Bayden administrasiyası azərbaycanlı “jurnalistləri” belə “rasxoda” verir...
Xəyal Bəşirov: “Bu oyuna alət olan həm daxildəki, həm də xaricdəki sapı özümüzdən olan baltaların xəyanətkar addımları…”
Öz gözündə kərəni seçməyib özgəsinin gözündə tük axtaran Co Bayden administarsiyası əvvəlcə özünə baxmalıdır, öz qüsurlarını düzəltməlidir, sonra nə iləsə bağlı başqasına irad bildirməlidir.
Məlum, Bayden dönəmində ABŞ-ın özündə korrupsiya halları baş alıb gedir. Pentaqonda on milyardlarla dollar yeyinti aşkarlanır, nə qədər cinayətlər baş verir, insan hüquqları pozulur, hər il polis tərəfindən yüzlərlə aksiya iştirakçısı öldürülülür, onlar zorakılığa məruz qalırlar. Amma Bayden adminstrasiyası Pentaqonda baş verən maliyyə maxinasiyalarını, pul yeyintilərini, baş verən cinayətləri, insan haqlarının pozulması faktlarını qətiyyən araşdırmır və kimsəyə də imkan vermir ki, bu barədə bir cümlə yazsın, danışsın. Bayden adminstarsiyası ABŞ-da baş verən qanunsuzluqları araşdırmaq, cinayətkarları cəzalandırmaq əvəzinə Azərbaycan kimi ölkələrdə təxribatla məşğul olmağa, öz adını başqasına qoymağa çalışır, müəyyən milli xəyanətkarları, satqınları pulla ələ alır, öz maraqlarına uyğun işlədir, onları yalan məlumatların araşdırılmasına sövq edir, hazır materiallar təqdim edərək altında onların imzalarının qoyulmasına nail olur. Sonra da o adamlar qanunun tələbi ilə cəzalananda onları “qəhrəman”, “söz azadlığı mücahidləri” kimi qələmə verməklə məşğul olur. Hətta Bayden administrasiyası ayrı-ayrı ölkələrdə “hüquq müdafiəçisi” adı altında müxtəlif insanlara mükafatlar verib, onları öz dövlətlərinə xəyanət etməyə sövq edir.
Ekspertlər deyir ki, Bayden administrasiyası ABŞ-ın daxilindəki problemlərlə məşğul olmaq əvəzinə, Azərbaycan kimi ölkələri qaralamaqla öz çirkin siyasətini bir daha nümayiş etdirir.
Ekspertlər qeyd edir ki, korrupsiya ilə bağlı araşdırmalar ilk növbədə ABŞ-ın özündə aparılmalıdır ki, Pentaqonda baş verən milyardlarla dollar maxinasiyasına qiymət verilsin. Ekspertlərə görə, Bayden öz cinayətkar oğlunu azad etməklə, onu qanundan qaçırmaqla dünyaya mənfi bir nümunə təqdim etdi.
“Yaxşı olardı ki, Bayden administrasiyası bizi əsassız ittiham etmək əvəzinə, Pentaqonda baş verən maliyyə cinayətlərini, daxildəki polis zorakılığını, insan hüquqlarının pozulması hallarını araşdırsın”
Siyasi və Hüquqi Araşdırmalar Mərkəzinin rəhbəri Xəyal Bəşirov “Bakı-Xəbər”ə şərhində bildirdi ki, Bayden hakimiyyətə gəldikdən sonra ABŞ-ın daxilində vəziyyət tamamilə dəyişdi və bu gün dünyanın diqqətindən qaçmayan neqativ hallar baş verdi, lakin baş verənlərin heç birinə hüquqi qiymət verilmədi. “Bayden administrasiyası dönəmində ABŞ-da baş verən qanunazidd hallar, Pentaqondakı böyük maliyyə yeyintiləri, insan hüquq və azadlığına qarşı baş verən qanunsuz halların heç biri araşdırılmadı. Uzağa getməyək, ABŞ polisinin vətəndaşlara, xüsusən də qaradərililərə qarşı zorakılıqları, daxildəki vətəndaş qarşıdurması Bayden administrasiyasını qətiyyən maraqlandırmır, amma başqa ölkələrə dərs keçməyə cəhd göstərilir. Yaxşı olardı ki, Bayden administrasiyası bizi əsassız ittiham etmək əvəzinə, Pentaqonda baş verən maliyyə cinayətlərini, daxildəki polis zorakılığını, insan hüquqlarının pozulması hallarını araşdırsın, cinayətkarları cəzalndırsın. Bunu etmir, amma başqalarına yol göstərir. Onların Azərbaycana qarşı çirkin niyyətləri heç zaman baş tutmayacaq və bütün əməlləri də, emissarları da ifşa olunacaq, bütün cinayətkarlar öz cəzalarımı alacaqlar. Bilirsiz ki, heç nə gizlin qalmır və hər şey ifşa olunur”.
