Qərb Gürcüstanı sabitləşməyə qoymur - quru sərhədlərimizin bağlı qalması yenidən gündəmə gəlib...
Elşad Həsənov: “Hesab edirəm ki, dünyada vəziyyətin bu cür qarışıq olduğunu nəzərə alaraq Azərbaycan dövlətinin quru sərhədləri bağlı saxlaması tamamilə doğru bir qərardır”
Uzun müddətdir ki, Azərbaycanın Gürcüstanla, eləcə də digər qonşularımızla quru sərhədləri bağlıdır. Quru sərhədlərin açılması məsələsi tez-tez müzakirə olunur və əksər vətəndaşlarımız belə düşünür ki, sərhədlərin açılması vacibdir.
Daha çox da Gürcüstanda yaşayan soydaşlarımız, onların burada yaşayan yaxınları bu fikri səsləndirir.
Quru sərhədlərin koronavirus pandemiyası səbəbindən bağlandığı məlumdur.
Gürcüstanda baş verən son təlatümləri, Qərbin, Avropa İttifaqının emissarlarının bu ölkədə yaratdıqları qarşıdurmaları nəzərə alıb deyə bilərik ki, quru sərhədlərimizin bağlı olmasının bizim üçün faydaları daha böyükdür.
Gürcüstanla quru sərhədinin bağlı olması Azərbaycanı hansı problemlərdən uzaq tutur? Bunun ölkəmizin təhlükəsizliyi baxımından əhəmiyyəti nədir?
Ekspertlər qeyd edirlər ki, quru sərhədin bağlı olması indiki şəraitdə təhlükəsizlik baxımından çox əhəmiyyətlidir.
“Bu birbaşa Azərbaycan vətəndaşlarının təhlükəsizliyinin təmin edilməsinə xidmət edir”
Siyasi ekspert Elşad Həsənov “Bakı-Xəbər”ə şərhində bildirdi ki, hər bir dövlətin başlıca borcu əhalisinin və dövlətin təhlükəsizliyini təmin etməkdir. “Dövlətin də öz təhlükəsizliyini təmin etməsinin bir neçə yolu var. Dövlətin güclü ordusu, möhkəm qorunan sərhəddi və təbii ki, təhlükəsizlik orqanları, təhlükəsizlik sisteminin bütün atributları olmalıdır. Bunun üçün Azərbaycan dövləti çox işlər görüb və ona görə də ölkəmiz ayrıca bir cənnət guşəsidir, təhlükəsiz, sabitliyin hökm sürdüyü bir məkandır. Bu gün dünya qarışıb. Demək olar ki, dünyanın çox yerində qarışıqlıqdır, müharibələr gedir. Ancaq Azərbaycanda sabitlikdir, sakitlikdir. Azərbaycan dövləti erməni işğalından azad etdiyi torpaqlarda tikinti-quruculuq, bərpa işləri görür, keçmiş qaçqınları, məcburi köçkünləri azad ərazilərə köçürür, öz ata-baba yurdlarına qaytarır. Yəni bu gün bizim quru sərhədlərimiz də məhz təhlükəsizlik baxımından bağlıdır. Bu nəyə görə belədir? Doğrudan da çətin bir dövrdür, bizə qarşı təhdidlər var, yaxın qonşularımızdan ölkəmizə qarşı istifadə etmək istəyən qüvvələrin olduğu gizlin deyil. Azərbaycanın yeraltı və yerüstü sərvətlərinə göz dikənlər az deyil. Buna görə də, Azərbaucan dövləti özünün təhlükəsizliyini təmin etmək üçün müxtəlif yollardan istifadə edir, o cümlədən də bizim pandemiya dövründən bağlı qalan quru sərhədlərimiz son dövrlər məhz təhlükəsizlik baxımından bağlı saxlanılır. Quru sərhədimiz bağlı olsa da, hava məkanımız açıqdır və insanlar təyyarə ilə gedib-gəlirlər. Bəzən deyirlər ki, terrorçular, ölkəmizdə qarışıqlıq yaratmaq istəyənlər təyyarə ilə də gəlib burda istədiklərini edə bilərlər. Xeyr, heç də elə deyil. Çünki təyyarə ilə gələn adamlar yoxlanılır, şübhəli olanlar nəzarətə götürülür. Bu mənada təhlükəsizlik orqanları qarşılarında duran məsələləri daha yaxşı bilirlər, reallığı qiymətləndirirlər. Bizim qonşu Gürcüstanla strateji müttəfiqliyimiz var və bu ölkə ilə də quru sərhədlərimiz bağlıdır. Son illərdə Gürcüstanda İranın aktiv iş aparması, orada yaşayan azərbaycanlılar arasında müəyyən nifaq toxumu səpməsi, şiə-sünni məzhəbləri arasında münasibətləri daha da qızışdırması halları baş verir. Demək olar ki, Gürcüstanda azərbaycanlıların kompakt yaşadığı yerlərin əksəriyyətində İran öz təsirini göstərir, orda məscidlər açıblar, gəncləri İrana aparıb onlara Qumda təhsil veriblər, eyni zamanda bilirik ki, həm də onlara təlimlər keçiblər. Yəni bu mənada onlardan istifadə etməklə Azərbaycanda vəziyyəti gərginləşdirmək üçün iş apara bilərlər. Bütün bunları nəzərə alan dövlət də hələlik quru sərhədləri bağlı saxlayır”.
