Fransanın müstəmləkəsində BMT-nin nəzarəti ilə müstəqillik referendumu tələb edildi...
Azər Həsrət: “BMT səviyyəsində Fransa müstəmləkəçiliyindən əziyyət çəkən xalqların məsələsi qaldırılmalıdır”
Məlum olduğu kimi, Bakı Təşəbbüs Qrupu (BTQ) BMT-nin İnsan Hüquqları Komitəsinə Fransanın kolonial siyasətini ifşa edən alternativ hesabat təqdim edib. Hesabatda Yeni Kaledoniyada BMT-nin nəzarəti altında yeni referendumun keçirilməsinin vacibliyi bildirilib.
Qeyd edək ki, əvvəllər Yeni Kaledoniyada Fransa tərəfindən keçirilmiş referendum saxtalaşdırılıb. Bu səbəbdən də Yeni Kaledoniyanın müstəqilliyi ilə bağlı refendumun BMT tərəfindən keçirilməsi təklif olunur.
“Fransa müstəmləkəçilikdən imtina etməlidir, müasir dövrdə xalqları əsarət altında saxlamaq ayıbdır”
Siyasi şərhçi Azər Həsrət “Bakı-Xəbər”ə açıqlamasında bildirdi ki, yalnız Yeni Kaledoniya deyil, Fransanın müstəmləkəsi altında olan bütün torpaqlarda yerli xalqların azad edilməsi hərəkatı başladılmalıdır: “Bununla bağlı Bakı Təşəbbüs Qrupu müəyyən işlər görür. Ancaq BMT və digər müvafiq qurumlar bununla bağlı lazımi işlər görməlidir. XXI yüzillikdə Fransa kimi dövlət özünə aid olmayan torpaqlarda yerli insanları niyə istila altında saxlamalıdır? İnsan haqlarından danışanlar bu suala cavab verməlidir. Həmin insanların hüquqları təmin olunmalıdır. Hesab edirəm ki, BMT səviyyəsində məlum məsələ qaldırılmalıdır. Nəzərə almaq lazımdır ki, Fransa BMT Təhlükəsizlik Şurasının 5 daimi üzvündən biridir. Dünyanın taleyinə cavabdeh dövlətlərdən biri məhz Fransadır. Fransa dünyaya göstərməlidir ki, doğrudan da dünyanın taleyini həll etmək üçün mənəvi haqqı hələ də qalır. Bax bu haqqı təmin və təsdiq etmək üçün Fransanın özü müstəmləkə altında tutduğu xalqlardan imtina etməlidir. Ümumiyyətlə, Fransa bir zamanlar kütləvi şəkildə işğal etdiyi, təbii resurslarını taladığı, insanlarını soyqırıma məruz qoyduğu bütün xalqlardan üzr istəməli və özünün bütün qalıqlarını o yerlərdən çəkib çıxarmalıdır. Bu məsələ tək Kaledoniya məsələsi deyil. Fransa müstəmləkəçilikdən imtina etməlidir. Müasir dövrdə xalqları əsarət altında saxlamaq ayıbdır”.
Günel CƏLİLOVA
