Paşinyan müharibə qızışdıran katolikosu 2-ci dəfə İTV efirinə buraxmadı...
Akif Nağı: “Paşinyan bütün resurslardan istifadə edib antisülh və antipaşinyan mövqeyindən çıxış edən katolikosun mövqeyini sıradan çıxarmaq istəyir”
Ermənistanın İctimai Televiziyası bütün ermənilərin katolikosu II Qareginin Yeni il müraciətini yayımlamaqdan imtina edib.
Qeyd edək ki, analoji hal keçən il də baş vermiş və İctimai Televiziya katolikosun Yeni il müraciətini yaymaqdan imtina etmişdi.
Ermənistanın keçmiş ombudsmanı Arman Tatoyan yazıb ki, İctimai Televiziya Şirkətinin katolikosun Yeni il müraciətini Birinci Kanalda yayımlamaqdan imtina etməsi pafoslu siyasi qərarın nəticəsidir. O bildirib ki, onlar katolikosun müraciətini yaymaq üçün nəinki alçaldıcı şərtlər təklif edirlər, hətta manipulyasiyalar edirlər. “Keçən il Birinci Kanalda katolikosun Yeni il müraciətinin yayımlanmasından imtina ən yüksək siyasi səviyyədə pafoslu qərarın nəticəsi idi. Eyni davranış modeli bu il də davam edir. Təəssüf ki, İctimai Yayım Şirkəti siyasi hakimiyyətin təbliği və bu pafoslu siyasi qərarın təbliği rolunu öz üzərinə götürdü”.
O deyib ki, “Erməni Apostol” (əslində erməni Qriqoryan kilsəsi-İ.S) kilsəsinin rolunu və onun erməni xalqının həyatındakı müstəsna tarixi xidmətlərini heç bir siyasi güc, xüsusən də hökumət elitası nə qədər istəsələr də, kilsəni hədəf seçsələr də zəiflədə bilməz.
Bilirik ki, erməni katolikosu, xüsusən də İkinci Qarabağ müharibəsindən sonra erməniləri revanşizmə sürükləyir, Ermənistanla Azərbaycan arasında sülh müqaviləsinin əngəllənməsi üçün hər cür təxribata əl atır, antisülh çağırışları edir.
Paşinyan isə müharibə qızışdıran katolikosu artıq 2- ci dəfədir ki, İTV efirinə buraxmadı.
“Baş nazir hesab edir ki, katolikos İctimai Televizyada çıxış edərsə sülh əleyhinə də çağırışlar edəcək, eyni zamanda onun hökumətinə qarşı da fikirlər söyləyəcək...”
Azad Vətən Partiyasının sədri Akif Nağı “Bakı-Xəbər”ə şərhində “Paşinyna ardıcıl olaraq katolikosla və kilsə ilə bağlı mövqeyini nümayiş etdirir. Baş nazir deyir ki, Ermənistanda hakim mövqeyə malik olan odur və ortaya başqa mövqe qoyula bilməz. Katolikosun da Paşinyana qarşı əks mövqedə olduğu aydındır və o, müxalif qüvvələri dəstəkləyir. Katolikosun erməniləri müharibəyə çağırdığı, revanşizmi dəstəklədiyi, öz ənənəvi çıxışlarında antisülh fikirləri səsləndirdiyini görürük. Paşinyan da öz ölkəsinin imicini düşünərək hesab edir ki, Ermənistanda açıq müharibə çağırışları edilərsə bu onun xeyrinə olmaz, imicinə xələl gətirmiş olar. Məsələnin bu tərəfi də var. Baş nazir hesab edir ki, katolikos İctimai Televizyada çıxış edərsə sülh əleyhinə də çağırışlar edəcək, eyni zamanda onun hökumətinə qarşı da fikirlər söyləyəcək, ermənilərin Paşinyana qarşı etirazını bir az da qızışdıracaq. Bilirsiz ki, son mitinqlər məhz dini xətlə həyata keçirildi və Baqrat Qalstanyan katolikosun, kilsənin, din xadimlərinin razılığı olmadan ortaya düşüb xalqı etiraza çağıra bilməzdi. Bu keşişi bir alət, oyuncaq kimi erməni kilsəsi ortaya atmışdı. O, kilsənin Paşinyana qarşı aləti idi. Bunu da Paşinyan bilir və onlara meydan verməkdən çəkinir”-deyə bildirdi.
