Peyk görüntüləri ortaya çıxdı - Rusiya Suriyadakı donanmasını geri çəkir?...
“Heyet Tahrir Eş-Şam” (HTŞ) təşkilatı Bəşər Əsədi devirərək Suriyada Dəməşqə nəzarəti ələ keçirdikdən sonra Rusiyanın ölkədən çəkildiyi iddia edilir. Rusiya donanmasına aid gəmilərin Aralıq dənizindəki Tartus Hərbi Dəniz Bazasından bir-bir çıxdığı, bəzilərinin isə Suriya sahillərində lövbər saldığı görüntülənib.
ABŞ-ın “Maxar” peyk təminatçısı tərəfindən açıqlanan görüntülərdə, dekabrın 5-də Rusiya donanmasına aid 3 idarə olunan raket freqatı və ən azı 2 dəstək gəmisi Tartus limanında olub. Lakin dekabrın 10-da bu gəmilər ərazidən uzaqlaşıb.
“Naval News”un məlumatına görə, bazanın iki “Admiral Qorşkov” sinifli freqatı və bir “Admiral Qriqoroviç” sinifli freqatı Rusiya donanmasının ən müasir suüstü gəmiləridir. Hər iki gəmi uzaqmənzilli “Kalibir” hücum raketi və “Tsirkon” hipersəs gəmi əleyhinə raket daşıya bilir.
Rusiya isə Suriyadan donanmasını geri çəkməsi ilə bağlı iddiaları rədd edib. Rusiyanın xarici işlər naziri Sergey Lavrov peykdən çəkilən görüntülərin yanlış şərh edildiyini bildirib.
Lavrov gəmilərin Aralıq dənizində davam edən təlimlər səbəbindən hərəkətdə olduğunu və peyk görüntülərinin "başqa bir vəziyyətlə qarışdırıldığını" deyib.
Qeyd edək ki, Tartus uzun müddət Rusiya üçün Aralıq dənizindəki mühüm baza və dəniz qüvvələri üçün logistika mərkəzi kimi tanınır. 1970-ci illərin əvvəllərində Sovetlər tərəfindən tikilən baza Soyuq Müharibədən sonra Rusiya 2012-ci ildə Krımı tutana qədər nadir hallarda istifadə edilib.
Tartus Ukraynada müharibənin ilk günlərində Rusiya əməliyyatları üçün istifadə edilən gəmilərə ev sahibliyi edib. Tartus və Latakiyadakı Hmeymim Hava Bazası Rusiya əməliyyatlarına dəstək üçün mühüm mərkəzə çevrilib.
TAHİR
