Sertifikasiyadan kəsilmiş müəllimlər direktor imtahanlarına qatılır - qanunsuz nəsə var?..
Rizvan Fikrətoğlu: “Sertifikasiyadan kəsilən şəxs tələblərə cavab verirsə direktor kimi işə qəbul imtahanında iştirak edə bilər”
Son zamanlar sosial mediada sertifikasiyadan kəsilən müəllimlərin məktəblərdə direktor kimi fəaliyyət göstərmək üçün imtahan verməsi məsələsi müzakirə edilir. Müzakirələrdə bəzi müəllimlərin sertifikasiyadan kəsiləndən sonra onlara verilən bir illik möhlət ərzində direktorluğa namizəd olaraq imtahan verdikləri bildirilir.
Qeyd edək ki, təhsil müəssisələrində müvafiq ixtisas üzrə pedaqoji təhsilə malik olanlar, həmçinin müvafiq ixtisas üzrə pedaqoji təhsili olmayan ali təhsilli mütəxəssislər müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydada pedaqoji fəaliyyətlə məşğul ola bilərlər.
Maraqlıdır, bir il müddətində sertifikasiyadan keçməyən müəllim direktor olaraq fəaliyyət göstərə bilərmi?
“Şəxs sertifikasiyadan kəsilə bilər, ancaq onun idarəetmə təcrübəsi yüksəkdirsə, niyə də olmasın”
Təhsil eksperti Rizvan Fikrətoğlu “Bakı-Xəbər”ə şərhində bildirdi ki, pedaqoji və ya idarəetmə ixtisas sahələri üzrə ixtisaslaşmış, minimum 5 il (təhsilin təşkili və idarə olunması ixtisası üzrə elmi dərəcəsi və elmi adı olduqda 3 il) pedaqoji staja malik və hazırda ümumi təhsil müəssisələrində pedaqoji fəaliyyətlə məşğul olan şəxslər imtahanlarda iştirak edə bilər: “Sertifikasiyadan kəsilən şəxs tələblərə cavab verirsə direktor kimi işə qəbul imtahanında iştirak edə bilər. Həmin imtahanda uğur əldə edən şəxs direktor kimi çalışa bilər. Nəzərə almaq lazımdır ki, direktor idarəetmə vəzifəsidir. Bir şəxs, ola bilsin ki, azərbaycan dili-ədəbiyyət müəllimidir, ancaq sahəsini zəif bilir. Bu şəxs sertifikasiyadan kəsilə bilər. Ancaq həmin şəxsin idarəetmə təcrübəsi yüksəkdirsə, niyə də olmasın. Bu işlər fərqlidir. Direktor idarəetmə vəzifəsidir, müəllim isə öyrədici. Bir insanın sertifikasiyadan kəsilməsi o demək deyil ki, o digər işlərdə çalışa bilməz. Şəxs sertifikasiyadan kəsilibsə, yenidən Müəllimlərin İşə Qəbulu (MİQ) imtahanına girərək, müəllimliyi bərpa edə bilər”.
Günel CƏLİLOVA
