Avroittifaqın Ermənistandakı missiyasının taleyi bütün Avropa paytaxtlarında müzakirə olunur...
Əli Mustafa: “Bütün bu oyunlarda məqsəd missiyanın müddətini uzatmaqdır”
Avropa İttifaqının Ermənistandakı missiyasının uzadılması ilə bağlı hələlik qərar yoxdur. Bunu Aİ-nin Ermənistandakı müşahidə missiyasının rəhbəri Markus Ritterin müşaviri Marek Kuberski erməni mediasına deyib.
Daha sonra o, bunları qeyd edib: “Biz bunun üzərində işləyirik. Brüsseldəki tərəfdaşlarımız bunu bütün Aİ ölkələrinin paytaxtları ilə məsləhətləşərək hazırlayır. Çünki qərar Avropa İttifaqının 27 üzvü tərəfindən qəbul ediləcək. Biz artıq İrəvandakı Ermənistan hakimiyyəti ilə, Ermənistan vətəndaş cəmiyyəti təşkilatları ilə məsləhətləşmələr aparmışıq. Beləliklə, indi gələcəyimizlə bağlı qərar hazırlanır: bizim mandatımız gələn il fevralın 19-da başa çatır, ona görə də bundan sonra nə edəcəyimizlə bağlı qərar verməliyik”.
Deyir, qərar Avropa İttifaqının 27 üzvü tərəfindən qəbul ediləcək. Belə məlum olur ki, üzv dövlətlərdən biri, məsələn Macarıstan veto qoysa qərar qəbul olunmayacaq. Çünki Aİ-nin qərarları konsensus əsasında qəbul edilir.
“Azərbaycan öz əlaqələri çərçivəsində buna mane olmağa çalışmalıdır”
Sözügedən məsələni “Bakı-Xəbər”ə şərh edən Demokratik Dəyişim Partiyası Təşkilat Komitəsinin sədri Əli Mustafa hesab edir ki, missiyanın fəaliyyəti gələn ilin fevralında bitsə də, onlar indidən işlər aparırlar: “İşlər aparırlar ki, Aİ missiyasının vaxtını uzatsınlar. Bunun bir çox səbəbləri var. Əslində bu, başda Fransa olmaqla, Avroittifaqın regiona girə bilməsi, hərbi-siyasi mövcudluğu üçün bir fürsətdir. Onlar da bu fürsəti əldən buraxmaq istəmirlər. Bu, həm də onların regionda legitim olması üçün bir formadır. Başqa hallarda, təbii ki, bunu əsaslandırmaq çox çətindir. Xüsusən Rusiyanın bölgədə təsiri və maraqları bunu mümkünsüz edir. Ancaq indi belə bir formatda, mandatla burda olmaq Aİ-nin yumşaq formada regiona daxil olmasının əla qarantıdır. Ona görə də bu gün onlar heç bir vəchlə mandatdan imtina etmək istəmirlər. Ona görə də çox güman ki, çalışacaqlar səlahiyyət müddətini uzatsınlar. Digər tərəfdən, Azərbaycanla Ermənistan arasında münasibətlər hələ tam sahmana düşməyib, sülh sazişi imzalanmayıb. Bu baxımdan da Aİ missiya adı altında istəyir ki, tərəflər arasında moderator rolunda çıxış etsin. Bununla özlərinin əhəmiyyətini göstərməyə çalışırlar. Ən nəhayət, Ermənistanı təhlükəsizlik çətiri məsələsində himayə etmək, qorumaq kimi məqsəd güdürlər. Onların niyyətlərindən biri də budur. Zatən Ermənistanı hər zaman dəstəkləyiblər. İndi də o dəstəkləmənin forması kimi sözügedən metoddan istifadə edirlər. İlk baxışdan onlar sankı sülhə, təhlükəsizliyə təminat verirlər. Reallıqda isə onların əsas məqsədi Ermənistanı qorumaqdır. Qonşu dövlətlərin Ermənistana nəsə edib-etməməsindən asılı olmayaraq, onlar bir formada İrəvanı himayə edirlər. Bir köynək yaxın və hər zaman ermənilərə yaxın olduqlarını bu formada ortaya çıxarırlar. Belə bir şəraitdə Aİ-nin verəcəyi qərar onlar üçün çox önəmlidir. Ancaq Aİ-nin qərarları isə konsensus əsasında qəbul olunur. Yəni bütün üzv dövlətlərin gərək razılığı olsun. Əslində Azərbaycan sözügedən missiyanın Ermənistanda olmasında maraqlı deyilsə, o halda biz üzv ölkələrlə bu barədə danışa bilərik. Nəticədə həmin missiyanın səlahiyyət müddəinin uzadılmasını bir formada bloklamaq olar. Çünki Aİ missiyasına ehtiyac yoxdur. Onlar kəşfiyyat fəaliyyətlərini reallaşdırmaq üçün bundan istifadə edirlər. Ona görə də Azərbaycan öz əlaqələri çərçivəsində buna mane olmağa çalışmalıdır”.
Vidadi ORDAHALLI
