Rusiya-Ukrayna müharibəsində daha bir cəbhə açıldı - Kurskda şiddətli döyüşlər gedir, Ukrayna azı 8 kəndi ələ keçirib...
Ukraynanın Rusiyanın cənubundakı Kursk bölgəsinə doğru irəliləməsi ilə müharibədə daha bir cəbhə açıldı. Bölgədə şiddətli toqquşmalar yaşanır, hər iki tərəfdən çoxlu sayda ölən və yaralananların olduğu bildirilir. Rusiya bölgədə fövqəladə vəziyyət elan edib, Rusiya bölgədəki hədəflərə zərbələr endirildiyini bildirir.
Bununla belə, Müdafiə Nazirliyi ilə əlaqəli “Rybar” Teleqram kanalı yazır ki, Rusiya qoşunlarının Ukrayna Silahlı Qüvvələrinin irəliləməsini dayandırmaq cəhdlərinə baxmayaraq, "böhran miqyası genişlənir" və Ukrayna ordusunun taktikası hələ də rus ordusunun əks-hücum imkanlarından üstündür.
Çeçenistanın “Axmat” xüsusi təyinatlılarının komandiri Apti Alaudinov da, Kursk vilayətində Ukrayna Silahlı Qüvvələrinin 10 km dərinliyə daxil olmasını və Ukrayna hərbçiləri tərəfindən bölgədəki yaşayış məntəqələrinin ələ keçirilməsini etiraf edib.
Kursk vilayətində döyüşlər artıq üçüncü gündür davam edir. Telegram kanalları yazır ki, döyüşlər təxminən 1150 kvadrat kilometr ərazidə 30-dan çox yaşayış məntəqəsini əhatə edir. Yayılan son məlumatlara görə, Ukrayna ordusu Kursk bölgəsində azı 15 km dərinliklərə doğru irəliləyib. “Rybar” kanalı görə, Ukrayna Silahlı Qüvvələri 8 yaşayış məntəqəsini ələ keçiriblər. Başqa bir yaşayış məntəqəsinə də giriblər və orada döyüşdə başlayıb. Həmçinin, ukraynalı hərbçilər Olqovka, Kremyanoye və Korenevonu da ələ keçirməyə çalışır. Hazırda sözügedən yaşayış məntəqələri ətrafında da döyüşlər gedir.
Rusiya Müdafiə Nazirliyinın yaydığı son məlumatda, Ukrayna Silahlı Qüvvələrinin Sudja yaxınlığında və Kursk vilayətinin digər yaşayış məntəqələrində məğlubiyyətə uğradığı bildirilib. Nazirlik Ukraynanın itkilərini də açıqlayıb - 945 hərbçi.
Qeyd edilir ki son bir gündə Ukrayna ordusu dörd tank, beş zirehli transportyor, 18 zirehli döyüş maşını, 155 millimetrlik “Em 777” haubitsa, 155 millimetrlik “Krab” özüyeriyən artilleriya qurğusu və 152 millimetrlik “De-20” haubitsa itirib.
Rusiya Müdafiə Nazirliyinin məlumatına görə, Ukrayna ordusu Kursda ümumilikdə 900-dən çox əsgərini və 100-dən çox zirehli texnikasını itirib.
Məlumatda bildirilir ki, Rusiya ordusu Ukrayna qoşunlarının regionun dərinliklərinə doğru hücum əməliyyatlarını dayandırıb. Əməliyyatlarda Şimal Qrupunun qoşunları və ehtiyat hissələri də iştirak edib.
TAHİR
