Adambaşına 450 manata toy menyusu olar?
Bakıda şadlıq saraylarında qiymət artımları qeydə alınıb. Hazırda paytaxtda menyusu 65 manatdan tutmuş 450 manata qədər xidmət təklif edən şadlıq evlərinə rast gəlinir. Qiymətlərin formalaşmasına isə müxtəlif amillər təsir göstərir.
Bakıda yerləşən bəzi şadlıq saraylarındakı menyu qiymətlərini təqdim edirik:
500 nəfərədək qonağa xidmət göstərən "Mona Liza"da qiymətlər 80-110-140 manat aralığında dəyişir.
750 nəfərlik qonağı qarşılamağa malik olan "Grand Neon"da menyu qiymətləri 65 manatdan başlayır. Burada ən bahalı menyu 210 manat təşkil edir.
"Su səsi" şadlıq sarayının toy zalı 850 nəfər üçün nəzərdə tutulub. Burada da menyu qiymətləri müxtəlifliyinə görə 80-100-130 manat müəyyənləşib.
300 və 800 nəfərlik zallara malik olan "Böyük Saray"da qiymətlər 200 manatdan başlayır. Şadlıq sarayında ən bahalı menyu qiyməti isə 400 manat təşkil edir.
"Sapfir Saray" da ən ucuz menyu qiyməti 160 manat, ən bahalı menyu qiyməti isə 450 manatdır.
"Buta Palace"da isə menyu qiymətləri 250 manatdan başlayır. Bununla yanaşı, bu şadlıq sarayı toy sahiblərinin istəyinə uyğun olaraq 300 manatlıq menyu da təklif edir.
Eyyub Hüseynov: “Hazırda şadlıq evlərində tələb təklifi üstələyib, üstəlik, ərzaq məhsulları və xidmətlərdə bahalaşma var”
Azad İstehlakçılar Birliyinin sədri Eyyub Hüseynov “Bakı-Xəbər”ə açıqlamasında bildirdi ki, şadlıq evləri və restoranlarda qiymətlərin bahalaşması təbiidir. Onun sözlərinə görə, bahalaşma hələ davam edəcək: "Çünki hazırda şadlıq evlərində tələb təklifi üstələyib. Üstəlik, ərzaq məhsulları və xidmətlərdə bahalaşma var. Danılmaz faktdır ki, hazırda şadlıq evlərində sifariş verən müştərinin menyuda dəyişiklik etmək ixtiyarı yoxdur. Şadlıq evləri işi elə tərtib edib ki, istehlakçılar az yesin, evə tez getsinlər”.
Eyyub Kərimli: “Günümüzdə restoranlar və şadlıq evləri səbəbsizcə qiyməti qaldırırlar”
Iqtisadçı Eyyub Kərimli hesab edir ki, günümüzdə restoranlar və şadlıq evləri səbəbsizcə qiyməti qaldırırlar: “Digər sahələrdə qiymət artımı baş verib. Bu isə əməkhaqqı və icarə dəyərinin yüksəlməsi ilə əlaqədardır. Düşünürəm ki, süni qiymət artımı doğru yanaşma deyil və mütənasibliyin pozulması hesab olunur. Bunun qarşısını almaq üçün sağlam rəqabət mühitinin təşkil olunmasına ehtiyac var. Həmçinin, bazarda böyük əhəmiyyət kəsb edən bir çox şadlıq sarayları bir nəfərə məxsusdur və xərcləri az olsa da, istədikləri qiyməti təyin edirlər. Əslində, proses tələb və təklif əsasında formalaşmalıdır. Hesab edirəm ki, aidiyyəti qurumlar tərəfindən nəzarət olunmalı və obyektlərdə monitorinqlər keçirilməlidir. Sözsüz ki, təbii rəqabət əsasında qiymətlərin tənzimlənməsi təmin oluna bilər".
Günel CƏLİLOVA