A.Nağı hesab edir ki, Paşinyan katolikosa İTV-nin efirində çıxış imkanı verməməklə, əslində öz hakimiyyətini qorumağa çalışır. O qeyd etdi ki, erməni baş nazir getdikcə kilsənin rolunu məhdudlaşdırmağa, zəiflətməyə cəhd edir və bu da tam normaldır, bu mövqedən çıxış edilməlidir. “İran və Şərqdəki bəzi ölkələr istisna olmaqla, dünyanın heç bir yerində, demək olar ki, dini rəhbərlər dövlətin işlərinə qarışmır. Dövlətlər normal şəkildə dünyəvi dövlət formalarını seçiblər. Yəni başqa bir forma yoxdur ki, dini rəhbərlər dövlətin siyasətinə qarışsınlar, bu mümkün deyil, hər yerdə mənfi qarşılanır. İndi o proses Ermənistanda da gedir. Ermənistan o məsələdə çox geridə qalıb. Ermənistanda hələ də dövlətin idarə olunmasında kilsə ciddi rol oynayır. Bu da ondan irəli gəlir ki, ermənilərin dövləti və başqa ciddi təşkilatları olmayıb, həm dini, həm də ictimai-siyasi mərkəz kimi kilsə rol oynayıb. Erməni kilsəsi mövqeyindən geri çəkilmək istəmir və öz rolunu davam etdirmək istəyir. Amma kilsə geri çəkilməlidir. Paşinyan isə bütün resurslardan istifadə edib antisülh və antipaşinyan mövqeyindən çıxış edən katolikosun mövqeyini sıradan çıxarmaq istəyir. Buna tədricən nail olur da. Bu, Paşinyan hökuməti ilə erməni kilsəsi arasında ziddiyyətlərin daha da dərinləşdiyinin göstəricisidir”.
A.Nağının sözlərinə görə, Paşinyan eyni zamanda hiss olunur ki, Eçmiədzin qrupu ilə katolikos II Qaregin arasındakı ziddiyyətdən də istifadə edir, özü birbaşa qadağan etmir, amma onları parçalamağa cəhd göstərir. Bunun Paşinyanın yürütdüyü siyasətin formalarından biri olduğunu deyən A.Nağının fikrincə, Paşinyan çalışır ki, erməni kilsəsinə ziddiyyət salıb kilsənin gücünü zəiflətsin. “Bu ondan xəbər verir ki, artıq erməni kilsəsi parçalanır, Eçmiədzin rəhbərliyində fikir ayrılığı var, onların bir qismi hakimiyyəti dəstəkləyir, başqa bir qismi müxalifətin tərəfindədir. Erməni cəmiyyəti parçalandığı kimi kilsə də parçalanır. Kilsə də parçalanırsa, onda erməni ekspertlərin dediyi kimi, Ermənistanın gələcəyi çox böyük şübhə altındadır. Erməniləri birləşdirən iki qüvvə vardı - biri kilsə, biri də xaricdəki erməni mərkəzləri, erməni diasporu. Hər iki qüvvənin daxilində də ziddiyyətlər mövcuddur, parçalanma baş verir, onlarda Ermənistanın gələcəyi ilə bağlı bədbinlik var və əvvəlki kimi planlı şəkildə irəliyə gedə bilmirlər”.
Azərbaycanın bütün bu prosesləri diqqətlə nəzarətdə saxlamalı olduğunu deyən A.Nağı qeyd etdi ki, hələ də Ermənistanda revanşizm davam edir. “Artıq erməni kilsəsinin mövqeyi zəifləyib. Əvvəlki vaxtlar olsaydı heç kim kilsəyə qarşı barmağını uzada bilməzdi. Ter-Petrosyanın da, Köçəryanın da, Sarkisyanın da hakimiyyəti dövründə kilsəyə qarşı heç bir addım atıla bilməzdi. Bütün dünya erməni kilsəsinin müdafiəsinə qalxardı. Amma Paşinyan kilsəni taqətdən salmağa nail olub, katolikos artıq Ermənistanda böyük rola malik deyil”-deyə A.Nağı qeyd etdi.
İradə SARIYEVA
