Neft ölkələri ilə münasibətdə 3 amilə fikir verməsəniz... Əliyevdən hədə yox, ağıllı tövsiyə...
Rəsul Cahangirli: “Hər üç amilə Azərbaycanda ciddi səviyyədə əməl olunub”
Prezident İlham Əliyev “Euronews” televiziyasına müsahibəsində bildirdi ki, neft ölkələrinə münasibət üçün 3 amilə və bu ölkələrin nə etdiyinə diqqət olunmalıdır:
“Son 20 ildə biz Azərbaycanda yoxsulluğun səviyyəsini 50 faizdən 5 faizə endirdik. Sizin Bakıda bütün gördükləriniz infrastrukturun tamamilə yeni inkişafı və insanların həyat səviyyəsinin yaxşılaşmasıdır. Əfsuslar olsun, indi deyirlər ki, qazıntı yanacağı təhlükəlidir, mənfidir və günah bu ehtiyata sahib olan ölkələrdədir. Mənim mesajım ondan ibarət idi ki, bizə gördüyümüz işə görə, gəlirlərdən insanların ehtiyaclarını təmin etmək və yaşıl enerji gündəliyinə təkan vermək üçün necə istifadə etdiyimizə görə qiymət verin. Ümidvaram ki, mesajım eşidiləcək”.
“Böyük neft gəlirləri hesabına qeyri-neft sektorunun, o cümlədən yaşıl enerjinin inkişafına sərmayələr qoyuldu”
Məsələ ilə bağlı “Bakı-Xəbər”ə açıqlama verən ekspert Rəsul Cahangirli hesab edir ki, hər üç amilə Azərbaycanda ciddi səviyyədə əməl olunub: “Birincisi, Azərbaycan neft hasilatı sahəsində çox böyük işlər görüb. Xarici neft şirkətləri ilə kontraktlar imzalandı. Xəzərin dərin yataqlarından neft hasil olundu. Neft-qazı xaricə ixrac etmək üçün infrastruktur yaradıldı. Yeni kəmərlər çəkildi. Hasil olunan bu məhsullar dünya bazarına çıxarıldı. İkincisi, Azərbaycan neft-qazdan əldə etdiyi milyardlar hesabına böyük sosial layihələr həyata keçirdi. Ölkədə 3 mindən çox məktəb yenidən quruldu və yaxud da yenisi tikildi. Xəstəxanalar tikildi, yeni yollar çəkildi, qaçqın və məcburi köçkünlərin mənzil şəraiti yaxşılaşdırıldı. Əhalinin maaşları, pensiya və müavinətləri artırıldı. Üçüncüsü, böyük neft gəlirləri hesabına qeyri-neft sektorunun, o cümlədən yaşıl enerjinin inkişafına sərmayələr qoyuldu. Emal müəssisələri yaradılır. Büdcənin formalaşmağında qeyri-neft sektorunun payı yavaş-yavaş yüksəlir. Azərbaycan ənənəvi enerji ölkəsi olsa da, yaşıl enerjinin inkişafına xüsusi diqqət göstərir. Bu sahənin inkişafına sərmayə qoyur. Xüsusən də xarici investorlar yaşıl enerjinin inkişafına sərmayə qoyurlar. Neft-qaz ehtiyatlarına görə bizdən də zəngin ölkələr var. Ancaq orada bunların heç biri təmin olunmayıb. Lakin Azərbaycan bu və digər parametrlərə görə çox yaxşı yerdədir. Ona görə də ənənəvi enerji ölkələrinə qiymət verərkən bütün bu amillər nəzərə alınmalıdır”.
Vidadi ORDAHALLI
