin İrəvandakı heykəlinin götürülməsi məsələsi BMT-də qaldırıldı...
Faiq Ələkbərli: “Qaregin Njde terrorçudur, o türk və müsəlmanlara qarşı olduqca qəbuledilməz cinayətlər edib”
Ermənistan nümayəndə heyətinin rəhbəri BMT tribunasında faşist Qaregin Njdeni müdafiə edib. BMT-nin İrqi Ayrıseçkiliyin Aradan Qaldırılması üzrə Komitəsinin 114-cü sessiyası zamanı Ermənistan üzrə məruzəçi Jung Kam Con rəsmi İrəvanın ünvanına faşizmlə bağlı iradlar səsləndirib.
O bildirib ki, komitə bu ölkədə faşist rejimi ilə əməkdaşlıq edən və insanlığa qarşı cinayətlər törətmiş Qaregin Njde kimi şəxslərin heykəlinin qoyulması barədə məlumat alıb. Con Ermənistan nümayəndə heyətinə tolerantlıq mühitinin yaradılması istiqamətində hansı addımların atıldığı ilə bağlı sual ünvanlayıb. Ölkəsinin tolerant ölkə olduğunu sübut etməyə çalışan Ermənistan nümayəndə heyətinin rəhbəri Vaan Kostanyan məsələnin ağırlığını hiss edərək, məktəb proqramına yenidən baxıldığını açıqlamaq məcburiyyətində qalıb. Njdenin adını belə çəkməkdən çəkinən V.Kostanyan onun faşist olduğunu inkar edə bilməyib. O, Njdenin 20-ci əsrin əvvəllərində göstərdiyi “xidmət”lərə görə Ermənistan və erməni xalqı üçün mühüm tarixi şəxsiyyət olduğunu bildirib.
Qeyd edək ki, “Daşnaksütyun” partiyasının üzvü olmuş Qaregin Njde II Dünya müharibəsi dönəmində Hitler Almaniyası ilə əməkdaşlıq edib. O, ermənilərdən ibarət birləşmələrə rəhbərlik edərək faşist ordusu ilə birlikdə Krımda və Qafqaz cəbhəsində vuruşub. Bir sıra kütləvi qətllərin və insanlıq cinayətlərinin müəllifi olan Njde SSRİ kəşfiyyatı tərəfindən müharibə dövründə həbs olunub və 1955-ci ildə həbsxanada ölüb.
“Bütövlükdə Ermənistan cəmiyyəti faşizm üzərində köklənib, Ermənistanın bundan azad olması zaman alacaq”
Mövzu ilə bağlı fikir bildirən AMEA Fəlsəfə və Sosiologiya İnstitutunun aparıcı elmi işçisi, fəlsəfə üzrə fəlsəfə doktoru, dosent Faiq Ələkbərli “Bakı-Xəbər”ə şərhində bildirdi ki, BMT-nin hansısa qurumları Ermənistanın faşist insanları müdafiə etməsinə öz etirazını bildirir. Bunlardan biri də Qaregin Njdedir: “Bu baxımdan BMT-nin irqi ayrı-seçkiliyinin aradan qaldırılması üzrə komitəsində Ermənistana yönələn tənqidlər çox doğrudur. Məlumdur ki, Qaregin Njde terrorçudur, o türk və müsəlmanlara qarşı olduqca qəbuledilməz cinayətlər edib. Faşizm meydana çıxmazdan öncə də Njdenin terrorçuluğu, insanlıqdan kənar əməlləri bəllidir. Təbii ki, ermənilər mümkün qədər Njdeni müdafiə edəcək, çünki bu şəxs onların gözündə Ermənistan üçün qəhrəman sayılır. Ermənistan adlanan dövlətin genişləndirilməsində, türk-müsəlman əhalisinin qırılmasında Njdenin rolu müstəsnadır. Xüsusən də Qərbi Zəngəzurda Qaregin Njdenin əməlləri deyiləsi deyil. Hətta o zaman Njde Sovet İttifaqına qarşı xəbərdarlıq göndərmişdi ki, Qərbi Zəngəzur torpaqları Ermənistan SSR-ə qalarsa, o oranı tərk edib Fransaya gedəcəkdi”.
Həmsöhbətimiz bildirdi ki, faşist Njdenin əməllərini Ermənistanda tənqid edənlər də var. Ancaq bütövlükdə Ermənistan cəmiyyəti faşizm üzərində köklənib. Ermənistanın bundan azad olması zaman alacaq.
Günel CƏLİLOVA