X.Bəşirov vurğuladı ki, bütövlükdə Ukrayna, Gürcüstan və bir sıra ölkələrin nümunəsi Co Bayden administrasiyasının mövcud siyasətini ifşa etdi. O qeyd etdi ki, ABŞ müxtəlif yollarla ayrı-ayrı dövlətlərə aid olan insanları ələ alır, onlardan istifadə edir: “ Bütün bunlar göstərdi ki, Bayden administrasiyası müxtəlif ölkələrin vətəndaşlarını ayrı-ayrı ələ almaq üsulu ilə o dövlətlərin daxili işlərinə qarışır. Bu, daha çox media və ictimi-siyasi proseslərdə iştirak edən vətəndaş cəmiyyəti üzvləri vasitəsilə həyata keçirilir. Məhz ona görədir ki, Gürcüstanda və digər dövlətlərdə konkret olaraq bir sıra qanunların qəbul olunması məsələsinə təsir göstərməyə təsir göstərirlər. Bunlar hansılardır? Məsələn, ayrı-ayrı dövlətlərdə təhsil, pensiya sahəsində və digər istiqamətlərdə qanunlar qəbul edilir. Bunlarla bağlı Qərb ölkələrinin, ABŞ-ın, onun institutlarının və digər beynəlxalq təsisatların reaksiyasını görürük. QHT və media, eləcə də siyasi partiyalarla bağlı qanunların qəbul edilməsi zamanı onların reaksiyalarının, təpkilərinin şahidi oluruq. Niyə? Çünki o sahələrdə fəaliyyət göstərən insanları ələ almaq yolu ilə dövlətlərin daxili işlərinə qarışırlar. O cümlədən də Azərbaycana münasibətdə bunun şahidi oluruq.
Qonşu Gürcüstanda baş verən proseslər zamanında həmin o şəxslərlə bağlı tədbirlərin görülməməsinin nəticəsdir. Düzdür, Gürcüstan dövləti sonradan xarici agentlərlə bağlı qanun qəbul edilməsi üçün addımlar atdı. Amma bu yöndə illər əvvəl addım atılması lazım idi ki, bu prosesin qarşısı vaxtında alınsın”.
Bayden administrasiyasının Azərbaycanı əsassız yerə qaraladığını deyən X.Bəşirovun sözlərinə görə, biz bu istiqamətdə bir çox xoşagəlməz davranışların şahidi oluruq. “Ayrı-ayrı şəxsləri əsassız məlumatlarla təmin edirlər, onları müxtəlif şirnikləndirici üsullarla dövlətə qarşı yönəldirlər. Onlar daxili vəziyyəti, onların addımlarının narazılıqla qarşılandığını nəzərə almadan belə şəxsləri Azərbaycanın daxili işlərinə qarışmaq məsələlərinə sövq edirlər. Biz ayrı-ayrı dövlətlərin daxili işlərinə qarışmaq kimi məsələlərin, siyasi əndazəyə, diplomatik çərçivəyə sığmayan, dövlətlərarası münasibətlərin heç bir müddəası ilə uzlaşmayan reaksiyaların şahidi oluruq. Bunun bir adı var - ikiüzlülük. Əllərində insan hüquq və azadlıqlarını, demokratiyanı bayraq etməklə ayrı-ayrı dövlətlərə təsir göstərmək, daxilinə nüfuz etmək məqsədi güdürlər və bu yolla onları öz diqtələrinə tabe etmək istəyirlər. Azərbaycan belə diqtələrə boyun əymir, belə münasibətləri qəbul etmir, buna sərt reaksiya göstərir, adekvat cavab verir. Ona görə də, Azərbaycana qarşı beynəlxalq aləmdə səfərbərləşmə baş verir”.
X.Bəşirovun sözlərinə görə, Azərbaycanın pandemiya çərçivəsində atdığı addımlar, COP29 tədbirinə ev sahibliyi etməsi, Qoşulmama Hərəkatı vasitəsilə dünyada neokolonialist siyasətə qarşı mübarizəsi onları narahat edir. X.Bəşirov bildirdi ki, bu gün Bakı Təşəbbüs Qrupunun vasitəsilə həyata keçirilən tədbirləri və beynəlxalq səviyyədə bəşəriyyəti, insanlığı düşündürən vacib məsələlərlə bağlı Azərbaycanın atdığı addımları qiymətləndirməyənlər bizə çirkab atırlar: “Azərbaycana qarşı belə cılız addımların atılmasını, təbii ki, biz qəbul etmirik. Bu oyuna alət olan həm daxildəki, həm də xaricicdəki sapı özümüzdən olan baltaların xəyanətkar addımları Azərbaycan dövləti və xalqı tərəfindən layiqli şəkildə qiymətləndirilir. İndiyə qədər də belə olub, bundan sonra da belə olacaq. Həmin şəxslər dövlətimizin qanunları qarşısında cavab verəcəklər, eyni zamanda da ictimai qınaq obyektinə çevriləcəklər”.
İradə SARIYEVA