E.Həsənov qeyd etdi ki, hazırda Gürcüstanda vəziyyət çox ağırdır və qonşu ölkədə xarici qüvvələr aktiv iş aparırlar. “Gürcüstanın baş naziri bəyan etdi ki, etiraz aksiyalarında, təxribatlarda iştirak edən 10 nəfər xarici vətəndaş saxlanılıb. Yəni bunların 8-i Rusiya, 1-i Belarus, 1-i isə ABŞ vətəndaşıdır. Yəni bunlar hələ təxribatlarda açıq şəkildə iştirak edənlərdir, amma gizlində fəaliyyət göstərənlərin sayı isə hələ məlum deyil, bunlar üzə çıxmayıb. Çünki istənilən aksiyanın arxasında müəyyən qurumlar, müəyyən təşkilatlar durur”.
E.Həsənovun sözlərinə görə, Gürcüstanda vəziyyətin gəlib bu həddə çatması və vətəndaş qarşıdurmasına çevrilməsi üçün xarici xüsusi xidmət orqanları ciddi cəhdlə çalışırlar. E.Həsənovun qeyd etdiyinə görə, may ayından bu yana Avropa İttifaqı, eləcə də ABŞ açıq-aşkar bəyan etdi ki, biz Gürcüstanda hakimiyyəti dəyşəcəyik. “Elə bu səbəbdən də Gürcüstan dövlətinə ayrılan maliyyə yardımı dayandırıldı. Avropa İttifaqı Gürcüstan dövlətinə ayırdığı 100 milyon avronu seçkilərdən sonra radikal müxalifətə yönəldəcəyini bildirdi. Onlar tələb etdilər ki, yenidən seçki keçirilsin və onların maliyyələşdirdikləri radikal müxalifət hakimiyyətə gəlsin. Əgər Avropa İttifaqının istədikləri baş verərsə, yəni Avropa İttifaqının dəstəklədiyi radikal müxalifət hakimiyyətə gələrsə, təbii ki, qısa müddətdən sonra Azərbaycanda da çaxnaşma yaratmağa çalışacaqlar. Onlar neçə illərdir ki, Azərbaycana qarşı təxribatlar törətməyə çalışırlar, amma bütün bunların qarşısı qətiyyətlə alınır. Çünki Azərbaycan xalqı vahiddir, Azərbaycan xalqı ən böyük problemimiz olan Qarabağ problemini həll etdi, bu gün tikinti-quruculuq işləri ilə məşğuldur. Azərbaycan xalqı öz liderinin, Müzəffər Ali Baş Komandanın ətrafında sıx birləşib və ona görə də Azərbaycana onların müdaxiləsi alınmır. Ancaq hesab edirəm ki, əgər onlar da bu gün Gürcüstana etdikləri qədər bizim müxalifətə 100 milyonlarla yardım etsələr nəyisə dəyişməyə çalışa bilərlər. Ancaq bizim müvafiq dövlət qurumları ayıq-sayıqdırlar, işlərini gözəl bilirlər, peşəkardırlar, o cür qüvvələrin işlərinin qarşısı qətiyyətlə alınır. Gürcüstanda isə, təbii ki, bu qüvvələr ayaq açıb yeriyirlər, istədiklərini edə bilirlər, ona görə də orda vəziyyət getdikcə daha da gərginləşir. Hesab edirəm ki, dünyada vəziyyətin bu cür qarışıq olduğunu nəzərə alaraq Azərbaycan dövlətinin quru sərhədləri bağlı saxlaması tamamilə doğru bir qərardır. Bu birbaşa Azərbaycan vətəndaşlarının təhlükəsizliyinin təmin edilməsinə xidmət edir”-deyə E.Həsənov bildirdi.
İradə SARIYEVA
