Rusiyanın Kursk bölgəsində ağır döyüşlər gedir - Ukrayna ordusu hücuma keçdi, Putin təcili toplantı çağırdı...
Rusiya-Ukrayna müharibəsində gərginlik artır. Ukrayna ordusu avqustun 6-da səhər saatlarından Rusiyanın Kursk ərazisinə şiddətli hücumlara başlayıb və bölgədə hazırda şiddətli döyüşlər gedir.
Ukrayna mətbuatının yazdığına görə, ukraynalı hərbçilər Nikolayevo-Dariyno, Darıyno və Sverdlikovo yaşayış məntəqələrinə daxil olublar. Geniş yayılmış məlumatlara görə, Ukrayna silahlı qüvvələri cənub-şərq istiqamətində 38K-004 magistral yolu boyunca nəzarət zonasını genişləndirə bilib və Sujinin qərb kənarına doğru irəliləyiblər.
Rusiya Müdafiə Nazirliyi ordu qüvvələrinin Kursk bölgəsinin dərinliklərində Ukrayna silahlı qüvvələrinin irəliləyişini dayandırdığını bəyan edib. Nazirlik Kursk bölgəsinə hücum edən Ukrayna ordusunun itki verdiyini və əks əməliyyatın davam etdiyini açıqlayıb.
Ukrayna Rusiya sərhədinə doğru addım-addım irəliləyərkən prezident Putin təhlükəsizlik qüvvələri ilə təcili toplantı keçirərək vəziyyəti dəyərləndirib. Toplantıda təxminən 1000 Ukrayna əsgərinin Kursk bölgəsinə hücuma keçdiyini deyən Baş Qərargah rəisi Valeri Gerasimov Ukraynanın 315 nəfər itki verdiyini, onlardan 100-nün öldürüldüyünü, 215-nin isə yaralandığını bildirib. 7-si tank olmaqla 54 zirehli texnika məhv edilib.
Gerasimov, Rusiya qüvvələrinin hücumlara qarşı əməliyyatının davam etdiyini bildirib. Onun sözlərinə görə, əməliyyat dövlət sərhədinə çatana qədər davam edəcək.
Ukrayna sərhədi yaxınlığında yerləşən Rusiyanın Kursk vilayəti qubernatorunun müavini, eyni zamanda qubernatoru vəzifəsini icra edən Aleksey Smirnov isə bildirib ki, Rusiya və Ukrayna hərbi qüvvələri arasında baş verən qarşıdurmalara görə, bölgədə fövqəladə vəziyyət elan edilib. O, vəziyyətin "çətin" olduğunu, lakin nəzarət altında olduğunu bildirib.
Smirnov Rusiya-Ukrayna sərhədində hücuma məruz qalan yaşayış məntəqələrindən dinc sakinlərin təxliyyəsinə başladıqlarını və bir gündə yüzlərlə mülki vətəndaşın bölgədən təxliyə edildiyini bildirib.
TAHİR
