Hadisə yerinə ilk gələn kim olur?- Polis......
İşimiz çətinə düşəndə, problemlə üzləşəndə ilk müraciət ediyimiz ünvan polis olur. Atributlarımızı üzərlərində daşıyanların ən böyük vəzifəsi İnsanlıqdır. Demək olar ki, onlarla hər gün rastlaşırıq və əmin oluruq ki, mənzil başına tez çatacağıq, əmlakımız onlara etibar olunubsa, bir çöpümüzə belə ziyan gəlməyəcək, günün istənilən vaxtında ailəmizlə şəhərimizin gözəlliyindən zövq almaq üçün istədiyimiz məkana rahat gedəcəyik. Sabitliyimizi sərvət kimi qoruyanların özlərinin hansı çətinliklərlə üzbəüz gəldiyini isə görmürük, bilmirik. Çünki onlar hiss etdirmədən həyatlarını bir anın içində elə riskə atırlar ki, nəticədə kiminsə həyatının xilas edildiyini xəbər saytlarından və ya qəzetlərin manşetindən oxuyuruq.
“Bakı bu dəfə də qışa təslim oldu”. Belə başlıqlı xəbərlərə qış gələndə tez-tez rast gəlirik. Qışın, qarın fəsadını yaşayanda deyilənlərin doğruluğunu sübut etməyə ehtiyac qalmır. Qarın, yağışın yağması, güclü küləklərin əsməsi həyat bitdi anlamına gəlməməlidir. Şübhəsiz ki, təbii fəlakətə çevrilən hadisələrin qarşısını almaq üçün tədbirlər görülür, qurumlar səfərbər olunur, əhalinin təhlükəsizliyi bir nömrəli tapşırıq kimi qarşıya qoyulur.
Ölkəmizə qış yenə də öz sərt üzünü göstərdi. Bir neçə gün öncə, sözün əsl mənasında, qarla mübarizənin şahidi olduq. İctimai nəqliyyatın hərəkəti üçün yolların qardan, buzdan təmizlənməsi 24 saat davam etdi. Və yollar can almasın, təhlükə olmasın deyə polisin fədakarlığını, çətinliyə, əziyyətə qatlaşdığını gördük. Yolda qalan maşınlar, buz tutmuş yolu keçmək istəyən yaşlı insanlar, bir sözlə, hamı polisdən kömək gözləyirdi.
Qəhrəmanlıq an məsələsidir. Günümüzün qəhrəmanları olan Azərbaycan Polisinin hər günü demək olar ki, Qəhrəmanlıqdır. Polis istirahət etmir? Bu sualı xidmətdə olan hər hansı bir polis əməkdaşına versəniz inanın ki, eşitdiyiniz cavab bu olacaq: “Sizin təhlükəsizliyiniz bizim istirahətimizdir”. Xalqa xidməti içdiyi andla taclandıran, bunu özünə şərəf borcu hesab edəni uğura doğru aparan, sevdirən bilirsiniz nədir? Qazandığı güvənc, etibar və əlbəttə ki, ona göstərilən etimad.
Bu günlərdə, daha doğrusu, yanvarın 15-də Binəqədi rayonunda sexdə baş verən partlayışdan sonra hadisə yerinə ilk tələsənlərə diqqət etdinizmi? Polis idi, Azərbaycan Polisi! Dağıntılar altında qalanların çıxarılması, tüstüdən zəhərlənənlərin vaxtında xəstəxanalara çatdırılması üçün aidiyyatı qurumlara dəstək verən, həyat qurtarmağa çalışan polisimiz bir daha nəzərimizdə ucaldı, xilaskarlıq simvoluna çevrildi. Torpaqlarımızın düşməndən azad edilməsində, Vətənimizin bütövlüyünə qovuşmasında da Polis qəhrəmanlıq salnaməmizə imzasını atdı. Vətən adına canını oda atanlara, Vətən andı içənlərə, sabitliyimizi, təhlükəsizliyimizi etibar etdiklərimizə biz hər zaman borcluyuq. Bu borcun adı isə sayğıdır, sevməkdir.
Orxan Musayev,
Təhlükəsizlik üzrə ekspert
