Makronun üzündən Fransa biznesi Azərbaycandan qaçır - faktlar ittiham edir...
Əgər hökumət Fransa şirkətlərinin Azərbaycanı tərk etməsində maraqlı olsaydı, ilk növbədə "Total"ın ölkədən getməsinə çalışardı
Xarici ölkə biznesi əksər hallarda iki ölkə arasında olan siyasi münasibətlərə həssas yanaşır və öz işini bu siyasi münasibətlərə uyğun qurur. Başqa sözlə desək, biznes mənşə ölkə hakimiyyətinin hansı ölkələrlə siyasi münasibətləri rəvandırsa məhz həmin ölkələrə investisiya qoymağa üstünlük verir. Siyasi münasibətlər korlandıqda isə sahibkarlar xoflanaraq ölkədən qaçır. Bu bütün dünyada belədir. Hazırda Fransa sahibkarları da onlara qarşı heç bir yad münasibət olmasa da, Makronun siyasətindən narahat olaraq ölkəni tərk etməyə başlayıb.
Fransanın məşhur "Christian Dior Couture” brendi Azərbaycandakı şirkətini ləğv edib.
Şirkət kreditorlara müraciət edərək bildirib ki, iki ay ərzində tələblərini Bakı şəhəri, Səbail rayonu, Neftçilər pr. küçəsi, ev 105 ünvanına bildirə bilərlər.
Qeyd edək ki, "Christian Dior Couture” əsasən "Dior" kimi tanınır və fransalı milyarder Bernard Arnault tərəfindən idarə olunur. Şirkətin Azərbaycandakı nümayəndəliyinin nizamnamə kapitalı 7.7 milyon manatdan artıqdır. Şirkətin qanuni təmsilçisi Bernard Vincent Simon Pierredir.
Bu gün Makron administrasiyası üzündən Fransa ilə Azərbaycan arasında münasibətlər pisləşsə də ölkədə fəaliyyət göstərən Fransa şirkətlərinə heç bir problem yaradılmayıb. Əksinə, Azərbaycan hökuməti Fransa şirkətlərinin Azərbaycanda fəaliyyət gostərməsində maraqlıdır.
Elə isə "Dior" şirkəti ölkəni nədən tərk edir?
Baki-xeber.com-un sualını cavablandıran politoloq Abutalıb Səmədov bildirdi ki, çox təəssüf ki, Fransa dövləti prezident Makronun dövründə Azərbaycana qarşı ədalətsiz mövqe tutdu və bu missiyasını davam etdirir: "44 günlük müharibə dövründə Fransa prezidenti hamıdan çox fəallıq göstərirdi. Gah Azərbaycan Prezidentinə dalbadal zənglər edib, əks-hücumu dayandırmağı tələb edirdi, gah Litvada çıxış edərək, "Azərbaycanın Qarabağa girməsini Fransa qəbul etməyəcək" kimi bəyanatlar verirdi, gah Azərbaycan tərəfindən terrorçu qrupların döyüşdüyünü deyirdi, gah da digər həmsədir ölkələrin prezidentləri ilə birlikdə bəyanat imzalayıb, tələb edirdi ki, hərbi əməliyyatlar dərhal dayandırılsın. Buna baxmayaraq 44 günlük müharibədən sonra Makronun bəzi davranışları belə bir ümid yaratdı ki, münasibətlərdəki siyasi gərginliyi aradan qaldırmaq mümkün olar. Bu səbəbdən Azərbaycan Prezidenti Brüssel prosesi çərçivəsində Makronla da görüşdü. Sonradan İlham Əliyev Praqada keçirilən Avropa Siyasi Birliyinin toplantısındakı görüşdə Makronun iştirakına etiraz etmədi. Çox təəssüf ki, həmin tarixi sammitdən sonra Fransa televiziyasına müsahibə verən Makron Azərbaycana böhtanlar atmaqda davam etdi. Azərbaycanı "Artsax"a qarşı müharibə etmək"də günahlandırdı, çoxlu sayda insanın ölümundə Azərbaycanın günahı olduğunu söylədi və buna bənzər, həqiqətlə heç bir əlaqəsi olmayan