Gigiyenik məhsullar sürətlə bahalaşır - "bit-birə insanları basacaq"...
Kamran Məmmədli: “Azərbaycana qeyri-ərzaq məhsulları, xüsusən də məişət kimyası və şəxsi gigiyena vasitələri əsasən xaricdən gətirilir”
Son günlər paytaxtda gigiyenik məhsulların qiymətində artım müşahidə olunur. Əvvəllər 5-6 manat təşkil edən baxım məhsulları hazırda marketlərdə 10-12 manata təklif olunur. Qeyd edək ki, ötən ilin sonlarında qida məhsullarının qiymətində, bu ildən isə gigiyenik məhsulların qiymətində artım qeydə alınır.
Maraqlıdır, bu məsələ necə tənzim olunmalıdır?
“Xarici investorların ölkə iqtisadiyyatına investisiya qoymaları üçün normal şərtlər təmin olunmalıdır”
Iqtisadçı Kamran Məmmədli “Bakı-Xəbər”ə şərhində bildirdi ki, Azərbaycana qeyri-ərzaq məhsulları, xüsusən də məişət kimyası və şəxsi gigiyena vasitələri əsasən xaricdən gətirilir: “Bu sahədə Azərbaycanın daxili istehsalı, demək olar ki, yox səviyyəsindədir. Xarici bazarda qeyri-ərzaq məhsulları, xüsusən də məişət kimyası və şəxsi gigiyena vasitələrinin qiyməyi kəskin şəkildə artıb. Ölkəyə bu məhsullar baha qiymətə gətirildiyi üçün marketlərdə də baha satılır. Bu məsələnin həll olunması üçün yerli istehsalı artırmaq lazımdır. Həmçinin, bu işlə məşğul olanlara müəyyən güzəştlər tətbiq edilməlidir.Məsələn, vergi və gömrük güzəştlərini tətbiq etmək və bu yolla da qiymətləri tənzimləmək mümkündür. Bu məsələ hökumətin verdiyi qərardan sonra həll oluna bilər”.
Həmsöhbətimiz onu da əlavə etdi ki, bəzi işbazlar maaş artımından istifadə edərək qiyməti artırmağa cəhd edirlər: “Ticarət şəbəkələrində də təəssüf ki, inhisarçılıq var. Ona görə də qiymətlərdə müsbət dəyişikliklərə müəyyən dərəcədə nail ola bilmirik və nəticədə proses davam edir. Azərbaycanda istehsal mühitinin yaradılması üçün fundamental islahatların həyata keçirilməsinə ehtiyac var. Ən azından biznes mühiti təkmilləşdirilməlidir. Bunun üçün müvafiq institutlar formalaşdırılmalıdır. Xarici investorların ölkə iqtisadiyyatına investisiya qoymaları üçün normal şərtlər təmin olunmalıdır. Yerli istehsalın xammal idxalından asılılığı aradan qaldırılmalıdır. Bütün bunlara nail olunması üçün iqtisadi və siyasi islahatlar bir-birini tamamlamalı, qlobal inteqrasiya gücləndirilməlidir”.
Günel CƏLİLOVA
