Türkiyədən Azərbaycana geyim satışı 35 faiz düşüb - niyə?..
Kamran Məmmədli: “Türkiyə İxracatçıları Məclisi rəsmi ixrac rəqəmlər üzərindən işlədiyi üçün onlayn ticarət nəzərə alınmır
Azərbaycan vətəndaşları geyim məsələsində bacardıqca xarici mallara üstünlük verir, azı "türk malı" almağa çalışırlar. Türkiyə İxracatçıları Məclisi isə cari ilin yanvar-fevral ayları ərzində Azərbaycanın Türkiyədən aldığı geyim və geyim üçün lazım olan ləvazimatların həcminin kəskin azalması ilə bağlı hesabat yayıb.
Bildirilir ki, iki ay ərzində Türkiyədən 10 milyon 84 min ABŞ dolları dəyərində geyim və geyim üçün lazım olan ləvazimatlar alınıb ki, bu da ötən ilin eyni dövrü ilə müqayisədə 3 milyon 510 min ABŞ dolları, yaxud da 35,3 faiz azdır.
Maraqlıdır ki, Türkiyədən onlayn üsulla geyim sifarişi gün keçdikcə daha da populyarlaşır. Belə olan halda statistikada azalmanın olması müəyyən suallar yaradır.
“Son zamanlar Türkiyədə məhsullarının bahalaşması müşahidə olunur, çünki bu ölkədə inflyasiya çox sürətlə gedir”
Iqtisadçı Kamran Məmmədli “Bakı-Xəbər”ə açıqlamasında qeyd etdi ki, Türkiyədən geyim almaq yerli məhsulu almaqdan ucuz başa gəlir. Çünki Türkiyədə tekstil sənayesi çox inkişaf edib və dünyanın bir çox ölkələri ilə rəqabətə davam gətirib: “Geyim məhsulları Azərbaycana əsasən Türkiyədən gətirilir. Bu danılmaz faktdır. Geyim idxalının azalması ilə bağlı statistika mənə də maraqlıdır. Çünki geyimə hər zaman tələb var. Sirr deyil ki, ölkə əhalisinin bir qismi alış-verişi məhz Trendyol platforması üzərindən edir. Geyim, əşya, müxtəlif növ avadanlıqlar məhz bu platforma vasitəsilə alınır. “Trendyol”un üstünlüyünün səbəblərindən biri də qiymətin nisbətən ucuz olmasıdır. Bu səbəbdən də istehlakçılar “Trendyol”-a üstünlük verir. Türkiyə İxracatçıları Məclisi rəsmi ixrac rəqəmləri üzərindən işləyir. Amma bu zaman aparılan onlayn ticarət nəzərə alınmır. Azərbaycanda isə son zamanlar onlayn ticarət sürətlə inkişaf edir”.
Həmsöhbətimiz onu da əlavə etdi ki, son zamanlar Türkiyədə məhsulların bahalaşması müşahidə olunur. Çünki bu ölkədə inflyasiya çox sürətlə gedir. Həmçinin, ölkəmizdə əhalinin alıcılıq qabiliyyəti aşağı düşüb.
Günel CƏLİLOVA