bəyanatlar verdi. Makronun bu cür fikirlərinə etiraz etdik. Ancaq yenə Avropa Siyasi Birliyinin Moldovada keçirilən sammitində Azərbaycan-Ermənistan nümayəndələrinin görüşüdə Makronun iştirakına icazə verdik. Düşündük ki, bizim bu cür xoş məramlı davranışımız Makronu düşünməyə vadar edər. Lakin Moldovadakı sammitdən dərhal sonra Makron yenə anti-Azərbaycan bəyanatlar verməyə başladı. Bəyan etdi ki, o, Qarabağı Paşinyandan daha çox qoruyur, daha çox müdafiə edir, Paşinyan onun qədər aktiv deyil və s. Yalnız bundan sonra Makronun düzəlməyəcəyini anladıq və Qranadada keçirilən Avropa Siyasi Birliyinin toplantısında iştirakdan imtina etdik. Bundan əvvəl Paşinyanın Brüssel görüşündə "Makron da iştirak etməlidir" tələbini qəbul etmədik və Brüssel danışıqlarından da imtina etdik. Çünki göz qabağında idi ki, Makron ədalətsiz mövqe tutur və onun görüşlərdə iştirakı yalnız sülh sazişinin imzalanmasının uzanmasına xidmət edir.
Bütün bu gərginliklərə baxmayaraq Azərbaycanda fəaliyyət göstərən Fransa şirkətlərinə hakimiyyət normal münasibət göstərməkdə davam etdi. Onların normal fəaliyyəti üçün əlindən gələni əsirgəmədi. Yalnız bir faktı qeyd etmək kifayətdir ki, Azərbaycanın ən böyük qaz yataqlarından biri olan "Abşeron" yatağının operatorlarından biri Fransanın "Total" şirkətidir. O bu layihədə 50 faiz paya malikdir. Eyni zamanda digər qaz yataqlarında da "Total" şirkətinin iştirak planları var və Azərbaycandan getmək düşüncəsi belə yoxdur. Əgər hökumət Fransa şirkətlərinin Azərbaycanı tərk etməsində maraqlı olsaydı ilk növbədə "Total"ın ölkədən getməsinə çalışardı.
Yeri gəlmişkən, "Abşeron" yatağında hasilata başlanılmasının gecikməsi səbəblərindən biri "Total" şirkətinin öhdəliklərini vaxtında yerinə yetirməməsi idi. Amma Azərbaycan nəinki "Total" şirkətinin ölkəni tərk etməsini istəmir, onun digər layihələrdə də iştirakında maraqlıdır. Fikrimizcə "Dior" şirkətinin Azərbaycanı tərk etməsinin kökündə Makron siyasətinin xofu dayanır. Fransa şirkətlərinin rəhbərlərindən siyasi prosesləri izləyənlər Makronun Azərbaycana qarşı düşmənçilik mövqeyindən vahiməyə düşərək ölkəni tərk etmək qərarına gəlirlər. Onlar düşünür ki, Makronun bu düşmən mövqeyi enində-sonunda onların başında çartlaya bilər. Ona görə də belə düşünən Fransa şirkətləri Azərbaycanı tərk edir. Bunun isə yeganə günahkarı Fransa prezidenti Emmanuel Makrondur.
Görünür "Dior" şirkətinin rəhbəri düşünür ki, Fransanın ədalətsiz mövqeyi gələcəkdə ona hansısa problemlər yarada bilər. Ona görə də ölkəmizi tərk edib. Amma fikrimizcə bu yanlış düşüncədir. Çünki Makron əbədi deyil, onun müddətinin bir hissəsi keçib artıq, belə getsə heç o, müddətini sona çatdıra bilməyəcək. O üzdən Makrona görə Azərbaycanı tərk etməyə dəyməz. Əksinə, Fransa şirkətləri Azərbaycana daha çox investisiya qoymağa cəhd göstərməlidirlər. Çünki Azərbaycan dünyanın ən sabit ölkələrindən biridir. Sabitliyin isə biznes üçun nə qədər əhəmiyyətli olduğunu onlar hamıdan yaxşı bilir".
Dəniz NƏSİRLİ
