Ermənistan İran üzərindən Əsədə hərbi yardım karvanları göndərdi...
Abutalıb Səmədov: "Ukrayna müharibəsi başlamazdan əvvəl ümumiyyətlə bu sahədə heç bir təcrübəsi olmayan Ermənistan indi çip satan ölkələr sırasında dördüncü yerdədir"
Ermənistanın həmişə İran üzərindən Əsəd rejiminə hərbi yardım göndərməsi barədə məlumatlar mütəmadi olaraq medianın gündəmində olub. Amma təəssüf ki, terror rejiminə yardım edən İran illər boyu terroru dəstəkləyən ölkələr sırasına salınsa da, ancaq Ermənistan bu siyahıya salınmayib. Niyə?
“Bakı-Xəbər” qəzetinin sualını cavablandıran politoloq Abutalıb Səmədov bildirdi ki, Ermənistan terrora yardım edən ölkələrdən biri olsa da, ona dünyanın aparıcı ölkələri və beynəlxalq qurumlar həmişə güzəştlə yanaşıb, himayədarlıq ediblər: "Bir şey məlumdur ki, terroru maliyyələşdirən dövlətlərı müəyyən edən qurumlar böyuk dövlətlərin nəzarəti altındadır. Kimin nə dərəcədə terroru maliyyələşdirən olmasını da böyük dövlətlər müəyyən edir. Bu səbəbdən onlar Ermənistanı həmişə himayə ediblər və bundan sonra da davam edəcəklər.
İkinci tərəfdən, aydındır ki, İranın terror təşkilatlarına göstərdiyi yardımın heç bir faizini belə Ermənistanın qarşılamağa iqtisadi-hərbi potensiali yoxdur. Ermənistanın özünün hərbi yardıma çox böyük ehtiyacı var və iki əlini açıb, dünyanı gəzərək ucuz silah axtarır. Aldıqlarının çoxu da keyfiyyətsiz silahlardır. Bu səbəbdən böyük dövlətlər Ermənistanı həm də ciddi qəbul eləmirlər. Ancaq havadarlıq edirlər, bu göz qabağındadır.
Məsələn, Ermənistan Azərbaycanı irqi ayrıseçkilikdə günahlandırmışdı. Beynəlxalq Məhkəmə dərhal qərar qəbul elədi. Düzdür, Beynəlxalq Məhkəmə Ermənistanı da irqi ayrıseçkilik etməkdə günahlandırdı, ancaq hakimiyyət səviyyəsində yox. Azərbaycanı isə hakimiyyət səviyyəsində irqi ayrıseçkiliyi reallaşdırmaqda günahlandırdı. Azərbaycanın iddiasına isə uzun müddətdir ki, baxılıb qurtarmayıb. Hələ Beynəlxalq Məhkəmə bir il də baxılma müddətini uzatdı. Bunun özü də Ermənistana münasibətdə beynəlxalq qurumların nə qədər ədalətsiz yanaşdığının bir göstəricisidir.
Başqa bir misal, Ermənistan dünyanın ən çox çip satan ölkələri arasında ön sıralardadır. Ukrayna müharibəsi başlamazdan əvvəl ümumiyyətlə bu sahədə heç bir fəaliyyəti və təcrübəsi olmayan Ermənistan indi çip satan ölkələr sırasında dördüncü yerdədir. Müharibənin başlanmasından iki ay keçəndən sonra Ermənistanda şirkət yaradılır, həmin şirkət bir il ərzində Rusiyaya 3 milyard dollar dəyərində çip satır. Bütün dünya da bunu görür. Hamıda səhvlər, yanlışlıqlar axtarırlar, ancaq Ermənistandan soruşan yoxdu ki, sən birdən-birə necə dünyanın çip - yarımkeçrici satan dördüncü ölkəsi oldun.
Eyni zamanda, Ermənistanla Rusiyanın tucarət dövriyyəsi 7,5 milyard dollara yaxın olub, yəni Azərbaycandan iki dəfə çox... Amma bu il gözlənilir ki, həmin rəqəm 15-16 milyard dollara qalxsın. Kecən il Ermənistanın ticarət dövriyyəsi 20 milyard dollardan bir az artıq olub, bunun 35 faizindən çoxu Rusiyanın payına düşürdü. Bu il həmin göstərici iki dəfədən də çox artacaq. Maraqlanan yoxdur ki, Ukraynada qırğınlar törədən, Ukraynanı darmadağın edən, dinc əhalini qıran, səhərləri yerlə yeksan edən Rusiyanin Ermənistanla ticarət dövriyyəsi niyə bu qədər artıb, bunun kökundə nə dayanır. Bu da beynəlxalq qurumların və böyük dövlətlərin nə qədər ədalətsiz olduğunun, nə qədər seçimli yanaşmalar nümayiş etdirməsinin bariz nümunəsidir.
Hələ 90-cı illərin sonunda ulu öndər Heydər Əliyev yazıçılarla görüşündə çox açıq şəkildə deyirdi ki, beynəlxalq münasibətlər sahəsində ədalət yoxdur. O böyük dövlət adamı, uzun müddət dünyada baş verən hadisələri müşahidə edən, onun mərkəzində olan, dünyanın ən böyük dövlətlərindən birinin rəhbərlərindən olan Heydər Əliyəv vəziyyəti hamıdan yaxşı bilirdi. Ona görə də biz təəccüblənməməliyik. Ermənistanın iqtisadi gücü artdıqca terrorçu qruplara yardımları 20 dəfə artırsa da, yenə də beynəlxalq qurumlar günahı Türkiyədə və digər İslam dövlətlərində axtaracaqlar. Xırda bir şey tapan kimi onları terrora yardım edən dövlətlər siyahısına salacaqlar. Necə ki, İrani bu siyahıya salıblar və Türkiyəni də daim nəzarətdə saxlayırlar. Reallıq bundan ibarətdir və biz bu reallığı olduğu kimi qəbul edib, işləməyə davam etməliyik.
44 günlük müharibədə hamıya məlum idi ki, Ermənistan silahli muzdlulardan və terrorçu dəstələrdən istufadə edir. Onların çoxu da Suriyadan gəlmişdi. Ancaq Makron bəyanat verdi ki, guya Azərbaycan hərbi əməliyyatlara islamçı-terrorçu dəstələri cəlb edib. Sübut tələb etdik, heç bir səs çıxmadı. Azərbaycanın belə dəstələrə heç ehtiyacı da yox idi. Azərbaycanın yardıma ehtiyacı olsa idi, qardaş Türkiyə var, onun yardımından istifadə edərdi. Ancaq Azərbaycan Türkiyədən mənəvi və siyasi yardım aldı, bunu hamı bilir.
Mən güman edirəm ki, son illər Azərbaycan hakimiyyətinin apardığı siyasət öz bəhrələrini verir. Biz antiterror tədbirlərindən sonra COP29 kimi mötəbər bir tədbirə ev sahibliyi elədiksə, bu, iqlim dəyişmələri ilə bağlı keçirilən konfransların ən uğurlusu oldusa, iqlim dəyismələrindən zərər çəkən ölkələrə yardımlar 3 dəfə artırıldısa, bu, Azərbaycanın apardığı siyasətin nəticəsidir.
Biz Ermənistanın atdığı hər addımı diqqətdə saxlamalı və onu dünya birliyinin nəzərinə çatdırmaq üçün bundan sonra da əlimizdən gələni etməliyik.
Fikrimcə, indiyə qədər bu siyasət öz bəhrəsini verib və bundan sonra da verəcək".
Dəniz NƏSİRLİ
